Yeremiya 30 - Fulfulde DC Bible

Ko Jawmiraawo iinani danygol Yaakubu

¹ Jawmiraawo wolwani Yeremiya.

² Ndaa nii Jawmiraawo, Allah Isra'iila wi'i: “Winndu bolle ɗe mbi'maami fuu haa deftere.

³ Ngam nyalaade mi wartirta joonde yimɓe ummaatoore am Isra'iila e Yahuuda bana naane ɗon wara. Mi hooran ɓe haa lesdi ndi marnumi kaakiraaɓe maɓɓe, ɓe mara ndi fahin.” Non Jawmiraawo wi'i.

⁴ Ndaa ko Jawmiraawo wi'i dow Isra'iila e Yahuuda:

⁵ “Mi nani wookaandu kultoreeŋgol e kulol, ngam salaaman woodaa.

⁶ Ƴame goɗɗo: Gorko meeɗi ɓesnugo na? Ngam ɗume mi ɗon yi'a worɓe fuu bee juuɗe muuɗum'en dow keeci muuɗum'en, kal-kal bee debbo ɓesnanɗo? Ngam ɗume geese maɓɓe purɗi?

⁷ Kayto! Nyalaade hulniinde ɗon wara, nanndu maare walaa. Ɗum wakkati ɓillaare ngam danygol Yaakubu, ammaa ɓe kisan nde.”

⁸ Jawmiraawo honooɓe asama wi'i: “Nyalaade man ngewanmi kaɓɓirgal dow daaɗe maɓɓe, mi ta'an callalluuji maɓɓe, ngam taa ɓe tokko jagganaago jananɓe.

⁹ Ammaa ɓe njagganto Jawmiraawo Allah maɓɓe e laamiiɗo maɓɓe Daawuda mo umminanmi ngam maɓɓe.

¹⁰ Onon yimɓe danygol suka am Yaakubu, taa kule! Onon yimɓe Isra'iila, taa kultore! Ndaa mi hisnan on e lesdi ndaayiindi ndi daheeki, ndi laatiiɗon haɓɓaaɓe e muuɗum. Danygol Yaakubu wartan, jooɗoto bee jam e de'ere, walaa kulnanɗo ɓe.”

¹¹ Jawmiraawo wi'i: “Mi ɗon wondi bee mooɗon ngam hisnugo on. Mi nattinan ummaatooje fuu haa caŋkititmi on. Ammaa onon, mi nattintaa on. Mi eltan on fakat, ammaa mi eltan on deydey, mi laarataa on bana on ngalaano aybe.” Non Jawmiraawo wi'i.

¹² Ndaa nii Jawmiraawo wi'i Urusaliima: “Naawnere ma nyawndataako, kuuduuje ma kurgataako.

¹³ Walaa jiŋnganɗo ma, walaa lekki ngam ɓuule ma, walaa nyawndeeki.

¹⁴ Waaye'en ma fuu ngejjiti ma, acci suklanaago ma. Mi fiyi ma bana konneejo fiyrata, mi ɓocci ma naawɗum masin, ngam halleende ma mawni, hakkeeji ma ɗuuɗi.

¹⁵ Koni mboyata ngam piyɗe ma, ngam kuuduuje ma nyawndataako? Mi waɗi ma ɗum, ngam halleende ma mawni, hakkeeji ma ɗuuɗi.

¹⁶ Ammaa moɗooɓe ma, ɓe moɗeteeɓe. Konne'en maaɗa fuu ɓe ndaheteeɓe. Jaɓtooɓe ma, woɗɓe njaɓtan kuuje maɓɓe. Wilooɓe ma boo, mi nelan woɗɓe ngam wilugo cuuɗi maɓɓe.

¹⁷ Min mi yamɗitinte, mi hurgan kuuduuje ma, koo to konne'en ma ɗon mbi'a: Siyona wudinaama, walaa cuklaniiɗo ngol.” Non Jawmiraawo wi'i.

¹⁸ Ndaa nii Jawmiraawo wi'i: “Mi wartiran joonde danygol Yaakubu bana naane, mi enɗoto ci'e maɓɓe fuu. Ɓe nyiɓtoto berniwol ngo'ol dow towndiire, ɓe njo'itinan laamorde haa babal maare.

¹⁹ Jooɗotooɓe ton ngiman maŋgtooje, koolan bee seyo. Mi ɗuɗɗinan ɓe, ɓe ustataako. Mi teddinan ɓe, ɓe leestintaake.

²⁰ Danygol Yaakubu laatoto bana naane, mooɓtorde maɓɓe tabitan yeeso am. Mi hiitoto toonyooɓe ɓe fuu.

²¹ Hooreejo maɓɓe iwan caka maɓɓe, goɗɗo ummaatoore maɓɓe laamanto ɓe. Mi ewnoto mo haa o ɓadito yam. Ngam moy hulataa ɓaditaago yam? Non Jawmiraawo wi'i.

²² On laatoto ummaatoore am, min boo mi laatoto Allah mooɗon”.

^23-24 Ndaa Jawmiraawo tuurti! Tikkere maako saatunde ummake! Nde ɗon bana duluuru ukkotoondu dow ko'e halluɓe. Nde jinnataa, sonaa to o timmini ko o annini fuu. Haa timmoode balɗe, on paaman ɗum laaɓɗum.