Yeremiya 29 - Fulfulde DC Bible

Bataakewol Yeremiya haa Yahuudu'en nder Baabila

¹ Diga Urusaliima, annabi Yeremiya winndi bataakewol haa luttuɓe ndotti'en e liman'en e annabi'en e ummaatoore fuu ɓe Nabukodonosor dahino diga Urusaliima haa Baabila.

² O winndi ngol ɓaawo laamiiɗo Yekoniya e daada mum e saraaki'en mum e ardiiɓe Yahuuda e Urusaliima e kila'en e worɓe waɗooɓe sanaa'a fuu ndilli diga Urusaliima.

³ Sedekiya, laamiiɗo Yahuuda neli El'aasa ɓii Safan e Gemariya ɓii Hilkiyya haa Nabukodonosor, laamiiɗo Baabila. Ɓe njahri bataakewol go. Ndaa ko winnda nder maagol:

⁴ “Ndaa nii Jawmiraawo honooɓe asama, Allah Isra'iila wi'i dahaaɓe ɓe o dahi diga Urusaliima haa Baabila fuu:

⁵ Mahe cuuɗi, njooɗe nder maaji. Mbaɗe jarne, nyaame ko rimata nder maaje.

⁶ Te'e rewɓe, ndanyde ɓiɓɓe worɓe e rewɓe. Te'ane ɓiɓɓe mon worɓe, te'ne ɓiɓɓe mon rewɓe, ngam haa kamɓe boo ɓe keɓa ɓikkoy. Ɗuuɗe haa Baabila, taa uste!

⁷ Kakkilane salaaman berniwol ngol ndahmi on, toreeɗam ngam maagol. Ngam to ngol heɓi salaaman, onon boo on keɓan salaaman.

⁸ Min Jawmiraawo honooɓe asama, Allah Isra'iila, mi wi'i on: Taa acce annabi'en wonɓe caka mooɗon malla waɗooɓe hatti esta on, taa kakkilane koyɗi ɗi ɓe koyɗata.

⁹ Ɓe ɗon mbaɗa on annabaaku fewre bee innde am, min mi nelaay ɓe” – non Jawmiraawo wi'i.

¹⁰ Ndaa nii Jawmiraawo wi'i: “To Baabila waɗi duuɓi cappanɗe joweeɗiɗi, mi yaalan on fahin. Nden mi hebbitinan wolde am woonde haa mi hoora on haa lesdi mon.

¹¹ Mi anndi nufayeeje am dow mooɗon. Mi ɗon nufano on hayru, naa sarru, haa nyalɗe mon garanɗe keewa tammunde – non Jawmiraawo wi'i.

¹² On ewnoto yam, on ngaran ngam on toro yam, min boo mi jaɓan tornde mooɗon.

¹³ On ɗaɓɓitittam, on tawatam boo, ngam on ɗaɓɓitittam bee ɓernde woore.

¹⁴ Fakat on tawatam. Non Jawmiraawo wi'i. Mi wartiran joonde mon bana naane, mi wurtinan on diga ummaatooje e nokkuuje haa ndiiwmi on fuu, mi hoora on haa lesdi ndi njooɗinooɗon hiddeko mi daha on. Non Jawmiraawo wi'i.

¹⁵ On ɗon mbi'a Jawmiraawo hokki on annabi'en haa Baabila.

¹⁶ Nane ko Jawmiraawo wi'i dow laamiiɗo jooɗiiɗo dow leeso laamu Daawuda e banndiraaɓe mon luttuɓe haa Urusaliima fuu, ɓe ndahaaka bee mooɗon.

¹⁷ Ndaa nii Jawmiraawo honooɓe asama wi'i: Mi nelan konu e weelo e nyawu kalluŋgu ndaaɓoowu caka maɓɓe. Mi laatinan ɓe bana ibbe nyolɗe ɗe yimɓe ngiɗaa nyaamugo ngam ɗe mbonnake masin.

¹⁸ Mi taasnan ɓe bee konu e weelo e nyawu kalluŋgu ndaaɓoowu, mi laatinan ɓe nyidduɓe haa laamuuji duniyaaru fuu. Koo toy haa caŋkitanmi ɓe, yimɓe kultoran, kuɗan, njancan ɓe, naaliran bee innde maɓɓe.

¹⁹ Kanjum fuu ɗum laatoto ngam ɓe ɗowtanaaki bolle am ɗe tokkiimi neldugo haa maɓɓe bee kunnduɗe sukaaɓe am annabi'en, ɓe cali nanugo. Non Jawmiraawo wi'i.

²⁰ Ammaa onon dahaaɓe ɓe ngurtinmi Urusaliima, njahrumi haa Baabila, nane ko mbi'anmi on, min Jawmiraawo.”

²¹ Ndaa nii Jawmiraawo honooɓe asama, Allah Isra'iila wi'i dow Akab ɓii Kolaya e Sedekiya ɓii Ma'aseya, waɗanɓe on annabaaku fewre bee innde am: “Mi hokki ɓe haa juŋngo Nabukodonosor, laamiiɗo Baabila, haa o mbara ɓe dow gite mon.

²² To goɗɗo nder dahaaɓe diga Urusaliima haa Baabila yiɗi naalugo goɗɗo feere, o wi'an: Jawmiraawo laatine bana Sedekiya e Akab ɓe laamiiɗo Baabila sa'i bee yiite!

²³ Kanjum woni kiita maɓɓe, ngam ɓe kuuwi cemtiniiɗum nder Isra'iila, ɓe mbaɗi njeenu bee rewɓe heeddiɗɗiraaɓe maɓɓe, ɓe mbolwi pewe bee innde am, asee boo walaa ko umrumi ɓe. Min mi anndi, mi ceedoowo dow maɓɓe. Non Jawmiraawo wi'i.”

Bataakewol Semaya

²⁴ Jawmiraawo wi'i Yeremiya: “Yeccu Semaya Nehelamiijo:

²⁵ Ndaa nii Jawmiraawo honooɓe asama, Allah Isra'iila wi'i: A neldi bataakeeji bee innde maaɗa haa ummaatoore Urusaliima fuu, non boo haa limanjo Sefaniya ɓii Ma'aseya e liman'en fuu. Nder bataakeeji man a wi'i Sefaniya:

²⁶ Jawmiraawo darni ma a limanjo haa pellel Yoyada limanjo, a hooreejo haa haykaliiru Jawmiraawo haa a naŋnga yinnaaɓe wi'anɓe ɓe annabi'en, a haɓɓa ɓe bee callalluuji e bee njamndi taarotoondi daaɗe maɓɓe.

²⁷ Koni a felaay Yeremiya mo Anatot mo wolwani on bana annabiijo?

²⁸ Jonta boo o neldi min habaru haa Baabila, o winndi: Koɗamku mon duuran, ngam maajum mahe cuuɗi, njooɗe nder ton, mbaɗe jarne, nyaame ko rimata nder maaje.”

²⁹ Limanjo Sefaniya jaŋngani annabi Yeremiya bataakewol ngo'ol.

³⁰ Nden Jawmiraawo wolwani Yeremiya, o wi'i:

^31-32 “Neldu habaru haa dahaaɓe fuu, yeccu ɓe: Ndaa nii Jawmiraawo wi'i dow Semaya Nehelamiijo: Mi hiitoto mo e danygol maako. Mi nelaay mo, ammaa o wolwani on bana annabiijo, o esti on haa on nuɗɗina fewre. Mi accantaa mo danygol caka mooɗon, o meeɗataa yi'ugo booɗɗum ko mbaɗananmi ummaatoore am, ngam o yerɓi ummaatoore haa nde tuurtanammi. Non Jawmiraawo wi'i.”