Yeremiya 12 - Fulfulde DC Bible

Yeremiya ƴami Jawmiraawo

¹ Yeremiya tori, wi'i: “Yaa Jawmiraawo, a adiliijo timmuɗo, mi waawataa hujjotirgo bee ma! Ammaa bee non fuu mi yiɗi wolwango ma haala kiita ngooŋɗuka. Ngam ɗume nufayeeje halluɓe ɗon kiɓɓe, ɓe ɗon njaha yeeso yeeso? Ngam ɗume zammbotooɓe njooɗoto nder de'ere?

² An jubi ɓe, kamɓe boo ɓe mbaɗi ɗaɗi. Ɓe ɗon ɓesdo, ɓe ɗon ndima ɓenndalooje. Foroy haala maaɗa ɗon nder kunnduɗe maɓɓe, ammaa ɓerɗe maɓɓe ɗon ndaayi bee ma.

³ Ammaa min, yaa Jawmiraawo, a anndi yam. A ɗon yi'ammi, a ɗon linya ɓernde am, a anndi no mi yiɗiri ma. Dasu halluɓe ɓe'e bana baali kirseteeɗi. Jo'in ɓe sera ngam nyalaade kirsol!

⁴ Haa ndey lesdi wonata nder suno e haakooji gese fuu ɗaylata? Dabbaaji e colli ɗon mbaata daliila halleende yimɓe jooɗiiɓe lesdi ndi'i, wi'ɓe o yi'ataa garanɗum meeɗen.”

⁵ Jawmiraawo jaabi yam: “To doggididgo bee yimɓe somni ma, noy a waawrata doggididgo bee pucci? To a ɗon hoolɗini nder lesdi hoolaare tan, ɗume a waɗata nder laynde sukkunde baŋnge maayo Urdun?

⁶ Koo deerɗiraaɓe ma e yimɓe saare baaba ma zammbi ma, ɓe ɗon mooɓta yimɓe dow maaɗa bilaa anndaaŋgal ma. Taa nuɗɗin ɓe to ɓe mbi'i ma bolle booɗɗe.”

Sunoore Jawmiraawo

⁷ Jawmiraawo wi'i: “Mi acci suudu am, mi wudini maral am, mi hokki ummaatoore am yiɗaande haa juuɗe konne'en maare.

⁸ Ummaatoore laatiinde maral am wayliti, ɗon haɓa bee am bana mbarooga iwŋga laynde. Nde ɗon ubba dow am, ngam maajum mi ɗon wanya nde.

⁹ Nde nanndi bee sonndu woondu ndu colli loohotooɗi taari ɗum, ɗi ewni: Ngare, mooɓe dabbaaji ladde fuu, njahre ɗi haa pellel nyaamdu!

¹⁰ Ardiiɓe jananɓe ɗuuɗɓe mbonni ngesa inabooje am, njaaɓi maral am, laatini lesdi am mboondi ladde meere.

¹¹ Ɓe laatini ndi ladde meere, ndi wonni, ndi ferwi yeeso am. Lesdi fuu ferwi, walaa mo numata ɗum.

¹² Jaɓtooɓe ngari dow towndiije cooke nder ladde fuu, ngam mi ukki konu dow lesdi ngam halkugo ndi fuu. Walaa mo luttata jam.

¹³ Yimɓe am aawi alkamaari, ammaa ɓe codi gi'e. Ɓe comi meere. Codol maɓɓe laatani ɓe toskaare ngam daliila tikkere am saatunde.”

Jawmiraawo barri heeddiɗɗiraaɓe Isra'iila

¹⁴ Jawmiraawo wi'i: “Ndaa ko mi wolwata dow heeddiɗɗiraaɓe am halluɓe, meemɓe maral ngal ndokkumi ummaatoore am Isra'iila. Mi ɗoofan ɓe nder lesdi maɓɓe, mi ɗoofan Yahuuda e juuɗe maɓɓe.

¹⁵ Ammaa ɓaawo to mi ɗoofi ɓe, mi enɗan ɓe kadiboo, haa mi lorna ɓe, koo moy nder maral muuɗum e lesdi muuɗum.

¹⁶ To ɓe tokki diina ummaatoore am, to ɓe kunori bee innde am, ɓe mbi'i: Fakat bana Jawmiraawo o geeto—, bana ɓe ekkitinino ummaatoore am naane, ɓe kunorono bee innde Ba'al—, nden kamɓe boo ɓe tabitan caka ummaatoore am.

¹⁷ Ammaa to ɓe ɗowtanaaki yam, mi ɗoofan irin ummaatoore nde'e, mi nattinan nde.” Non Jawmiraawo wi'i.