Yaakuba 3 - Fulfulde DC Bible

Baawɗe ɗemŋgal

¹ Deerɗiraaɓe am! Taa ɗuuɗɓe mooɗon laato ekkitinooɓe, ngam on anndi kiita amin ɓuran saatugo dow kiita luttuɓe.

² En fuu en ɗon mbaɗa aybe bee laabi feere feere. Mo waɗataa aybe nder bolle muuɗum o timmuɗo, baawɗo naŋgtugo ɓanndu mum fuu.

³ En ɗon nastina labaŋge haa kunnduɗe pucci ngam haa ɗi ɗowtano en, bana nii en keɓan yahrugo ɗi haa en ngiɗi fuu.

⁴ Nume boo haala koommbooje. No ɗe mawniri fuu, koo to henndu saatundu ɗon ngerɓa ɗe, laanyoowo ɗon laanya ɗe bee laanyirgel pamarel, yahran ɗe haa o yiɗi fuu.

⁵ Non boo ɗemŋgal. Ngal tergal pamaral, ammaa ngal ɗon juroro wolwugo haalaaji mawɗi. Nume boo no yiite famare nyaamirta laynde mawnde.

⁶ Ɗemŋgal neɗɗo boo ɗon bana yiite. Ngal laati mooɓgal halleende fuu caka terɗe meeɗen. Ngal ɗon soɓna ɓanndu fuu. Ngal ɗon jamna balɗe ngeendam meeɗen fuu. Kaŋgal boo yiite jahannama jamni ngal.

⁷ Tum, neɗɗo waawi eltugo tagle fuu, waato: Kuuje ladde e colli e ladooji e liɗɗi fuu.

⁸ Ammaa ɗemŋgal, walaa mo waawi eltugo ngal. Ngal halli, ngal eltataake, ngal heewi tooke mbarooje.

⁹ Bee maagal en ɗon ngetta Jawmiraawo e Baabiraawo, bee maagal fahin en ɗon naala yimɓe tagaaɓe dow nanndal bee Allah.

¹⁰ Diga hunnduko wooto, bolle gettooje e naalooje ngurtoto. Deerɗiraaɓe am, haanaay ɗum laato non.

¹¹ Walaa seeɓoore ɓulata ndiyam mbelɗam e ndiyam kaaɗɗam haa ɓuldude woore.

¹² Deerɗiraaɓe am, ibbi riman jaytunje na? Inabohi riman ibbe na? Non boo seeɓoore ndiyam kaaɗɗam ɓulnataa mbelɗam.

Hikma iwka diga dow

¹³ Woodi hikmaajo, marɗo faamu caka mooɗon na? Sey o waŋgina ɗum nder gikku mbooɗŋgu bee kuuɗe yaŋkiniiɗe e hikmaaje.

¹⁴ Ammaa to on ngoodi kaajal caatuŋgal e jokkirgol nder ɓerɗe mooɗon, nden kam taa mawnite, taa luute gooŋga bee fewre boo.

¹⁵ Irin hikma ka'a iwaay haa dow, ka iwi haa duniyaaru, ka iwi haa numooji neɗɗo, ka iwi haa ginnaaji.

¹⁶ Ngam haa kaajal e jokkirgol ngoni, ton njiiɓru e kuuɗe kalluɗe fuu ngoni boo.

¹⁷ Ammaa hikma iwka diga dow, aran, ka laaɓi saray. Nden ka ɗon wadda jam e sulhu e neɗɗaaku, ka ɗon heewi enɗam, ka ɗon huuwa kuuɗe booɗɗe, ka senndindirtaa yimɓe, ka walaa naafikaare.

¹⁸ Kuuɗe adiliije iwi haa sulhindiranɓe yimɓe, waddanɓe sulhu hakkunde yimɓe.