Ruut 1 - Fulfulde DC Bible

Egguki Elimelek e yimɓe mum

¹ Zamanu alkaali'en ɗonno ɗowa Isra'iila, weelo waɗi. Ngam maajum goɗɗo iwɗo Baytilaama nder lesdi Yahuuda yehi ngam faɓɓoygo nder lesdi Mo'ab, kaŋko e debbo mum e ɓiɓɓe mum worɓe ɗiɗo.

² Innde gorko oo, Elimelek. Innde debbo maako, Na'omi. Inɗe ɓiɓɓe maako boo, Mahalon e Kiliyon. Ɓe Efrati'en iwɓe Baytilaama nder lesdi Yahuuda. Ɓe njotti lesdi Mo'ab, ɓe ɗon njooɗi ton.

³ Nden Elimelek, gorko Na'omi, maayi. Na'omi luttidi bee ɓiɓɓe muuɗum ɗiɗo.

⁴ Kamɓe ɓe te'i ɓiɓɓe rewɓe mo'abi'en. Innde oo, Orpa, innde oya boo, Ruut. Ɓe njooɗi ton baakin duuɓi sappo.

⁵ Nden Mahalon e Kiliyon maayi, ɓe ɗiɗo fuu. Na'omi lutti feere muuɗum, o sooyi goriiko, o sooyi boo ɓiɓɓe maako ɗiɗo.

Na'omi e Ruut lorti Baytilaama

⁶ Na'omi ummi lesdi Mo'ab bee esiraaɓe muuɗum, warti lesdi Yahuuda ngam o nanino Jawmiraawo woonani yimɓe mum, hokki ɓe nyaamdu.

⁷ Ngam maajum ɓe acci nokkuure haa ɓe ngonno, kaŋko e esiraaɓe maako ɗiɗo fuu, ɓe naŋngi laawol lortugo lesdi Yahuuda.

⁸ Nden Na'omi wi'i esiraaɓe mum: “Ndille, lorte koo moy mooɗon haa saare daada mum. Jawmiraawo woonana on, bana ko on ngaɗani maayɓe e ko on ngaɗani yam.

⁹ Jawmiraawo hokka koo moy mooɗon siwtaare haa saare gorko mum.” Nden o jaɓɓiti ɓe. Ɓe mboyi masin,

¹⁰ ɓe mbi'i mo: “Naa non, min njahdan bee maaɗa haa yimɓe ma.”

¹¹ Ammaa Na'omi wi'i: “Koote, ɓikkoy am! Ngam ɗume njahdoton bee am? Kadi mi waawan danyugo ɓiɓɓe worɓe, haa ɓe laato worɓe mon fahin na?

¹² Koote, ɓikkoy am, ndille, ngam mi naywi, mi waawataa te'eego. Koo to mi wi'i: Tammunde ɗon haa gorko wonda bee am jemmaare nde'e, to mi danyi ɓiɓɓe worɓe boo,

¹³ onon on ndeenan haa ɓe mawna na? On caloto te'eego na? Naa non, ɓikkoy am! Suno am ɗuuɗi masin, ɓuri ngo mooɗon, ngam ko Jawmiraawo waɗani yam ɓuri yam semmbe.”

¹⁴ Ɓe mboyi fahin. Nden Orpa jaɓɓiti esiraawo mum, hooti. Ammaa Ruut ɗakkotiri bee maako.

¹⁵ Na'omi wi'i mo: “Ndaa, eekiraawo ma lorti haa ummaatoore mum e ɗowanteeɓe mum. An boo hootu, tokka mo.”

¹⁶ Ammaa Ruut jaabi: “Taa doolam, mi acce, mi dilla. Haa njahata njahanmi, haa mbaalata mbaalanmi. Ummaatoore maaɗa laati ummaatoore am, Allah maaɗa boo Allah am.

¹⁷ Haa maayata maayanmi, ɓe uwammi ton boo. Sey maayde tan senndirta en. To naa non, Jawmiraawo hiito yam bee caatal fuu!”

¹⁸ Nde Na'omi faami anniya Ruut yahdugo bee maako tabiti, o acci ɓillugo mo.

¹⁹ Bana nii ɓe njahdi ɓe ɗiɗo fuu haa ɓe njotti Baytilaama. Nde ɓe nasti Baytilaama, berniwol fuu hayɗini, nden rewɓe ƴami: “Ɗum Na'omi na?”

²⁰ Na'omi wi'i ɓe: “Taa mbi'eeɗam Na'omi, mbi'eeɗam Maara, ngam Allah Baawɗo laskini yam ɓernde masin.

²¹ Mi wurtino ɗo bee mardi ɗuuɗndi, ammaa Jawmiraawo wartiri yam juŋngo meere. Koni mbi'oton yam ceyiiɗo? Jawmiraawo tikkani yam, Allah Baawɗo ukkani yam sarru.”

²² Bana nii Na'omi wardi bee Ruut, esum Mo'abiijo diga lesdi Mo'ab. Ɓe njotti Baytilaama saa'i yimɓe puɗɗi wa'go sa'iiruuri.