Roma'en 9 - Fulfulde DC Bible

Allah e ummaatoore nde o suɓi

¹ Gooŋga mi wi'ata naa fewre. Almasiihu anndi ɗum. Bee ballal Ruuhu Ceniiɗo numo ɓernde am ɗon seedo ɗum.

² Mi cakliiɗo masin, tum ɓernde am ɗon suni.

³ Mi jaɓanno naaloore Allah e seedugo bee Almasiihu ngam daliila yimɓe lenyol am.

⁴ Kamɓe ɓe asŋgol Isra'iila, suɓaaɓe Allah. Allah laatini ɓe ɓiɓɓe mum, waŋginani ɓe tedduŋgal mum, haɓɓi alkawalji bee maɓɓe, hokki ɓe tawreeta e umrooje dewal, iinani ɓe hayruuji ɗuuɗɗi.

⁵ Ɓe danygol kaakiraaɓe aartuɓe, koo Almasiihu boo iwi diga asŋgol maɓɓe, o Allah gonɗo dow koo ɗume fuu boo. Yettoore laatano mo haa foroy. Aamiina!

⁶ Mi wi'aay koŋngol Allah laati meere ngam naa Isra'iila'en fuu ngoni yimɓe Allah suɓaaɓe.

⁷ Naa iwɓe haa Ibrahiima fuu laati ɓiɓɓe Ibrahiima bee gooŋga. Allah wi'i Ibrahiima: “Nder Isiyaaku danygol ma ewna.”

⁸ Danyaaɓe fodde ɗabiya yimɓe ngonaay ɓiɓɓe Allah, sey danyaaɓe fodde koŋngol Allah limete nder ɓiɓɓe Allah.

⁹ Ndaa nii Allah wi'i: “Saa'iire bana nde'e, mi waran tawa Saraatu heɓi ɓiɗɗo gorko.”

¹⁰ Naa kanjum tan, ammaa ndaarenma ɓiɓɓe Rebekka ɗiɗo boo. Baaba maɓɓe gooto, waato kaaka men Isiyaaku.

^11-12 Cuɓol Allah ɗon dari dow anniya muuɗum tan. Ngam maajum o wi'i Rebekka: “Mawniraawo huuwanan minyiraawo.” Allah wi'i ɗum diga ɓe ciwaa danyeego, hiddeko ɓe mbaɗa booɗɗum malla kalluɗum. Cuɓol Allah daraaki dow kuuɗe maɓɓe, sey dow ewnaandu maako tan.

¹³ Bana ko winnda: “Yaakubu ngiɗmi, Isuwa kam mi wanyi ɗum.”

¹⁴ To non kam, ko mbi'eten? Kadi Allah o ɗon waɗa ko fottaay na? Naa non sam!

¹⁵ Ngam o wi'i Muusa: “Mi enɗan mo ngiɗmi enɗugo, mi hinnoto mo ngiɗmi hinnaago.”

¹⁶ Ngam maajum haala man fuu darataako dow muuyo neɗɗo malla tiinaare mum, sey dow hinnuye Allah.

¹⁷ Nder Deftere Seniinde Allah wi'i Firawna: “Mi waɗi ma laamiiɗo ngam daliila ngoota tan: Haa mi waŋgina baawɗe am dow maaɗa, mi anndina innde am nder duniyaaru fuu.”

¹⁸ Ngam maajum Allah ɗon huuwa bana o muuyi: O hinnoto oo, o saatinan hoore oya.

Ɓernuki Allah e hinnuye mum

¹⁹ Teema on mbi'atam kadi: “To ɗum laatake bana nii, ngam ɗume Allah aybinta min? Moy waawi dartango anniya maako?”

²⁰ Kayya! An a moy haa a waabotira bee Allah? Kadi tagdi wi'an tagɗo ɗum: “Koni mbaɗɗa mi bana nii?”

²¹ Mahoowo payanɗe maraay baawɗe dow loope kecce na? Bee loope goote o waawan waɗugo payanɗe ɗiɗi, woɗnde marnde saman e woɗnde boo walaa saman.

²² Bana nii muuyo Allah wa'i: Haa woɗɓe, o muuyi waŋgingo ɓernuki maako e baawɗe dow tagaaɓe wonɓe nder halkere, bee non fuu o munyani ɓe munyal ɗuuɗŋgal.

²³ Haa woɗɓe boo, o muuyi waŋginango ɓe ɗuuɗeeŋga tedduŋgal maako, o enɗi ɓe, o taaskitini ɓe diga ɓooyma ngam haa ɓe keɓa tedduŋgal maako.

²⁴ Enen boo en ɗon nder maɓɓe, o ewni en, naa nder Yahuudu'en tan, ammaa nder ummaatooje goɗɗe boo,

²⁵ bana o wi'i bee hunnduko annabi Hose'a: “Yimɓe ɓe laataaki ummaatoore am, mi waɗan ɓe ummaatoore am. Yimɓe ɓe laataaki yiɗaaɓe am, mi waɗan ɓe yiɗaaɓe am.

²⁶ Haa nokkuure nde ɓe mbi'no: Naa on ummaatoore am, ton ɓe ewneteeɓe ɓiɓɓe Allah geeto.”

²⁷ Annabi Esaaya boo wooyni haala Isra'iila, o wi'i: “No Isra'iila'en ɗuuɗiri bana njaareendi maayo fuu, hisanɓe maɓɓe ɗuuɗataa sam.

²⁸ Ngam Jawmiraawo timminan anniya mum dow duniyaaru, o timminan ka law.”

²⁹ Bana Esaaya waɗi annabaaku, wi'i: “Sonaa Jawmiraawo honooɓe asama luttani en danygol seɗɗa, en laatotono bana Sodoma, en nanndanno bee Gomorra.”

Almasiihu e Isra'iila

³⁰ Ko mbi'eten jonta? Allah adilini yimɓe ummaatooje goɗɗe, koo ɓe ɗaɓɓitaay mo. Allah adilini ɓe, ngam ɓe nuɗɗini Almasiihu.

³¹ Isra'iila'en kaɓdi ɗowtanaago tawreeta ngam haa ɓe laato adili'en yeeso Allah, ammaa ɓe keɓaay.

³² Ngam ɗume? Ngam ɓe kaɓdi fottango Allah bee kuuɗe, naa bee nuɗɗinki. Ngam maajum ɓe pergi dow mo wi'ete “hayre fergoore”,

³³ bana ko winnda: “Haa Siyona mballinanmi hayre fergoore yimɓe, tapaare do'oore ɓe. Ammaa koo moy nuɗɗini mo, o semtintaake.”