Roma'en 10 - Fulfulde DC Bible

¹ Deerɗiraaɓe am, bee ɓernde am fuu ngiɗmi yimɓe lenyol am kisa. Mi ɗon toro Allah boo ngam maɓɓe.

² Mi ɗon seedo ɓe ɓe ngoodi tiinaare haa ɓe ɗowtano Allah. Ammaa tiinaare maɓɓe daraaki dow anndal gooŋgawal.

³ Ɓe paamaay no Allah adilinirta yimɓe. Ɓe ɗon ɗaɓɓa adilaaku Allah dow laawol kuuɗe maɓɓe. Bana nii ɓe ɗon luuta laawol ngol Allah adilinirta yimɓe.

⁴ Diga Almasiihu wari, zamanu tawreeta timmi. Koo moy nuɗɗini Almasiihu, Allah adilinan mo.

⁵ Ndaa ko Muusa winndi dow no goɗɗo laatorto adiliijo bee laawol tawreeta: “Koo moy ɗowtani umrooje tawreeta, yeeɗiran ɗe.”

⁶ Ammaa ndaa ko o wi'i dow haala adilaaku bee laawol nuɗɗinki: “Taa wi': Moy eeŋgata haa asama?” Waato ngam jippingo Almasiihu.

⁷ “Taa wi' boo, moy jippoto nder joonde luggunde waato ngam ummitingo Almasiihu diga maayɓe.”

⁸ Ɗume wolde nde'e wi'i kadi? Ndaa ko nde wi'i: “Wolde Allah ɗon ɓadi ma, nde ɗon nder hunnduko ma e nder ɓernde ma.” Kanjum woni kubaruwol nuɗɗinki ngol min ngaazinta,

⁹ ngam to a seedake bee hunnduko ma: “Yeesu woni Jawmiraawo”, to a nuɗɗini bee ɓernde ma Allah ummitini mo diga maayde, nden kam a hisan.

¹⁰ Ngam to goɗɗo nuɗɗini bee ɓernde, o laatoto adiliijo e to o seedi Jawmiraawo bee hunnduko maako, o hisan.

¹¹ Ngam Deftere wi'i: “Koo moy nuɗɗini mo, o semtintaake.”

¹² Jonta kam, walaa feerotiral hakkunde Yahuudu'en bee ummaatooje goɗɗe. Ngam Allah woni Jawmiraawo maɓɓe ɓe fuu, o ɗon mo'ana ewnotooɓe mo fuu.

¹³ Ngam “koo moy ewnotooɗo innde Jawmiraawo, hisan.”

¹⁴ Ammaa noy ɓe ewnorto mo to ɓe nuɗɗinaay kubaruwol kisndam? Noy ɓe nuɗɗinirta ngol to ɓe meeɗaay nanugo ngol? Noy ɓe keɓrata nanugo ngol to gaazoowo ngol woodaa?

¹⁵ E noy ɓe ngaazirta to ɓe nelaaka? Bana ko winnda: “Ɗume wooɗiri bana kosɗe waazooɓe kubaruuji belɗi?”

¹⁶ Ammaa naa yimɓe fuu njaɓi Linjiila. Annabi Esaaya wi'i: “Yaa Jawmiraawo, moy nuɗɗini waazu amin?”

¹⁷ Bana non nuɗɗinki iwi haa nanugo waazu, waazu boo ɗon iwa haa wolde Almasiihu.

¹⁸ Sey mi ƴama: Isra'iila'en nanaay wolde na? Fakat ɓe nani nde! Deftere ɗon wi'a dow nelaaɓe: “Sawtu maɓɓe yotti lesɗe fuu. Bolle maɓɓe njotti keeri duniyaaru.”

¹⁹ Sey mi ƴamta fahin: Isra'iila'en paamaay na? Muusa aarti, jaabi: “Mi umminan kaajal mon bee yimɓe ɓe laataaki ummaatoore gooŋgaare, mi tikkinan on bee ummaatoore faataande.”

²⁰ Esaaya boo wi'i bee baŋguɗum: “Yimɓe ɓe ɗaɓɓitaay yam, tawi yam. Mi waŋgani yimɓe ɓe ƴamaay haala am sam.”

²¹ Ammaa dow Isra'iila o wi'i: “Mi nyalli weeɗugo juuɗe am haa mi jaɓɓo yimɓe luutooɓe, tuurtooɓe.”