Nehemiya 9 - Fulfulde DC Bible

Tuubu ummaatoore

¹ Nyannde noogas e nayaɓre lewru man, Isra'iila'en mooɓti, ɓe cuumi, ɓe ɓorni limce buhuuje, ɓe ukki mbulwuldi dow ko'e maɓɓe.

² Isra'iila'en ceedi bee jananɓe, ɓe ndari, ɓe mbaŋgini hakkeeji maɓɓe e aybeeji kaakiraaɓe maɓɓe yeeso Allah.

³ Koo moy dari haa nokkuure mum. Ɓe nani jaŋgɗe deftere tawreeta Jawmiraawo Allah maɓɓe, baakin saa'aaji tati. Saa'aaji tati feere ɓe mbaŋgini hakkeeji maɓɓe, ɓe cujidani Allah Jawmiraawo maɓɓe.

⁴ Yeesu'a e Baani e Kadmiyel e Sebaniya e Bunni e Serebiya e Baani e Kenani ndari dow ba'orɗe Lewi'en, ngookani Jawmiraawo Allah maɓɓe bee sawtu.

⁵ Nden Lewi'en Yeesu'a e Kadmiyel e Baani e Hasabeniya e Serebiya e Hodiyya e Sebaniya e Petahiya mbi'i: “Umme! Maŋgte Jawmiraawo, Allah mooɗon foroy haa abada!” Sey yimɓe maŋgta innde ma teddunde, ɓurnde maŋgtoore e tedduŋgal fuu!

⁶ An feere ma woni Jawmiraawo. An waɗi asama, asamaawu ɓurŋgu towugo bee jama'aare maagu fuu. A waɗi lesdi e ko woni dow maari, non boo beeli e ko woni nder maaji. An hokki tagle fuu yoŋki, jama'aare asama ɗon sujidane.

⁷ An, yaa Allah Jawmiraawo, a suɓi Abraama, a wurtini mo Ur nder lesdi Kaldiya, a inndi mo Ibrahiima.

⁸ A tawi mo o koolaaɗo yeeso maaɗa. A haɓɓi alkawal bee maako, haa a hokka danygol maako lesdi Kanaani'en e Heti'en e Amoori'en e Perezzi'en e Yebusi'en e Girgasi'en. A hebbini bolle ma, ngam a adiliijo.

⁹ A yi'i bone kaakiraaɓe amin nder lesdi Misra, a nani gookaali maɓɓe saa'i ɓe tori ma haa Maayo Maaliya.

¹⁰ A waɗi alaamaaji e kaayeefiiji dow Firawna e sukaaɓe muuɗum fuu e ummaatoore lesdi muuɗum fuu, ngam a yi'i no ɓe mawnitori dow kaakiraaɓe amin. A waɗani hoore ma innde mawnde, bana ko laati hannde.

¹¹ A seeki maayo yeeso maɓɓe, ɓe eeri caka maago dow joorɗum. Ammaa taasnuɓe ɓe, a do'i ɓe nder luggeeŋga bana goɗɗo sakkinirta hayre nder ndiyam iloojam bee semmbe.

¹² Nyalawma a ɗowi ɓe bee ruulde nanndunde bee daŋraŋgal, jemma boo bee yiite nannduŋge bee daŋraŋgal ngam yaynango ɓe dow laawol ngol ɓe tokki.

¹³ A jippi dow hooseere Sina, a wolwani ɓe diga asama. A hokki ɓe kiitaaji darnuɗi e sarɗiiji gooŋɗuɗi e farillaaji e umrooje booɗɗe.

¹⁴ A anndini ɓe nyannde siwtorde, nyannde ma seniinde. A umri ɓe umrooje e farillaaji, waato tawreeta bee hunnduko jaggiiɗo ma Muusa.

¹⁵ Nde weelo naŋngi ɓe, a hokki ɓe nyaamdu iwndu haa asama. Nde ɗomka naŋngi ɓe, a ilni ndiyam diga tapaare ngam maɓɓe. Nden a wi'i ɓe ɓe nasta, ɓe mara lesdi ndi a hunino a hokkan ɓe.

¹⁶ Ammaa kaakiraaɓe amin mawniti, caatini ko'e muuɗum'en, ɗowtanaaki umrooje ma.

¹⁷ Ɓe cali ɗowtaago, ɓe ngejjiti kaayeefiiji ɗi mbaɗnoɗa ngam maɓɓe. Ɓe caatini ko'e maɓɓe, ɓe cuɓani ko'e maɓɓe hooreejo ngam loraago haa njeyaaŋgu maɓɓe nder lesdi Misra. Ammaa an, a Allah jaafoowo, kinnotooɗo, enɗoowo yimɓe. A tikkataa law, mbooɗeeŋga ma ɗuuɗi. A wudinaay ɓe,

¹⁸ koo nde ɓe mbaɗi gaggel ɓolinaaŋgel, ɓe mbi'i: Ndaa Allah mooɗon gurtinɗo on Misra, koo nde ɓe mbolwi bolle kalluɗe masin dow maaɗa.

¹⁹ Ammaa daliila enɗam ma ɗuuɗɗam, a wudinaay ɓe nder ladde. Nyalawma, ruuldere nanndunde bee daŋraŋgal accaay ɗowugo ɓe dow laawol, jemma boo yiite nannduŋge bee daŋraŋgal yaynani ɓe laawol ngol ɓe tokki.

²⁰ A hokki ɓe Ruuhu ma booɗɗo ngam haa ɓe keɓa hikma. A salanaaki ɓe mannu, a hokki ɓe ndiyam saa'i ɓe ɗomɗuɓe.

²¹ Duuɓi cappanɗe nayi a wuurni ɓe nder ladde, ɓe cooyaay koo ɗume. Limce maɓɓe kiiɗaay, kosɗe maɓɓe uppaay.

²² A marni ɓe laamuuji e ummaatooje. Ɓe nyaami lesɗe heeddiɗɗiraaɓe maɓɓe. Ɓe nyaami lesdi Sihon, laamiiɗo Hesbon e lesdi Ook, laamiiɗo Baasan.

²³ A ɗuɗɗini ɓiɓɓe maɓɓe bana koode asama. A nastini ɓe lesdi ndi mbi'nooɗa kaakiraaɓe maɓɓe ɓe nastan ndi, ɓe mara ndi.

²⁴ Ɓiɓɓe maɓɓe nasti ndi, nyaami ndi. A leesni yeeso maɓɓe Kanaani'en aartuɓe jooɗaago lesdi man. Laamiiɓe e ummaatooje lesdi man, a hokki ɗum haa juuɗe maɓɓe, ngam haa ɓe mbaɗa ɗum ko fottani ɓe.

²⁵ Ɓe nyaami berniiji cemmbiɗɗi e gese cemmbiɗɗe. Ɓe kooci cuuɗi keewɗi kuuje booɗɗe e ɓulli e inabooje e jaytunje e leɗɗe dimooje ɓiɓɓe ɗuuɗɗe. Ɓe nyaami, ɓe kaari, ɓe payi, ɓe ɗon bee welwelo ngam daliila mbooɗeeŋga ma ɗuuɗŋga.

²⁶ Ammaa ɓe ndartani ma, ɓe tuurtani ma, ɓe ngudini tawreeta ma haa ɓaawo maɓɓe. Ɓe mbari annabi'en reentinɓe ɓe ngam lortingo ɓe haa maaɗa, ɓe mbolwi bolle kalluɗe masin dow maaɗa.

²⁷ Ngam man a hokki ɓe haa juuɗe konne'en, kamɓe ɓe ɓilli ɓe. Nder wakkati ɓillaare ɓe ngookani ma, an boo a nani ɓe haa asama. Daliila enɗam ma ɗuuɗɗam a hokki ɓe hisnooɓe. Ɓe kisni ɓe juuɗe konne'en maɓɓe.

²⁸ Ammaa nde ɓe keɓi siwtaare, ɓe puɗɗiti waɗugo halleende yeeso ma. Ngam maajum a wudini ɓe haa juuɗe konne'en maɓɓe haa ɓe laamani ɓe. Fahin ɓe ngookani ma, an boo a nani ɓe haa asama, a hisni ɓe nde ɗuuɗɗum ngam daliila enɗam ma ɗuuɗɗam.

²⁹ A reentini ɓe ngam haa ɓe lorto haa tawreeta maaɗa. Ammaa ɓe mawniti, ɓe ɗowtanaaki umrooje ma, ɓe mbaɗi hakke dow kiitaaji ma. Kanji, to goɗɗo tokkake ɗi, o yeeɗan. Ɓe ngaylitani ma ɓaawe, ɓe caatini ko'e maɓɓe, ɓe cali ɗowtaago.

³⁰ A munyani ɓe duuɓi ɗuuɗɗi. A reentini ɓe bee Ruuhu ma bee kunnduɗe annabi'en ma, ammaa ɓe cali nanugo. Ngam maajum a acci ɓe les baawɗe ummaatooje jananne.

³¹ Ammaa ngam enɗam ma ɗuuɗɗam a nattinaay ɓe fuu, a wudinaay ɓe, ngam a Allah kinnotooɗo e enɗoowo yimɓe.

³² “Jonta boo, yaa Allah amin, Allah mawɗo, baawɗo, kulniiɗo, a ɗon hakkilana alkawal ma e a ɗon waɗana min mbooɗeeŋga, taa laar boneeji amin fuu bana pamari, boneeji keɓɗi min, minin e laamiiɓe amin e ardiiɓe amin e liman'en amin e annabi'en amin e kaakiraaɓe amin e koo ummaatoore maaɗa fuu, diga zamanu laamiiɓe Assuura haa wargo hannde.

³³ Nder ko heɓi min fuu, an a adiliijo, ngam a waɗi gooŋgaaku. Ammaa minin min mbaɗi kalluɗum.

³⁴ Laamiiɓe amin e ardiiɓe amin e liman'en amin e kaakiraaɓe amin ɗowtanaaki tawreeta ma, ɓe kakkilanaay umrooje ma e seedamkuuji ma ɗi a anndini ɓe.

³⁵ Ɓe ɗonno nder lesdi maɓɓe, a waɗani ɓe mbooɗeeŋga ɗuuɗŋga, a hokki ɓe lesdi njaasndi, semmbiɗndi ndi, ammaa ɓe njagganaaki ma, ɓe tuubaay, ɓe accaay kuuɗe maɓɓe kalluɗe.

³⁶ Ndaa, min laatake maccuɓe hannde! Min maccuɓe nder lesdi ndi ndokkuɗa kaakiraaɓe amin ngam seyoraago nafuuda maari e kuuje maari booɗɗe.

³⁷ Nafuuda maari ɗuuɗka laatanake laamiiɓe ɓe njo'inɗa dow amin ngam daliila hakkeeji amin. Ɓe ɗon laamano min e dabbaaji amin, bana ɓerɗe maɓɓe ngiɗi. Min nasti boneeji naawɗi!”