Mika 6 - Fulfulde DC Bible

Ko Allah ɗaɓɓata haa yimɓe muuɗum

¹ Nane ko Jawmiraawo wolwi, o wi'i yam: “Umma, wulla yeeso kooseeje. Wolwu, haa towndiije nana daande maaɗa!”

² Kooseeje, nane wullaandu Jawmiraawo! Nane onon caɓɓaaje duniyaaru ɗe ndimmbataako! Ngam Jawmiraawo woodi daliila wullaago ummaatoore muuɗum, o tammi hujjotirgo bee Isra'iila.

³ Jawmiraawo wi'i: “Yimɓe ummaatoore am, ko mbaɗmi on? Bee ɗume comnumi on? Njaabeeɗam!

⁴ Mi wurtini on lesdi Misra, mi rimɗini on diga njeyaaŋgu. Mi neli Muusa e Haruna e Mariyama ngam ɗowugo on.

⁵ Ummaatoore am, siftor ko Balak, laamiiɗo Mo'ab nufani ma e ko Balaama ɓii Be'or jaabi mo. Siftor boo ko saali diga Sittim haa yotti Gilgal, haa annda kuuɗe Jawmiraawo adiliije.”

⁶ Bee ɗume ɓaditotoomi Jawmiraawo e kofotoomi yeeso Allah Ɓaŋiiɗo? Mi ɓadito mo bee guleteeɗi koo bee nyalbi na?

⁷ Jawmiraawo yerdoto jawɗi baali ujineere koo maahoy nebbam ujine sappo na? Mi hokka mo afo am, danygol ɓanndu am ngam yoɓugo tuurtol am e hakke yoŋki am na?

⁸ An neɗɗo, Jawmiraawo anndini ma ko wooɗi e ko o ɗaɓɓata haa maaɗa: Ɗum waɗugo ko fotti, yiɗugo waɗugo mbooɗeeŋga e tokkaago Allah ma bee tiinaare.

⁹ Jawmiraawo ɗon wolwana berniwol – Kulanɗo mo, o kakkilɗo: “Nane koŋngol elto e anndinɗo ngol!

¹⁰ Woodi ndesaaji rikiciiji haa saare kalluɗo e etirgal pamɗitinaaŋgal ngal nganymi na?

¹¹ Mi aybintaa huuwtiniranɓe awnorɗum rikiciijum, koo marɓe kaa'e awnorɗe pewjiiɗe nder boorooji muuɗum'en na?

¹² Riskuɓe berniwol keewi toonyaare, jooɗiiɓe nder maagol ɗon mbolwa pewe, ɗemɗe maɓɓe ɗon pewjo.

¹³ Ngam maajum puɗɗumi fiyugo on bee nyawuji, mi wila on ngam daliila hakkeeji mooɗon.

¹⁴ On nyaaman, ammaa on kaarataa, weelo tabitan caka mon. On cigoto kuuje, ammaa on kisnataa ɗe. Ko on kisni boo, mi accan kaafahi halka ɗum.

¹⁵ On aawan, ammaa on codataa. On ɓiɗɗan jaytunje, ammaa on ngujataa ɓalli mon bee nebbam. On ɓiɗɗan inabooje boo, ammaa on njarataa inaboojam.

¹⁶ On ɗon njogo umrooje laamiiɗo Omiri, on ɗon mbaɗa ko saare Akab waɗno fuu, on ɗon tokko sawariiji maɓɓe. Ngam maajum mi wilan berniwol mon, ɓe njancan jooɗiiɓe nder maagol, toskaare ummaatoore am ukkanto on.”