Mika 4 - Fulfulde DC Bible

Laamu Jawmiraawo dow duniyaaru

¹ Haa nyalɗe ragareeje, Jawmiraawo tabitinan hooseere haykaliiru mum, nde towtan dow geereeje kooseeje, nde ɓaŋgoto dow towndiije. Nden ummaatooje fuu tokkoto wargo haa maare.

² Jama'aaje ɗuuɗɗe njahan ton, mbi'an: “Ngare, mba'ooɗen dow hooseere Jawmiraawo, haa haykaliiru Allah Yaakubu, ngam haa o ekkitina en laabi maako, enen boo en tokko ɗi.” Ngam haa Siyona tawreeta iwi, wolde Jawmiraawo boo haa Urusaliima.

³ O laatoto kiitoowo hakkunde jama'aaje ɗuuɗɗe, o ta'anan ummaatooje cemmbiɗɗe daayiiɗe kiita. Kaafaaje maɓɓe, ɓe tappiran baaneeje, labbe maɓɓe boo bafɗi. Ummaatoore ɓaŋgtataa kaafahi dow ummaatoore woɗnde. Ɓe meetataa ekkitaago haɓre.

⁴ Koo moy jooɗoto les inabohi muuɗum e ibbi muuɗum, walaa mo ɓillata ɗum. Ɗum koŋngol Jawmiraawo honooɓe asama.

⁵ Ummaatoore koo ndeye fuu ɗon tokko ɗowanteeɗo muuɗum. Ammaa enen, en tokkoto Jawmiraawo Allah meeɗen haa abada abadin!

Dimɗineeki Isra'iila

⁶ Jawmiraawo wi'i: “Nyannde man mi mooɓtan woosɓe fuu, mi hawtan dahaaɓe, koo ɓeye ɓe njarnumi bone.

⁷ Woosɓe, mi laatinan ɓe yimɓe luttuɓe, mi wartiran saŋkitiiɓe ummaatoore mawnde. Min Jawmiraawo mi laamanto ɓe dow hooseere Siyona, diga jonta haa foroy.”

⁸ An boo, towndiire Urusaliima, a ɗon ayna ummaatoore ma bana no gaynaako aynirta tokke mum diga suudu towndu, laamu naane wartante. A laatoto laamorde Isra'iila fahin.

⁹ Ammaa jonta, koni mbaɗoton gookaali ɗi'i? Walaa laamiiɗo caka mooɗon na? Carwoowo mon halki haa naawreeŋga naŋngi on bana luuwe ɓesnanɗo na?

¹⁰ Njaŋngite, uume bana ɓesnanɗo, onon yimɓe Urusaliima. Ngam jonta on ngurtoto berniwol, on njooɗoto haa ladde, on njahan haa Baabila. Haa ton Jawmiraawo tammi hisnugo on e rimɗingo on e juuɗe konne'en mooɗon.

¹¹ Nden ummaatooje ɗuuɗɗe mooɓoto dow maaɗa, ɗe mbi'an: “Sey Urusaliima soɓa, gite meeɗen ceyoro nattere Siyona!”

¹² Ammaa ɓe anndaa numooji Jawmiraawo, ɓe paamataa muuyo maako. Ngam kaŋko o mooɓti ɓe bana ƴommbe haa laarre.

¹³ Jawmiraawo wi'i: “Umma, fiy, an ummaatoore Urusaliima! Mi hokkete luwe njamndi e koloŋgi njamndi mboɗeeri, haa a nama ummaatooje ɗuuɗɗe. Sey a lii'ano yam keɓal maaje, a hokka Jawmu duniyaaru jawdi maaje.”

¹⁴ Ammaa jonta, ƴare ɓalli mon, onon yimɓe Urusaliima. Konne'en kippake en, ɓe ɗon piya dow galaŋgal ardiiɗo Isra'iila bee sawru.