Mika 1 - Fulfulde DC Bible

Kiita dow Samariya e Urusaliima

¹ Jawmiraawo wolwani Mika mo Moraset nder zamanu Yotam e Akas e Hezekiya, laamiiɓe Yahuuda. Ndaa ko Mika yi'i dow Samariya e Urusaliima:

² Nane, onon ummaatooje fuu! Heɗita, an lesdi e ko hebbini ma! Allah Jawmiraawo wulloto on diga haykaliiru muuɗum seniindu!

³ Ndaa, Jawmiraawo ɗon wurto nokkuure muuɗum, ɗon jippo, ɗon yaaɓa dow towndiije duniyaaru.

⁴ Kooseeje ɗon ɓolwa les paalanɗe maako, waadiiji ɗon ceeka bana taari nder yiite, bana ndiyam ilanɗam haa diirtorde.

⁵ Ɗum fuu ɗum laati daliila tuurtol Yaakubu e hakkeeji ummaatoore Isra'iila. Ɗume woni tuurtol Yaakubu? Naa ɗum Samariya? E ɗeye ngoni nokkuuje Yahuuda towɗe? Naa ɗum Urusaliima?

⁶ Jawmiraawo wi'i: “Mi laatinan Samariya waagaare kaa'e haa ngesa e nokkuure ngam jubaago inabooje. Mi wuboto kaa'e berniwol Samariya haa les nder waadiwol, mi waŋginan caɓɓaaje maagol.

⁷ Ɓe pusan labbi maagol cehaaɗi fuu. Ngeenaari maagol fuu wulete bee yiite e mi yibbinan labbi maagol fuu, ngam ngol heɓri ɗi bee ngeenaari daakaareeku, ɗi ngartan boo ngeenaari daakaareeku.”

⁸ Ngam maajum mboyanmi, ngookanmi, njahanmi mi temmbo, bilaa paɗe. Mi waɗan gookaali bana cuuli, mi waɗan bojji bana dabbi.

⁹ Ngam huuduure maagol hurgataako, nde layi haa Yahuuda, nde yottake haa dammugal ummaatoore am, haa Urusaliima!

Konne'en ɗon ɓadito Urusaliima

¹⁰ Taa ngooyne ɗum haa Gaat, taa mboye sam. Talle nder mbulwuldi haa Bayti-Le'afra.

¹¹ An jooɗiiɗo haa Safir, saala, a temmbo, toskaaɗo. Jooɗiiɗo haa Ca'anan wurtataako. Daliila gookaali berniwol Bayti-Esel, on ittanaama ballal maagol.

¹² Jooɗiiɗo haa Maarot ɗon hula ngam taa jam muuɗum itte, ngam sarru jippi diga Jawmiraawo, yotti dammugal Urusaliima.

¹³ An jooɗiiɗo haa Lakis, haɓɓu pucci mootaaji ma. Ngam Lakis, an woni fofoodu hakkeeji Urusaliima, a nastini Isra'iila nder tuurtolji.

¹⁴ Ngam maajum doole a senndira bee Moraset-Gaat. Ci'e Akizib laatanto laamiiɓe Isra'iila daliila toskaare.

¹⁵ An jooɗiiɗo haa Maresa, fahin mi waddante jaalotooɗo ma. Tedduŋgal Isra'iila yahan haa Adullam.

¹⁶ Laɓu hoore ma! Ittu gaasa ma ngam daliila ɓiɓɓe ma yiɗaaɓe! Wartir nde bana hoore jigaawal, ngam ɓiɓɓe ma ndahaama daayiiɗum bee maaɗa!