Matta 19 - Fulfulde DC Bible

Ekkitinol Yeesu dow ceergal

¹ Nde Yeesu timmini wolwugo, o ummi lesdi Galiili, o yehi lesdi Yahudiya, gaɗa maayo Urdun.

² Mooɓe ɗuuɗɗe tokki mo, o yamɗitini ɓe ton.

³ Farisa'en ngari haa maako ngam jarribaago mo. Ɓe ƴami mo: “Tawreeta duŋani gorko seera debbo mum ngam daliila koo kaye na?”

⁴ O jaabi ɓe: “On njaŋngaay ko winnda na? Haa fuɗɗam Allah tagi gorko e debbo.”

⁵ Nden o wi'i: “Ngam maajum gorko accan baaba muuɗum e daada muuɗum, ɗakkotiran bee debbo muuɗum, ɓe ɗiɗo fuu ɓe laatoto ɓanndu wooru.

⁶ Bana non ɓe laatataako yimɓe ɗiɗo ɓaawoɗon, ammaa ɓanndu wooru. Ngam maajum taa neɗɗo fiista ko Allah haɓɓi.”

⁷ Farisa'en ƴami mo: “To non kam, ngam ɗume Muusa umri gorko hokka debbo muuɗum ɗereewol ceergal ngam seerugo ɗum?”

⁸ Yeesu jaabi ɓe: “Muusa duŋani on ɗum daliila caatal ɓerɗe mooɗon. Ammaa diga fuɗɗam ɗum laataaki non.

⁹ Mi ɗon wi'a on: Mo seeri debbo muuɗum, sonaa daliila daakaareeku, te'i debbo feere, waɗi njeenu.”

¹⁰ Pukara'en maako mbi'i mo: “To haala gorko bee debbo laatake non, ndikka taa ɓe te'a.”

¹¹ Yeesu jaabi ɓe: “Naa yimɓe fuu njaɓata haala ka, sey ɓe Allah waawni:

¹² Woɗɓe laati wahraaɓe diga danyeeki muuɗum'en, woɗɓe laati sortaaɓe, woɗɓe boo te'ataa ngam daliila laamu asamanji. Mo waawi jaɓugo haala ka, sey o jaɓa!”

Yeesu barkiɗini ɓikkoy pamaroy

¹³ Nden yimɓe ngaddi ɓikkoy pamaroy haa Yeesu ngam haa o yowa juuɗe maako dow maakoy, o waɗana koy do'a, ammaa pukara'en caatani ɓe.

¹⁴ Nden Yeesu wi'i ɓe: “Acce ɓikkoy pamaroy ngara haa am, taa kaɗe koy, ngam laamu asamanji woodani yimɓe irin maakoy.”

¹⁵ O yowi juuɗe maako dow maakoy, nden o dilli.

Sukaajo diskuɗo

¹⁶ Goɗɗo feere wari haa Yeesu, ƴami mo: “Moodibbo, kuugal booɗŋgal ngale mi huuwata haa mi heɓa ngeendam nduumiiɗam?”

¹⁷ Yeesu wi'i mo: “Ngam ɗume a ƴami yam ko wooɗi? Walaa booɗɗo, sey gooto tan. To a yiɗi nastugo nder ngeendam nduumiiɗam, sey a jogo umrooje.”

¹⁸ O ƴami Yeesu: “Umrooje ɗeye?” Yeesu jaabi mo: “Taa mbar-hoore, taa waɗ njeenu, taa wujju, taa seeda fewre dow goɗɗo.

¹⁹ Teddin baaba ma e daada ma, yiɗ keeddiɗɗiraawo maaɗa bana no a yiɗiri hoore ma.”

²⁰ Suka go wi'i: “Umrooje ɗe'e fuu, mi ɗowtani ɗe, ko luttani yam fahin?”

²¹ Yeesu wi'i mo: “To a yiɗi laataago timmuɗo, yah, soorru ko marɗa, hokku ɗum talaka'en, nden kam a heɓoyan ndesaari haa asama. Nden war tokkam.”

²² Nde suka nani bolle ɗe, o dilli, ɓernde maako metti, ngam jawdi maako ɗuuɗndi masin.

²³ Yeesu wi'i pukara'en muuɗum: “Gooŋga mbi'anmi on: Ɗum caɗɗum haa diskuɗo nasta laamu asamanji.

²⁴ Gooŋga mbi'anmi on fahin: Ngeelooba saalo nder wurdere baatal ɓuri hoyugo dow diskuɗo nasta laamu Allah.”

²⁵ Nde pukara'en nani ɗum, ɓe kayɗini masin, ɓe mbi'mbi'tiri: “Kay, to non kam, moy waawata hisugo?”

²⁶ Yeesu suti ɓe, wi'i: “Haa yimɓe ɗum waɗataako, ammaa haa Allah koo ɗume fuu waɗoto.”

²⁷ Nden Piyer wi'i mo: “Ndaa, minin min acci kuuje fuu, min tokki ma, ko laatanto min kadi?”

²⁸ Yeesu wi'i ɓe: “Gooŋga mbi'anmi on: Saa'i Ɓii-neɗɗo jooɗoto dow leeso laamu muuɗum tedduŋgo nde kuuje fuu kesɗiti, onon tokkiiɓe yam boo, on njooɗoto dow leese laamu sappo e ɗiɗi ngam hiitaago le'i Isra'iila sappo e ɗiɗi.

²⁹ Koo moy acci saare muuɗum e deerɗiraaɓe worɓe e rewɓe malla saaro'en malla ɓikkoy malla gese muuɗum ngam daliila innde am, o heɓan cowi teemerre, o ronan ngeendam nduumiiɗam boo.

³⁰ Ɗuuɗɓe aartuɓe laatoto sakkitiiɓe, ɗuuɗɓe sakkitiiɓe boo laatoto aartuɓe.”