Matta 18 - Fulfulde DC Bible

Moy ɓurdi maŋngu?

¹ Saa'i man pukara'en Yeesu ɓaditi mo, ƴami: “Moy ɓurdi maŋngu haa laamu asamanji?”

² Yeesu ewni ɓiŋngel pamarel, darni ngel caka maɓɓe.

³ O wi'i: “Gooŋga mbi'anmi on: To on ngaylitaaki haa on laato bana ɓikkoy pamaroy, nden kam on nastataa laamu asamanji sam.

⁴ Ngam maajum mo leestini hoore muuɗum bana ɓiŋngel nge'el, kaŋko woni ɓurduɗo maŋngu haa laamu asamanji.

⁵ Koo moy jaɓi ɓiŋngel pamarel bana nge'el ngam daliila innde am, min o jaɓi.”

Deentinki ngam nastinɗo deerɗiraawo muuɗum nder hakke

⁶ “To goɗɗo do'i gooto ɓurɗo famɗugo caka nuɗɗinɓe yam nder hakke, ndikkana mo ɓe ɓila hayre namarde mawnde haa daande maako, ɓe njolla mo nder mbeela lugguŋga.

⁷ Bone laatanto duniyaaru ngam ndu ɗon nastina yimɓe nder hakke! Doole ko do'ata yimɓe nder hakke wona, ammaa bone laatanto neɗɗo mo laati daliila do'ere man.

⁸ To juŋngo ma malla kosŋgal ma nastinte nder hakke, ta'u ɗum, wudin ɗum daayiiɗum. Ndikka a nasta ngeendam nduumiiɗam bee juŋngo wooto malla kosŋgal gootal, dow nastugo yiite duumiiŋge bee juuɗe malla kosɗe ma ɗiɗi fuu.

⁹ To yiitere ma nastinte nder hakke, ɗoof nde, wudin nde daayiiɗum. Ndikka a nasta ngeendam nduumiiɗam bee yiitere woore dow nastugo yiite jahannama bee gite maaɗa ɗiɗi fuu.”

Balndol dow mbaalu majjuŋgu

¹⁰ “Kakkile ngam taa on njawo gooto haa famarɓe ɓe'e. Mi ɗon wi'a on: Malaa'ika'en maɓɓe haa asama ɗon ndari tum yeeso Baabiraawo am mo asama. [

¹¹ Ngam Ɓii-neɗɗo wari hisnugo mo majji.]

¹² Ko numɗon? To goɗɗo woodi baali teemerre, nden ngootu maaji majji, o accataa cappanɗe joweenayi e joweenayi dow kooseeje ngam haa o yaha ɗaɓɓitoygo majjuŋgu na?

¹³ Gooŋga mbi'anmi on: To o heɓti ngu, o seyoto ngam daliila mbaalu ngootu ngu ko ɓuri baali cappanɗe joweenayi e joweenayi ɗi eeraay.

¹⁴ Bana non boo, Baabiraawo mooɗon mo asama yiɗaa koo gooto nder famarɓe ɓe'e halka.”

To deerɗiraawo ma waɗi ma aybe

¹⁵ “To deerɗiraawo ma waɗi ma aybe, yah, fel mo, on ɗiɗo. To o nani ma, a heɓti mo.

¹⁶ Ammaa to o salake nanango ma, yah haa maako bee goɗɗo gooto malla yimɓe ɗiɗo, ngam haa haala fuu laaɓa dow seedamku seedooɓe ɗiɗo malla tato.

¹⁷ To o salake nanango ɓe boo, yeccu ɗum haa jama'aare nuɗɗinɓe. To o sali nanango jama'aare nuɗɗinɓe, nden kam laar mo bana o keefeero malla o jomnoowo.”

Salaago e jaɓugo

¹⁸ “Gooŋga mbi'anmi on: Ko on kaɓɓi haa duniyaaru, ɗum haɓɓaama haa asama boo. Ko on piisti haa duniyaaru, ɗum fiistaama haa asama boo.

¹⁹ Gooŋga mbi'anmi on fahin: To haa duniyaaru ndu yimɓe ɗiɗo caka mooɗon narri dow ko ɓe ƴamatammi fuu, Baabiraawo am mo asama hokkan ɓe ɗum.

²⁰ Ngam haa yimɓe ɗiɗo malla tato kawti ngam innde am fuu, ton mi ɗon caka maɓɓe.”

Balndol dow kuuwoowo mo sali yaafaago

²¹ Nden Piyer wari haa Yeesu, ƴami mo: “Jawmiraawo, nde noy njaafotoomi deerɗiraawo am mo tokki waɗango yam aybe? Haa nde joweeɗiɗi na?”

²² Yeesu jaabi mo: “Aa'a, naa nde joweeɗiɗi, ammaa cappanɗe joweeɗiɗi nde joweeɗiɗi.”

²³ Ngam maajum laamu asamanji nanndi bee laamiiɗo mo yiɗi huuwooɓe mum mbaɗana mo lisaafi jawdi maako.

²⁴ Nde o fuɗɗi kuugal man, ɓe ngaddani mo goɗɗo mo o tokki suleyje miliyarji ɗuuɗɗi.

²⁵ Goɗɗo man walaa ko o yoɓra nyamaande nde. Jaagorɗo maako umri ɓe coorra mo, kaŋko e debbo maako e ɓikkoy maako e mardi maako fuu ngam yoɓugo nde.

²⁶ Gorko go tuggi koppi yeeso jaagorɗo muuɗum, tori mo, wi'i: “Useni munyanam, barkaama, ɗum fuu mi yoɓete.”

²⁷ Jaagorɗo maako yurmini mo, yoofi mo, yaafani mo nyamaande man fuu.

²⁸ Kuuwoowo man wurti, fotti bee kuuwdiɗɗiraawo muuɗum, mo o tokki ɗum baakin booro teemerre, o naŋngi mo daande, o ɗon ɗeɗɗa mo, o ɗon wi'a: “Yoɓam nyamaande am!”

²⁹ Kuuwdiɗɗiraawo maako do'i les kosɗe maako, tori mo, wi'i: “Useni munyanam, mi yoɓete.”

³⁰ Ammaa o sali, o yehi, o nastini mo nder fursina, sey to o yoɓi nyamaande maako fuu.

³¹ Nde huuwdiɗɗiraaɓe maako woɗɓe ngi'i ɗum, ɗum suni ɓe masin, ɓe njehi, ɓe anndini jaagorɗo maɓɓe haala ka fuu.

³² Nden jaagorɗo ewni kuuwoowo go, wi'i mo: An kuuwoowo kalluɗo, mi yaafani ma nyamaande ma fuu ngam a tori yam.

³³ Kadi haandaayno a enɗa kuuwdiɗɗiraawo ma bana mi enɗiri ma na?

³⁴ Jaagorɗo ɓernani mo, o yahri mo haa boŋngo'en haa to o yoɓi mo nyamaande maako fuu.

³⁵ Bana non boo Baabiraawo am mo asama waɗanta on, to koo moy mooɗon yaafanaaki deerɗum bee ɓernde woore.