Matta 11 - Fulfulde DC Bible

Nelaaɓe Yuhanna baɗoowo baptisma

¹ Nde Yeesu timmini umrugo pukara'en muuɗum sappo e ɗiɗo, o ummi nokkuure man, o dilli ngam haa o ekkitina e o waazina nder berniiji fuu.

² Saa'i man Yuhanna baɗoowo baptisma ɗon nder fursina, o nani habaru kuuɗe Almasiihu, o neli pukara'en maako woɗɓe haa Yeesu,

³ ɓe ƴami mo: “An woni mo min nani waran na? Malla min ndeena goɗɗo feere?”

⁴ Yeesu jaabi ɓe: “Njehe, mbi'e Yuhanna ko on nani, ko on ngi'i boo:

⁵ Wumɓe ɗon ngi'a, woosɓe ɗon njaha, kuturu'en laaɓi, fahɓe boo ɗon nana, maayɓe ummitaama, talaka'en boo ngaazinaama kubaruwol ceynoowol.

⁶ Barka laatanto koo moy mo accaay nuɗɗingo yam sam.”

⁷ Saa'i pukara'en Yuhanna ɗon ndilla, Yeesu fuɗɗi wolwango mooɓre haala Yuhanna, o wi'i: “Ɗume on njehi laaroygo nder ladde hamaadaare? Ƴommbal ngal henndu dimmbinta na? Aa'a, naa non.

⁸ Ɗume on njehi laaroygo kadi? Goɗɗo ɓorniiɗo limce booɗɗe na? Ammaa ɓorniiɓe limce booɗɗe, nder cuuɗi laamiiɓe ɓe ngoni.

⁹ Kadi ɗume on njehi laaroygo? Annabiijo na? Ooho! Mi ɗon wi'a on: Fakat, o ɓuri annabiijo.

¹⁰ Ngam Allah seedi dow Yuhanna nder Deftere, o wi'i: Ndaa, mi ɗon nela nelaaɗo am yeeso maaɗa, haa o mo'ina laawol ma yeeso maaɗa.

¹¹ Gooŋga mbi'anmi on: Caka ɓiɓɓe Aadama fuu walaa mo ɓuri Yuhanna baɗoowo baptisma maŋngu, ammaa mo ɓuri leesugo haa laamu asamanji, ɓuran Yuhanna maŋngu.

¹² Diga zamanu Yuhanna baɗoowo baptisma haa wargo hannde, konne'en ɗon kippo laamu asamanji, ɓe ɗon ɗaɓɓa jaɓtugo ngu.

¹³ Tawreeta Muusa e annabi'en fuu mbaɗi annabaaku dow laamu asamanji haa yotti saa'i Yuhanna.

¹⁴ To on njaɓi ko mbi'anmi kam, Yuhanna woni Eliya mo tammi wargo.

¹⁵ Mo woodi noppi fuu, nana!

¹⁶ Bee ɓeye nanndinanmi yimɓe zamanuuru ndu'u? Ɓe nanndi bee ɓikkoy njooɗiikoy haa luuɓe. Koy ɗon ngookana ɓikkoy ngoɗkoy, koy ɗon mbi'a:

¹⁷ Min puufani on algaytaaru, on ngamaay, min ngimani on gimi bojji, on mboyaay.

¹⁸ Ngam Yuhanna wari, ɗon suumo, ɓe mbi'i: O woodi ginnawol.

¹⁹ Ɓii-neɗɗo wari, ɗon nyaama, ɗon yara, ɓe mbi'i: Ndaare goɗɗo oo, o ɗuuɗa-nyaamɗeejo e guykoowo, o soobaajo jomnooɓe e hakke'en. Ammaa hikma Allah gooŋɗinaama nder kuuɗe maako.”

Berniiji ɗi cali tuubugo

²⁰ Nden Yeesu fuɗɗi felugo berniiji ɗi o waɗi kaayeefiiji ɗuuɗɗi ton, ammaa yimɓe maaji tuubaay. O wi'i:

²¹ “Bone laatano ma, an Korajin! Bone laatano ma, an Baytisayda! Ngam kaayeefiiji baɗaaɗi nder mooɗon, to ɗi mbaɗaano nder Tirus e Sidon kam, yimɓe maaji tuubanno law, ɓornotono buhuuje, ndufanno ndoondi dow ko'e muuɗum'en.

²² Ngam maajum mi ɗon anndina on: Nyalaade darŋgal, kiita Tirus e Sidon hoyan dow kiita mooɗon.

²³ An Kafarnahum, a ɗon tammo Allah ɓaŋgtete haa yotto asama na? Kayya! O sakkinte haa joonde maayɓe. Ngam kaayeefiiji baɗaaɗi nder maaɗa, to ɗi mbaɗano nder Sodoma, wuro ngo luttanno haa wargo hannde.

²⁴ Ngam maajum mi ɗon wi'a on: Nyalaade darŋgal, kiita Sodoma ɓuran kiita ma hoyugo.”

Yeesu waddi siwtaare

²⁵ Saa'i man Yeesu wi'i: “Yaa Baabiraawo, Jawmu asama e lesdi, mi yetti ma ngam a waŋginani ɓikkoy pamaroy kuuje ɗe'e ammaa a suuɗi ɗe hikma'en e marɓe faamu.

²⁶ Nonnon yaa Baabiraawo, bana nii ɗum fottani ma.”

²⁷ Nden o wi'i: “Baabiraawo am halfini yam kuuje fuu. Walaa annduɗo Ɓiɗɗo sonaa Baabiraawo, walaa annduɗo Baabiraawo boo sonaa Ɓiɗɗo e mo Ɓiɗɗo yiɗi waŋginango mo fuu.

²⁸ Onon somɓe e roondiiɓe doŋgle tedduɗe fuu, ngare haa am, mi hokkan on siwtaare.

²⁹ Ndoonde kaɓɓirgal am, ekkite haa am, ngam mi ɗelma-gikkuujo, mi jaŋkiniiɗo. Fakat, yoŋkiiji mooɗon ciwtoto.

³⁰ Ngam ɗum koyɗum roondaago kaɓɓirgal am e ko mi roondata on boo, ɗum teddantaa on.”