Markus 7 - Fulfulde DC Bible

Al'aada kaakiraaɓe

¹ Farisa'en e woɗɓe nder moodiɓɓe tawreeta warɓe diga Urusaliima kawti haa Yeesu.

² Ɓe ngi'i woɗɓe caka pukara'en maako ɗon nyaama bee juuɗe coɓɗe, waato ɓe lootaay ɗe fodde al'aada Farisa'en.

³ Ngam Farisa'en e Yahuudu'en fuu ɗon kakkilana al'aadaaji kaakiraaɓe, ɓe nyaamataa sonaa to ɓe looti juuɗe maɓɓe laaɓi tal.

⁴ To ɓe ngarti luumo, ɓe nyaamataa sonaa to ɓe ngiiwake. Ɓe ɗon ɗowtano umrooje goɗɗe ɗuuɗɗe ɗe ɓe ekkiti ngam ɗowugo ɓe, bana laɓɓingo njardukoy e payanɗe e taasaaje njamndi mboɗeeri.

⁵ Farisa'en e moodiɓɓe tawreeta ƴami Yeesu: “Koni pukara'en maaɗa ɗowtantaako al'aada kaakiraaɓe meeɗen, ɓe ɗon nyaama bee juuɗe coɓɗe?”

⁶ Yeesu jaabi ɓe: “Annabaaku ngu Esaaya waɗi dow mooɗon gooŋɗi. On naafiki'en, bana no o winndiri: Allah wi'i: Yimɓe ummaatoore nde'e ɗon teddinammi bee kunnduɗe, ammaa ɓerɗe maɓɓe ndaayake yam.

⁷ Ɓe ɗon cujidanammi meere, ngam ɓe ɗon ekkitina geccaaji yimɓe.”

⁸ Yeesu wi'i ɓe: “On acci umrooje Allah, on ɗon njogi al'aadaaji yimɓe.”

⁹ Nden o ɓesdi wi'ugo: “On mbaawi wudingo umroore Allah ngam jogaago al'aada mooɗon.

¹⁰ Muusa wi'i: Teddin baaba ma e daada ma. Koo moy wolwi kalluka dow baaba malla daada mum, sey o mbare.

¹¹ Ammaa onon, on ɗon mbi'a to goɗɗo wi'i baaba malla daada mum: Geɗal jawdi am ndi mi waawanno wallugo ma bee maari laatake Korbaan (bana wi'go: Mi hokki ndi Allah),

¹² nden kam walaa haaje o walla baaba malla daada maako fahin, on ɗon njaɓana mo ɗum.

¹³ Bana nii, on ɗon mbonna ko wolde Allah ƴami bee al'aadaaji mooɗon ɗi on ɗon ekkitina. E on ɗon mbaɗa kuuje goɗɗe ɗuuɗɗe bana maaji.”

Ko soɓnata neɗɗo

¹⁴ Fahin Yeesu ewni yimɓe ɓe ngara haa maako, o wi'i ɓe: “Naneeɗam on fuu, paame:

¹⁵ Walaa koo ɗume ko woni yaasi neɗɗo waawata soɓnugo mo bee nastugo nder maako. Ammaa ko wurtoto haa maako, kanjum soɓnata mo.

¹⁶ [Mo woodi noppi ngam nanugo nana!]”

¹⁷ Nde Yeesu seedi bee mooɓre, o nasti suudu, pukara'en maako ƴami mo maana balndol ngo'ol.

¹⁸ O wi'i ɓe: “Onon boo on ngoodaa faamu na? On paamaay nii ko nastata neɗɗo diga yaasi fuu, waawataa soɓnugo mo,

¹⁹ ngam ɗum nastataa ɓernde maako, ammaa nder reedu, ɓaawoɗon ɗum wurto haa ɓaawo suudu.” Yeesu wi'i bana nii ngam o sena nyaamdu fuu.

²⁰ Fahin o wi'i: “Ko wurtoto diga nder neɗɗo, kanjum soɓnata mo.

²¹ Ngam haa nder, haa ɓernde neɗɗo, numooji kalluɗi iwata, ɗi njahra mo haa daakaareeku e nguyka e mbar-hoore

²² e njeenu e suuno e halleende e fewjere e kuuje cemtiniiɗe e kaajal e kuudi kallundi e mawnitaare e faataare.

²³ Kuuje kalluɗe ɗe'e fuu nder neɗɗo ɗe iwata, ɗe coɓna mo.”

Nuɗɗinki debbo Sirofiniikiijo

²⁴ Yeesu ummi ton, dilli haa lesdi Tirus. O nasti saare woɗnde, o yiɗaa yimɓe annda ɗum. Ammaa o waawaay nyukkaago.

²⁵ Nden debbo mo ruuhu coɓŋgu ɗon torra ɓiŋngel muuɗum deyel, nani habaru Yeesu, o wari law haa maako, o tuggi koppi yeeso maako.

²⁶ Debbo oo, o Yunaniŋkeejo mo asŋgol Sirofiniiki'en. O tori Yeesu o riiwa ruuhu coɓŋgu diga ɓiŋngel maako.

²⁷ Ammaa Yeesu wi'i mo: “Accu ɓikkoy kaara tawon, ngam wooɗaay hoo'ugo nyaamdu ɓikkoy sakkinana ndawaakon.”

²⁸ Debbo wi'i mo: “Nonnon yaa Jawmiraawo, ammaa koo ndawaakon ngonkon les taabal boo nyaaman caamɗum nyaamdu ɓikkoy.”

²⁹ Nden Yeesu wi'i mo: “Ngam daliila wolde maaɗa nde'e, yah, ruuhu coɓŋgu wurtake ɓiŋngel ma.”

³⁰ O hooti, o tawi ɓiŋngel maako ɗon waali dow be'itte, ruuhu coɓŋgu wurtake nder maagel.

Yeesu yamɗitini paho

³¹ Ɓaawo man Yeesu wurti lesdi Tirus. O saali gal lesdi Sidon, o lorti gal weendu Galiili, o yotti haa lesdi wi'eteendi Berniiji-Sappo.

³² Ɓe ngaddani mo goɗɗo paho mo waawataa wolwugo laaɓɗum. Ɓe tori mo o wallina juŋngo dow maako.

³³ Nden Yeesu wurtini mo nder mooɓre, darni mo feere maako, o nastini kooli nder noppi goɗɗo oo e o meemi ɗemŋgal maako bee tuuɗe mum.

³⁴ Nden o tijji asama, o uumi, o wi'i goɗɗo go: “Effata”, bana wi'go: “Sukkita!”

³⁵ Law noppi maako cukkiti, ko haɓɓino ɗemŋgal maako fiisti, o wolwi bee laaɓɗum.

³⁶ Yeesu umri ɓe fuu taa ɓe anndina goɗɗo haala man. Ammaa koo nde o ɗuɗɗini bolle, kamɓe ɓe ngeeyni ɗum masin.

³⁷ Nanɓe ɗum kayɗini masin, ɓe mbi'i: “Ko o waɗata fuu, wooɗi masin! O waɗi haa fahɓe nana, muuka'en boo mbolwa.”