Markus 2 - Fulfulde DC Bible

Yeesu yamɗitini waata-terɗeejo

¹ Ɓaawo nyalɗe seɗɗa, Yeesu lorti haa Kafarnahum. Yimɓe nani o ɗon nder saare.

² Mooɓre ɗuuɗnde hawti haa babal luttaay koo haa yolnde boo. Nden Yeesu waazini ɓe Kubaruwol Belŋgol.

³ Yimɓe feere ngari haa maako, ɓe ngaddani mo waata-terɗeejo, worɓe nayo ɗon ndoondi mo.

⁴ Ammaa ɓe mbaawaay yottingo mo haa Yeesu ngam yimɓe ɗuuɗi. Nden ɓe maɓɓiti kippol suudu haa dow nokkuure nde Yeesu woni. Nden ɓe nastini waata-terɗeejo baaliiɗo dow be'itte mum, ɓe njippini mo.

⁵ Nde Yeesu yi'i nuɗɗinki yimɓe ɓe'e, o wi'i waata-terɗeejo: “Ɓiŋngel am, hakkeeji ma njaafaama.”

⁶ Moodiɓɓe tawreeta woɗɓe jooɗiiɓe ton numi nder ɓerɗe maɓɓe:

⁷ “Koni goɗɗo oo wolwata kalluka bana ka'a? Moy waawata yaafaago hakkeeji sonaa Allah feere mum?”

⁸ Yeesu annditi nder muuɗum ko ɓe numi. O ƴami ɓe: “Koni numoton bana nii?

⁹ Ko ɓuri hoyugo? Wi'go waata-terɗeejo: Hakkeeji maaɗa njaafaama naa malla wi'go mo: Umma, hoocu be'itte ma, yah?

¹⁰ Ammaa ngam haa mi faamtina on Ɓii-neɗɗo woodi baawɗe yaafaago hakkeeji nder duniyaaru.” Nden o wi'i waata-terɗeejo:

¹¹ “Mi ɗon wi'e: Umma, hoocu be'itte ma, hootu.”

¹² Law o ummi, o hoosi be'itte maako, o wurti, o dilli gite yimɓe fuu, haa ɓe kayɗini, ɓe teddini Allah, ɓe mbi'i: “Min meeɗaay yi'ugo irin ɗu'um.”

Yeesu ewni Lewi

¹³ Yeesu dilli fahin haa weendu Galiili. Yimɓe ɗuuɗɓe ngari haa maako, o ekkitini ɓe.

¹⁴ Nde o ɗon tokki laawol, o yi'i Lewi ɓii Halfa ɗon jooɗi haa baariki jomorgol. O wi'i mo: “Tokkam.” Lewi ummi, tokki mo.

¹⁵ Ɓaawo man Yeesu jooɗodi nder saare Lewi bee pukara'en muuɗum e jomnooɓe e hakke'en ɗuuɗɓe tokkiiɓe mo, ɓe nyaamdi.

¹⁶ Moodiɓɓe Farisa'en Woɗɓe ngi'i mo o ɗon nyaamda bee jomnooɓe e hakke'en, ɓe ƴami pukara'en maako: “Koni o nyaamdata bee yimɓe ɓe'e?”

¹⁷ Nde Yeesu nani ɗum, o wi'i ɓe: “Yamɓe ngalaa haaje kurgoowo, sey nyawɓe. Mi waraay ngam ewnaago adili'en, sey hakke'en.”

Ƴamol dow suumaye

¹⁸ Nyannde feere pukara'en Yuhanna e Farisa'en ɗonno cuumo. Woɗɓe ngari ƴami Yeesu: “Ngam ɗume pukara'en Yuhanna e Farisa'en ɗon cuumo, ammaa pukara'en maaɗa cuumataako?”

¹⁹ Yeesu jaabi ɓe: “On numi ewnaaɓe haa ɓaŋgal cuumoto nde ɓaŋɗo ɗon wondi bee maɓɓe na? Walaa sam! Ɓe cuumataako yaake ɓaŋɗo ɗon wondi bee maɓɓe.

²⁰ Ammaa saa'i waran nde ɓaŋɗo tawataake caka maɓɓe, wakkati man ɓe cuumoto.

²¹ Walaa mo takkata leppel kesel dow limce kiiɗɗe, ngam leppel kesel fooɗan limce kiiɗɗe, ceekgol man tullitan.

²² Non boo goɗɗo loowataa inaboojam kesam nder kanyakanyaaji kiiɗɗi, ngam taa inaboojam kesam seeka kanyakanyaaji man, wonna ɗi, inaboojam boo rufa. Ngam maajum sey goɗɗo loowa inaboojam kesam nder kanyakanyaaji kesi.”

Ƴamol dow nyalaade siwtorde

²³ Nyannde siwtorde Yeesu ɗonno saalo nder gese alkamaari. Pukara'en maako puɗɗi ittugo cammeeje alkamaari dow laawol.

²⁴ Nden Farisa'en mbi'i Yeesu: “Laar, koni pukara'en ma ngaɗata ko tawreeta meeɗen haɗi waɗugo nyannde siwtorde?”

²⁵ Yeesu jaabi ɓe: “On meeɗaay jaŋngugo ko Daawuda waɗi nde kaŋko e wonduɓe bee maako ɓe maati dolo e ɓe keɓaayno nyaamdu na?

²⁶ O nasti suudu Allah, o nyaami tamseeje ɗe ɓe lii'ani Allah saa'i Abiyatar wonno hooreejo liman'en. Sey liman'en tan tawreeta meeɗen duŋani nyaamugo tamseeje ɗe, o hokki boo wonduɓe bee maako, ɓe nyaami.”

²⁷ Nden Yeesu wi'i ɓe fahin: “Nyalaade siwtorde waɗaama ngam neɗɗo. Neɗɗo waɗaaka ngam nyalaade siwtorde.

²⁸ Ngam maajum, Ɓii-neɗɗo woni Jawmu nyalaade siwtorde man.”