Malakiya 2 - Fulfulde DC Bible

¹ “Jonta kam, onon liman'en, umroore nde'e ɗon ngam mooɗon:

² To on nanaay, to on mbaɗaay anniya teddingo innde am, nden kam mi ukkan naaloore dow mooɗon, mi laatinan barkaaji mon naaloore. Ooho, mi naali ɗi, ngam on ngalaa anniya hakkilango koo ɗume.” Non Jawmiraawo honooɓe asama wi'i.

³ “Ndaa, mi furkititto danygol mon, mi wiccan coowoowe dabbaaji ɗi on kirsata nder juulɗe mon haa geese mon, ɓe ndufdan on bee maaje fuu.

⁴ Nden on anndan min mi umri umroore nde'e ngam mooɗon, haa alkawal am bee lenyol Lewi tabita. Non Jawmiraawo honooɓe asama wi'i.

⁵ Alkawal am bee maako laatino ngeendam e salaaman. Mi hokki mo ɗum ɗiɗi fuu ngam haa o hulammi. Nden o huli yam, o diwni ngam innde am.

⁶ Kiita gooŋgaaha wonno haa hunnduko maako. Zammba woodaa haa hunnduko maako. O tokki yam bee hoolaare e ɓernde gooŋgaare. O lortini ɗuuɗɓe diga aybeeji maɓɓe.

⁷ Ngam kuugal limanjo ɗum ekkitingo anndal Allah. Yimɓe ɗaɓɓitan kiita haa maako, ngam o nelaaɗo Jawmiraawo honooɓe asama.

⁸ Ammaa onon, on celi laawol bee kiita mon, on ndo'i ɗuuɗɓe nder hakke bee kiita mon. On piisti alkawal am bee lenyol Lewi. Non Jawmiraawo honooɓe asama wi'i.

⁹ Ngam man mi yawni on, mi toskini on yeeso ummaatoore fuu, ngam on kakkilanaay laabi am. Nde on mbaɗi kiita boo, on kiitaaki yimɓe fuu kal-kal.”

Feloore dow teegal bee jananɓe e ceergal bee rewɓe sukaaku

¹⁰ Naa en fuu en ngoodi Baabiraawo gooto na? Naa Allah gooto tagi en fuu na? Koni en zammbotirta? Koni en njawi alkawal ngal Allah haɓɓuno bee kaakiraaɓe meeɗen?

¹¹ Yahuuda waɗi zammba nder Isra'iila e nder Urusaliima. Yahuudu'en kuuwi kuuɗe nyidduɗe. Yahuuda soɓni nokkuure seniinde nde Jawmiraawo yiɗi bee te'ugo faanyɓe tokkiiɓe ɗowanteeɗo jananno.

¹² Mo huuwata irin ɗu'um, Jawmiraawo ta'uma danygol maako diga jooɗorɗe Yaakubu, taa goɗɗo danygol maako yahra dokkal yeeso Jawmiraawo honooɓe asama.

¹³ Woodi boo huunde ɗiɗawre nde on mbaɗata: On ɗon cudda hirsirde Jawmiraawo bee gonɗi e bojji e uumaali, ngam o faalataa dokke mon, o jaɓataa ɗe diga juuɗe mon.

¹⁴ Ammaa on ɗon ƴama: “Ngam ɗume?” Ngam Jawmiraawo laati ceedoowo hakkunde maaɗa e debbo sukaaku ma. Debbo oo woni kawtiɗɗiraawo ma mo kaɓɓuɗa alkawal bee muuɗum, ammaa a zammbi mo.

¹⁵ Naa Jawmiraawo laatini on goɗɗo gooto nder ɓanndu e ruuhu na? Ɗume goɗɗo oo ɗaɓɓata? Naa heɓugo ɓikkoy koy Allah hokkata? Ngam maajum kakkilane ko'e mooɗon. Taa goɗɗo zammbo debbo sukaaku muuɗum.

¹⁶ Jawmiraawo Allah mo Isra'iila wi'i: “Mi ɗon wanya ceergal bana mi wanyirta goɗɗo mo soɓni limce mum bee toonyaare. Ngam maajum kakkilane ko'e mooɗon. Taa on mbaɗa zammba.” Non Jawmiraawo honooɓe asama wi'i.

Feloore dow hallinanɓe adilaaku Allah

¹⁷ On ɗon comna Jawmiraawo bee bolle mon. Ammaa on ɗon ƴama: “Bee ɗume min comni mo?” Bee wi'ugo: “Waɗanɓe halleende fuu ɗon pottana Allah, o ɗon seyoro ɓe.” Malla boo: “Toy Allah kiitoowo gooŋgaajo woni?”