Luka 7 - Fulfulde DC Bible

Yeesu yamɗitini suka mawɗo sooje'en

¹ Nde Yeesu timmini wolwango mooɓre bolle ɗe'e, o dilli Kafarnahum.

² Woodi ton Romaajo, mawɗo dow sooje'en teemerre, mo suka mum giɗaaɗo nyawi, ɓadake maayugo.

³ Nde mawɗo sooje'en oo nani habaru Yeesu, o neli ndotti'en Yahuudu'en haa maako ngam toraago mo o wara o yamɗitina suka maako.

⁴ Ɓe ngari haa Yeesu, ɓe tori mo ɗuuɗɗum, ɓe mbi'i: “Goɗɗo oo, haani a walla mo,

⁵ ngam o yiɗi ummaatoore meeɗen, kaŋko mahani min suudu dewal.”

⁶ Nden Yeesu dillidi bee maɓɓe. Nde o daayotiraay fahin bee saare, mawɗo sooje'en go neli soobiraaɓe mum, ɓe mbi'a mo: “Moodibbo, taa ɓillu hoore ma, ngam mi he'aay a nasta saare am.

⁷ Ngam maajum mi laari mi he'aay yahugo haa maaɗa bee hoore am. Ammaa wolwu wolde woore tan, suka am yamɗitan.

⁸ Min boo, mi woodi mawɓe dow am, mi woodi sooje'en boo les baawɗe am. To mi wi'i oo: Yah, o yahan. To mi wi'i oya boo: War, o waran. To mi wi'i suka am: Waɗ nii, o waɗan.”

⁹ Nde Yeesu nani bolle ɗe'e, o hayɗini daliila mawɗo sooje go, o yeesiti e o wi'i tokkiiɓe mo: “Mi ɗon wi'a on: Koo nder Isra'iila, mi meeɗaay tawugo nuɗɗinki makki bana ki'i.”

¹⁰ Nde nelaaɓe lori haa saare mawɗo sooje'en, ɓe tawi suka go yamɗiti.

Yeesu ummitini ɓiŋngel debbo jurumɗo

¹¹ Ɓaawoɗon Yeesu yehi haa wuro wi'eteeŋgo Nayin. Pukara'en maako bee yimɓe ɗuuɗɓe njahdi bee maako.

¹² Nde o ɓadi nastorde wuro, ndaa yimɓe ɗon ndoondi maayɗo haa ɓe uwoya. Ɗum ɓiŋngel bajjel haa daada e daada boo jurumɗo. Yimɓe wuro ɗuuɗɓe ɗonno ngondi bee debbo man.

¹³ Nde Yeesu yi'i mo, o yurmini mo, o wi'i: “Taa woy.”

¹⁴ Nden o yehi, o meemi kes maayɗo man. Roondiiɓe ndari. Yeesu wi'i: “Sukaajo, mi wi'i ma: Umma!”

¹⁵ Maayɗo ummi, jooɗi, fuɗɗi wolwugo. Yeesu hokkiti mo daada maako.

¹⁶ Yimɓe fuu kultori, ɓe teddini Allah, ɓe mbi'i: “Annabiijo mawɗo waŋgi caka meeɗen! Allah wari wallugo yimɓe muuɗum!”

¹⁷ Habaru Yeesu saŋkiti haa lesdi Yahudiya e lesɗe taariiɗe fuu.

Nelaaɓe Yuhanna baɗoowo baptisma

¹⁸ Pukara'en Yuhanna ngecci mo kuuje ɗe'e fuu. O ewni ɗiɗo nder maɓɓe,

¹⁹ o neli ɓe haa Jawmiraawo, ɓe ƴama mo: “An woni Almasiihu mo tammi wargo malla min ndeena goɗɗo feere?”

²⁰ Nde ɓe ngari haa Yeesu, ɓe mbi'i mo: “Yuhanna baɗoowo baptisma neli min haa ma, haa min ƴame: An woni Almasiihu mo tammi wargo malla min ndeena goɗɗo feere?”

²¹ Nder wakkati man nden boo Yeesu yamɗitini ɗuuɗɓe marɓe nyawuji feere feere e marɓe ruuhuuji coɓɗi e o wumtini wumɓe ɗuuɗɓe.

²² Nden o jaabi nelaaɓe Yuhanna go: “Njehe, mbi'e Yuhanna ko on ngi'i e ko on nani: Wumɓe ɗon ngi'a, woosɓe ɗon njaha, kuturu'en njamɗiti, muukaaɓe ɗon nana, maayɓe ɗon ummito, kubaruwol ceynoowol boo anndinaama haa laafuɓe.

²³ Barka laatanto koo moy mo accaay nuɗɗingo yam sam.”

²⁴ Nde nelaaɓe Yuhanna ndilli, Yeesu fuɗɗi wolwango yimɓe dow Yuhanna, o wi'i: “Ɗume njahɗon laaroygo haa ladde? Ƴommbal ngal henndu dimmbata na?

²⁵ Kadi ɗume njahɗon laaroygo? Goɗɗo ɓorniiɗo limce booɗɗe na? Ɓorniiɓe limce booɗɗe, jeynitiiɓe, haa laamorɗe ngoni.

²⁶ Ɗume njahɗon laaroygo kadi? Annabiijo na? Ooho, mi ɗon wi'a on: Fakat, o ɓuri annabiijo.

²⁷ Ngam Yuhanna woni mo deftere wi'i dow muuɗum: Allah wi'i: Mi nelan nelaaɗo am yeeso ma, haa o mo'ina laawol yeeso maaɗa.”

²⁸ Yeesu wi'i fahin: “Mi ɗon wi'a on: Caka ɓiɓɓe Aadama fuu walaa ɓurɗo Yuhanna maŋngu. Ammaa mo ɓuri leesugo haa laamu Allah, ɓuran mo.”

²⁹ Ummaatoore e jomnooɓe nanɓe mo fuu annditi adilaaku Allah, ɓe njaɓi baptisma Yuhanna.

³⁰ Ammaa Farisa'en e moodiɓɓe tawreeta ngudini muuyo Allah ngam maɓɓe, ɓe cali jaɓugo baptisma diga Yuhanna.

³¹ Yeesu tokki wi'ugo: “Bee moy nanndinanmi yimɓe zamanuuru ndu'u? Bee ɓeye ɓe nanndinte?

³² Ɓe nanndi bee ɓikkoy njooɗiikoy haa luumo, ɓe ɗon ewnotira, ɓe ɗon mbi'a: Min puufani on algaytaaru, on ngamaay. Min ngimani on gimol bojji, on mboyaay.

³³ Ngam Yuhanna baɗoowo baptisma wari, o ɗon suumo, o yarataa nguykinoojam boo, ammaa on mbi'i o ginnaaɗo.

³⁴ Ɓii-neɗɗo wari, o ɗon nyaama, o ɗon yara, on mbi'i o ɗuuɗa-nyaamɗeejo e guykoowo, o soobaajo jomnooɓe e hakke'en.

³⁵ Ammaa hikma Allah gooŋɗinaama haa yimɓe ɓe njaɓi ka fuu.”

Yeesu nder saare Simon Farisaajo

³⁶ Farisaajo feere ewni Yeesu ngam o nyaamda bee maako. Yeesu yehi haa saare Farisaajo man, o jooɗi haa o nyaama.

³⁷ Woodi debbo hakkeejo haa wuro man. Nde o nani Yeesu ɗon nyaama haa saare Farisaajo go, o waddi faandu saɗndu heewndu uurdi.

³⁸ O dari ɓaawo Yeesu heedi kosɗe muuɗum. O ɗon woya, haa o soofni kosɗe Yeesu bee gonɗi maako, nden o woosti ɗum bee gaasa hoore maako, o hebbi ɗe, o rufani ɗe uurdi.

³⁹ Nde Farisaajo ewniiɗo Yeesu go yi'i ɗum, o numi nder ɓernde maako: “To gorko oo o annabiijono, o anndanno debbo meemɗo mo oo, o hakkeejo.”

⁴⁰ Yeesu fuɗɗi wolwugo, o wi'i Simon: “Woodi ko mi yiɗi wi'go ma.” Simon jaabi: “Wolwu, moodibbo.”

⁴¹ Yeesu wi'i: “Woodi goɗɗo mo tokki yimɓe ɗiɗo nyamaande. O tokki arano suleyje cardi teemeɗɗe jowi e gooto boo cappanɗe jowi.

⁴² Ɓe mbaawaay yoɓugo mo. Ngam maajum o yaafani ɓe, ɓe ɗiɗo fuu. Moy ɓurata yiɗugo mo caka ɗiɗo ɓe'e?”

⁴³ Simon jaabi: “Mi tammi mo o yaafani ɓurɗum ɗuuɗugo.” Yeesu wi'i mo: “Gooŋga mbi'ɗa.”

⁴⁴ Nden Yeesu wayliti gal debbo, o wi'i Simon: “A ɗon laara debbo oo na? Mi wari saare ma, a hokkaay yam ndiyam ngam lootugo kosɗe am, ammaa kaŋko o soofni ɗe bee gonɗi maako, o woosti ɗe bee gaasa hoore maako.

⁴⁵ A hebbaaki yam, ammaa kaŋko, diga mi wari saare ma, o accaay hebbaago kosɗe am.

⁴⁶ A rufaay nebbam dow hoore am, ammaa kaŋko, o rufi uurdi haa kosɗe am.

⁴⁷ Ngam maajum mi ɗon wi'e: Yiide maako mawnde waŋgini hakkeeji maako ɗuuɗɗi njaafaama. Ammaa mo ɓe njaafani pamarum, yiide nde o waŋginta famɗan.”

⁴⁸ Nden Yeesu wi'i debbo: “Hakkeeji maaɗa njaafaama.”

⁴⁹ Nyaamdanɓe bee maako puɗɗi numugo: “Moy oo, mo waawi yaafugo hakkeeji?”

⁵⁰ Ammaa Yeesu wi'i debbo: “Nuɗɗinki ma hisni ma, yah jam.”