Luka 4 - Fulfulde DC Bible

Jarribeeki Yeesu

¹ Yeesu loroyi diga Urdun, o keewɗo Ruuhu Ceniiɗo e Ruuhu man yahri mo ladde.

² Iblisa jarribi mo ton nyalɗe cappanɗe nayi. O nyaamaay sam nyalɗe man e nde nyalɗe ɗe'e caali, o maati dolo.

³ Iblisa wi'i mo: “To a Ɓiɗɗo Allah kam, umru hayre nde'e, nde laato nyaamdu.”

⁴ Yeesu jaabi mo: “Deftere wi'i: Neɗɗo yeeɗirtaa nyaamdu tan.”

⁵ Iblisa yahri mo haa dow, nder ma'annde non o sappini mo laamuuji duniyaaru fuu,

⁶ o wi'i mo: “Mi hokkete baawɗe e risku laamuuji ɗi'i fuu, ngam ɗum hokkaama yam, min boo mi hokkan ɗum mo ngiɗmi fuu.

⁷ Ɗum fuu mi hokkete to a sujidani yam.”

⁸ Yeesu jaabi mo: “Deftere wi'i: Sujidan Allah Jawmiraawo maaɗa tan, kaŋko feere maako a rewata.”

⁹ Fahin, Iblisa yahri mo haa Urusaliima, jo'ini mo dow yeereere haykaliiru, wi'i mo: “To a Ɓiɗɗo Allah kam, diw diga ɗo haa lesdi,

¹⁰ ngam deftere wi'i: Allah umran malaa'ika'en muuɗum ngam aynugo ma.

¹¹ Fahin boo: Ɓe taɓɓoto ma bee juuɗe maɓɓe, ngam taa kosŋgal ma fergo dow hayre.”

¹² Yeesu jaabi mo: “Deftere wi'i: Taa jarriba Allah Jawmiraawo maaɗa.”

¹³ Nde Iblisa timmini jarribaago Yeesu bee dabare mum fuu, o dilli, o acci mo, sey saa'i feere fahin.

Yeesu fuɗɗi kuugal muuɗum nder lesdi Galiili

¹⁴ Yeesu lori haa lesdi Galiili, o kebbinaaɗo baawɗe Ruuhu Ceniiɗo. Habaru maako saŋkiti nder lesdi man fuu.

¹⁵ O ekkitini yimɓe nder cuuɗi dewal Yahuudu'en, yimɓe fuu teddini mo.

Yimɓe Nasaratu cali Yeesu

¹⁶ Yeesu yehi Nasaratu, wuro ngo o mawnino haa muuɗum. Nyannde siwtorde o nasti suudu dewal Yahuudu'en bana o woowi waɗugo. O ummi ngam o jaŋnga deftere,

¹⁷ ɓe ndokki mo deftere annabi Esaaya taggaande, o taggiti nde, o tawi aayaaje binndaaɗe bana ni'i:

¹⁸ “Ruuhu Jawmiraawo ɗon dow am, o mooyti yam ngam haa mi waazina laafuɓe habaru seyo. O neli yam haa mi wooynana haɓɓaaɓe ndimu muuɗum'en, ngam wumtingo wumɓe, ngam jooftuki torraaɓe,

¹⁹ ngam yeeynugo hitaande baŋguki mo'ere Jawmiraawo.”

²⁰ Nden o taggi deftere go, o hokkiti nde balloowo nder suudu dewal Yahuudu'en, o jooɗi. Yimɓe wonɓe ton fuu tokki laarugo mo.

²¹ Nden o fuɗɗi wolwango ɓe: “Aayaaje binndaaɗe ɗe'e, ɗe ngooŋɗi haa mooɗon wakkati on nani ɗe njaŋngaama jonta.”

²² Ɓe fuu ɓe ngerdi haala maako, ɓe kayɗini ngam bolle belɗe gurtiiɗe diga hunnduko maako. Ɓe mbi'i: “Naa o ɓii Yusufu na?”

²³ Yeesu wi'i ɓe: “Fakat, on ngeccatam geccawol ngo'ol: Kurgoowo, hurgu hoore maaɗa! On mbi'atam boo: Min nani ko mbaɗɗa haa Kafarnahum fuu, waɗ ɗum nder wuro maaɗa boo!”

²⁴ Fahin o wi'i: “Gooŋga mbi'anmi on, walaa annabiijo koo gooto mo ɓe njaɓɓata nder wuro muuɗum.

²⁵ Mi ɗon wi'a on, fakat, rewɓe yurumɓe ɗuuɗɓe ɗonno nder Isra'iila zamanu annabi Eliya, saa'i iyeende toɓaayno baakin duuɓi tati e lebbi joweego, weelo saatuŋgo waɗi nder lesdi fuu.

²⁶ Ammaa Allah nelaay Eliya haa jurumɗo koo gooto maɓɓe, sey haa mo wuro Sarepta, nder lesdi Sidon.

²⁷ Kuturu'en ɗuuɗɓe ɗonno boo nder lesdi Isra'iila zamanu annabi Elisa. Ammaa koo gooto maɓɓe yamɗitaay, sey Na'aman mo lesdi Siriya tan.”

²⁸ Yimɓe wonɓe nder suudu dewal man fuu keewi tikkere, nde ɓe nani bolle ɗe'e.

²⁹ Ɓe ummi, ɓe ngerɓi mo haa yaasi wuro maɓɓe, ɓe njahri mo dow towndiire nde berniwol maɓɓe Nasaratu mahano dow maare, ngam ɓe cakkina mo haa les.

³⁰ Ammaa o wurti caka maɓɓe, o tokkitini laawol maako.

Goɗɗo mo ginnawol torri ɗum

³¹ Yeesu yehi Kafarnahum, berniwol nder lesdi Galiili, o ekkitini yimɓe ton nyannde siwtorde.

³² Ɓe kayɗini dow no o ekkitinirta, ngam o ɗon wolwa bee baawɗe.

³³ Woodino goɗɗo feere nder suudu dewal man, o woodi ruuhuwol coɓŋgol, o fuɗɗi wookugo bee sawtu, o wi'i:

³⁴ “Hey, an Yeesu mo Nasaratu, ko ngiɗɗa bee amin? A wari ngam halkugo min na? Mi anndi ma: A Ceniiɗo, nelaaɗo Allah.”

³⁵ Yeesu ruggi ruuhuwol coɓŋgol go, wi'i: “Jeeɗa, wurta gorko oo.” Ngol do'i gorko go yeeso yimɓe fuu, nden ngol wurti, ngol acci mo, bilaa naawnere sam.

³⁶ Yimɓe fuu kayɗini, ɓe mbolwi hakkunde maɓɓe: “Haala irin kaye ka boo? O ɗon umra ruuhuuji coɓɗi bee baawɗe, ɗi ngurto goɗɗo!”

³⁷ Ɓe mbolwi haala Yeesu haa lesdi maajum fuu.

Yeesu yamɗitini nyawɓe ɗuuɗɓe

³⁸ Yeesu wurti suudu dewal Yahuudu'en, o yehi saare Simon. Esiraawo Simon debbo ɗon waali nyawu yontere naawnde, ɓe tori Yeesu o yamɗitina mo.

³⁹ O turi dow nyawɗo go, o telɓani yontere man, nde acci debbo go, nden o ummi law, o weerni ɓe.

⁴⁰ Haa mutki naaŋge, ɓen ɓe mari nyawɓe e torraaɓe nyawuji feere feereeji ngaddi ɓe haa Yeesu. O yowi juuɗe maako dow gooto gooto maɓɓe, o yamɗitini ɓe.

⁴¹ Ginnaaji ngurti yimɓe ɗuuɗɓe, ɗi ɗon ngooka bana ni'i: “An woni Ɓiɗɗo Allah!” Ammaa Yeesu ruggi ɗi bee caatal, o haɗi ɗi wolwugo boo, ngam kanji ɗi anndi kaŋko woni Almasiihu.

Yeesu waazi nder lesdi Yahudiya

⁴² Nde weeti, o wurti o dilli haa nokkuure ferewnde. Yimɓe puɗɗi tefugo mo. Nde ɓe tawi mo, ɓe ngiɗi haɗugo mo dillugo ngam taa o acca ɓe.

⁴³ Ammaa Yeesu wi'i ɓe: “Haani mi waazina kubaruwol belŋgol ngol laamu Allah haa gure goɗɗe boo, ngam man Allah neli yam.”

⁴⁴ O dilli, o waazi nder cuuɗi dewal Yahuudu'en nder lesdi Yahudiya.