Luka 24 - Fulfulde DC Bible

Ummitineeki Yeesu

¹ Nyalaade Alat fajiri cub, rewɓe go njehi haa yenaande, ɓe njahri uurle ɗe ɓe taaskuno.

² Ɓe tawi hayre maɓɓunoonde yenaande go, ɗon talli haa sera.

³ Ɓe nasti, ammaa ɓe tawaay ɓanndu Jawmiraawo Yeesu.

⁴ Nde ɓe ɗon cakli dow ɗum ko laati, ndaa worɓe ɗiɗo mbaŋgani ɓe, ɓe ɗon ɓorni limce ɗelkanɗe.

⁵ Rewɓe go kultori, kippi geese muuɗum'en, ammaa worɓe man mbi'i: “Koni ɗaɓɓititton geeto caka maayɓe?

⁶ O walaaɗon haa ɗo, o ummitake. Ciftore ko o wi'no on yaake o ɗonno lesdi Galiili:

⁷ Doole Ɓii-neɗɗo hokke haa juuɗe hakke'en, o ɓile haa leggal gaafaaŋgal, o ummito nyalaade tataɓre.”

⁸ Nden ɓe ciftori bolle Yeesu.

⁹ Ɓe acci yenaande, ɓe njehi anndingo kuuje ɗe'e fuu haa pukara'en sappo e ngo'o e yimɓe woɗɓe fuu.

¹⁰ Kamɓe ngoni: Mariyama mo Magdala e Yowanna e Mariyama daada Yaakuba e rewɓe woɗɓe wonduɓe bee maɓɓe.

¹¹ Pukara'en ndaari haala rewɓe bana meereeha, ɓe nuɗɗinaay ɓe.

¹² Ammaa Piyer ummi, doggi, yehi haa yenaande. O yurni, o yi'aay koo ɗume, sey leppi haa lesdi. Nden o hooti, o hayɗini dow ko laati.

Dow laawol Emmawus

¹³ Nyannde man nden pukara'en ɗiɗo ɗonno njaha haa wuro wi'eteeŋgo Emmawus, kilomeetir sappo e go'o bee Urusaliima.

¹⁴ Ɓe ɗonno ngeewta dow ko laati ɗo fuu.

¹⁵ Nde ɓe ɗon ngeewtida hakkunde maɓɓe, Yeesu bee hoore mum ɓaditi, ɗon yahda bee maɓɓe.

¹⁶ Ɓe ngi'i mo, ammaa woodi ko haɗi ɓe anndititgo mo.

¹⁷ Yeesu ƴami ɓe: “Dow ɗume ngeewtoton nder yahdu mon?” Nden ɓe ndari, ɓe suniiɓe.

¹⁸ Gooto maɓɓe bi'eteeɗo Keleyopas jaabi mo: “An feere ma woni koɗo nder Urusaliima ɗo mo anndaa ko laati balɗe ɗe'e na?”

¹⁹ O ƴami ɓe: “Ɗume laati?” Ɓe njaabi mo: “Ko laati dow Yeesu, mo Nasaratu, annabiijo baawɗo nder kuuɗe e bolle yeeso Allah e yeeso ummaatoore fuu,

²⁰ no mawɓe liman'en amin e mawɓe amin zammbori mo, ngam o hiite kiita maayde. Ɓe ɓili mo dow leggal gaafaaŋgal.

²¹ Min tammino kaŋko rimɗintano Isra'iila. Ammaa bee maajum fuu, hannde nyalaade tataɓre ko kuuje ɗe'e laatori.

²² Fahin rewɓe woɗɓe caka amin kayɗini min, ngam hannde subaha ɓe njehi haa yenaande,

²³ ɓe tawaay ɓanndu maako. Ɓe ngarti, ɓe mbi'i min malaa'ika'en mbaŋgani ɓe, mbi'i ɓe o geeto.

²⁴ Woɗɓe caka amin njehi haa yenaande, tawi kuuje man bana rewɓe mbi'i non, ammaa kaŋko, ɓe ngi'aay mo.”

²⁵ Nden Yeesu wi'i ɓe: “Hey onon sooya-faamu'en, neeɓa-ɓerɗe'en haa nuɗɗingo ko annabi'en mbi'i fuu!

²⁶ Naa doole Almasiihu torroro kuuje ɗe'e fuu hiddeko o nasta tedduŋgal maako na?”

²⁷ O fuɗɗiri diga defte Muusa haa defte annabi'en fuu, o faamtini ɓe ko winnda nder defte dow maako fuu.

²⁸ Nde ɓe ɓadake wuro ngo ɓe njahata, o waɗi bana o saaloto.

²⁹ Ammaa ɓe ɓilli mo bee wi'go: “Jooɗoda bee amin, ngam hiiri, jemma ɓadake.” O nasti ngam weerdugo bee maɓɓe.

³⁰ Nde o jooɗi bee maɓɓe haa o nyaama, o hoo'i tamseere, o barkiɗini nde, o yewi nde, o hokki ɓe.

³¹ Nden gite maɓɓe maɓɓiti, ɓe annditi mo, ammaa o majjiti gite maɓɓe.

³² Ɓe mbi'mbi'tiri caka maɓɓe: “Ɓerɗe meeɗen ngulaay nder meeɗen nde o wolwani en haa laawol, o faamtini en ko winnda nder defte go na?”

³³ Nder wakkati man nden ɓe ummi, ɓe lorti haa Urusaliima, ɓe tawti pukara'en sappo e go'o e wonduɓe bee mum'en ɗon mooɓti,

³⁴ ɓe ɗon mbi'a: “Fakat Jawmiraawo ummitake, o waŋgani Simon boo.”

³⁵ Kamɓe boo ɓe ngecci ɓe ko tawi ɓe haa laawol, no ɓe annditiri Yeesu wakkati o senndi tamseere boo.

Yeesu waŋgani pukara'en muuɗum

³⁶ Yaake nde ɓe ɗon mbolwa haala man, Yeesu bee hoore mum waŋgi, dari caka maɓɓe, wi'i ɓe: “Salaaman laatano on.”

³⁷ Pukara'en keewi kultoreeŋgol, ɓe tammi ɓe ngi'i ginnawol.

³⁸ Ammaa o wi'i ɓe: “Ngam ɗume on ɗon cakli? Ngam ɗume sekuye heewi ɓerɗe mooɗon?

³⁹ Ndaare juuɗe am e kosɗe am, ɗum min. Meemeeɗam, ndaare, ngam ruuhu walaa kusel e i'e bana ngi'oton mi mari.”

⁴⁰ Nde o wi'i ɓe ɗum, o holli ɓe juuɗe maako e kosɗe maako.

⁴¹ Nder seyo e hayɗinaare maɓɓe, ɓe mbaawaay nuɗɗingo tawon. Nden o wi'i ɓe: “On ngoodi nyaamdu haa ɗo na?”

⁴² Ɓe ngaddani mo taƴre liiŋgu ca'aaŋgu.

⁴³ O hoo'i ɗum, o nyaami yeeso maɓɓe.

⁴⁴ Nden o wi'i: “Ɗum ko mbi'no mi on yaake mi ɗonno bee mooɗon tawon: Doole ko winnda dow am nder tawreeta Muusa e defte annabi'en e Jabuura fuu hebbitine.”

⁴⁵ Nden o maɓɓitani ɓe faamu haa ɓe paama defte,

⁴⁶ o wi'i ɓe: “Bana nii ɗum winnda: Almasiihu torroto, o ummititto diga maayde nyalaade tataɓre,

⁴⁷ bee innde maako ɓe ngaazinan yimɓe ummaatooje fuu haa ɓe tuuba e ɓe keɓa yaafuye hakkeeji, ɗum fuɗɗa haa Urusaliima.

⁴⁸ Onon ngoni seedooɓe kuuje ɗe'e.

⁴⁹ Ndaa, mi neldanan on mo Baabiraawo am iini. Njooɗe nder berniwol haa to on keɓi baawɗe iwɗe diga dow.”

Eeŋgineeki Yeesu

⁵⁰ Yeesu yahri ɓe yaasi berniwol, heedi Baytaniya. O ɓaŋgti juuɗe maako, o barkiɗini ɓe.

⁵¹ Yaake o ɗon barkiɗina ɓe, o senndiri bee maɓɓe, o eeŋgi haa asama.

⁵² Kamɓe boo, ɓe cujidani mo, ɓaawo man ɓe kooti haa Urusaliima bee seyo maŋngo.

⁵³ Ɓe tokki yahugo haykaliiru tum, ngam maŋgtugo Allah.