Luka 19 - Fulfulde DC Bible

Yeesu e Jakayus

¹ Yeesu nasti Yeriko, saali nder berniwol.

² Ndaa, goɗɗo bi'eteeɗo Jakayus, mawɗo jomnooɓe ɗon ton e o diskuɗo.

³ O tefi yi'ugo moy woni Yeesu, ammaa o waawaay ngam daliila mooɓre, ngam o dammuɗo.

⁴ O doggi haa yeeso, o wa'i dundeehi ngam haa o yi'a mo, ngam Yeesu saaloto ton.

⁵ Nde Yeesu yotti haa nokkuure man, o tijji, o wi'i mo: “Jakayus, yaawɗa jippa, ngam hannde sey mi weera haa saare maaɗa.”

⁶ Jakayus yaawɗi jippi, jaɓɓi mo bee seyo.

⁷ Nde yimɓe ngi'i ɗum, ɓe fuu ɓe ngurŋgurti, ɓe mbi'i: “O dilli weerugo haa goɗɗo hakkeejo.”

⁸ Ammaa Jakayus dari yeeso Jawmiraawo, wi'i: “Jawmiraawo, mi hokkan reeta jawdi am haa talaka'en. To woodi mo mi hoosino ɗum huunde bee faasikaare, mi lornanan mo ɗum cowi nayi.”

⁹ Yeesu wi'i mo: “Kisndam nasti nder saare nde'e hannde, ngam kaŋko boo o ɓii Ibrahiima.

¹⁰ Ngam Ɓii-neɗɗo wari ɗaɓɓititgo, hisnugo ko majji.”

Balndol dow suleyje kaŋŋeeri

¹¹ Yimɓe ɗon nana bolle Yeesu. Nde o ɗon ɓadito Urusaliima, o wolwani ɓe balndol feere ngam ɓe tammi no laamu Allah waranno nder wakkati man nden.

¹² O wi'i: “Goɗɗo tedda-asŋgoljo dilli lesdi ndaayiindi ngam o heɓana hoore maako laamu, nden o loro.

¹³ O ewni sappo nder suka'en maako, o hokki koo moy maɓɓe suleyre kaŋŋeeri ɗuuɗa-samanre, o wi'i ɓe: Mbaɗe filu bee maaje haa to mi warti.

¹⁴ Ammaa yimɓe lesdi maako nganyi mo, ɓe neli nelaaɓe ɓaawo maako ngam ɓe mbi'a: Min ngiɗaa gorko oo laamano min.

¹⁵ Nde ɓe laamini mo, o warti lesdi maako, o ewni suka'en ɓe o hokkuno ceede go ngam anndugo riba ka koo moy maɓɓe heɓi.

¹⁶ Arano wari, wi'i: Jaagorɗo, suleyre maaɗa waddi suleyje goɗɗe sappo.

¹⁷ Jaagorɗo wi'i mo: Booɗɗum, a suka booɗɗo! A huuwi kuugal pamaral bee hoolaare, ngam maajum laamana berniiji sappo!

¹⁸ Ɗiɗaɓo wari, wi'i: Jaagorɗo, suleyre maaɗa waddi suleyje goɗɗe jowi.

¹⁹ O wi'i mo: An boo laamana berniiji jowi!

²⁰ Goɗɗo boo wari, wi'i: Jaagorɗo, ndaa suleyre maaɗa, mi sigi nde nder leppol,

²¹ ngam mi huli ma, ngam a goɗɗo caatuɗo, a hoosan ko a jo'inaay, a sodan ko a aawaay.

²² Jaagorɗo wi'i mo: Mi hiitete dow bolle ma, suka kalluɗo! A anndi min mi goɗɗo caatuɗo, mi hoosan ko mi jo'inaay, mi sodan ko mi aawaay.

²³ Ngam ɗume a jo'inaay ceede am haa sigordu ceede, to mi warti mi heɓtanno ɗe bee riba?

²⁴ O wolwani wonɓe ton: Njaɓte mo suleyre man, ndokke nde marɗo suleyje sappo go! [

²⁵ Ɓe mbi'i mo: Jaagorɗo, o woodi suleyje sappo timmi.]

²⁶ Mi ɗon wi'a on, ngam marɗo huunde, ɓe ɓesdanan mo, ammaa mo walaa koo ɗume, ɓe koocan koo peetum maako.

²⁷ Konne'en am ɓe'e, ɓe ngiɗaano mi laamo dow maɓɓe go, ngadde ɓe, mbare ɓe yeeso am!”

Yeesu nasti Urusaliima

²⁸ Ɓaawo bolle ɗe'e, Yeesu ardi yimɓe, dilli Urusaliima.

²⁹ Nde o ɓadake Baytifaaji e Baytaniya, kommbi hooseere wi'eteende Hooseere Jaytunje, Yeesu neli pukara'en muuɗum ɗiɗo,

³⁰ wi'i ɓe: “Njehe haa wuro yeeso too. To on nasti ngo, on tawan wamnde molde haɓɓaande, nde goɗɗo meeɗaay wa'aago. Piiste nde, ngaddaneeɗam.

³¹ To goɗɗo ƴami on koni piistoton nde? Njaabe mo: Jawmiraawo woodi haaje maare.”

³² Nelaaɓe njehi, tawi kuuje man fuu bana Yeesu wi'no ɓe.

³³ Nde ɓe ɗon piista wamnde, jawmiire wi'i ɓe: “Ngam ɗume piistoton wamnde?”

³⁴ Ɓe njaabi: “Jawmiraawo woodi haaje maare.”

³⁵ Ɓe ngaddi wamnde go haa Yeesu, ɓe caɓɓi limce maɓɓe dow maare, ɓe mba'ini Yeesu.

³⁶ Nde o fuɗɗi yahugo, yimɓe mbe'iti limce muuɗum'en dow laawol.

³⁷ Nde o ɗon ɓadito Urusaliima heedi diirtorde Hooseere Jaytunje, mooɓgal pukara'en fuu ceyi, ɓe puɗɗi maŋgtugo Allah bee sawtu, ngam kaayeefiiji ɗi ɓe ngi'i fuu.

³⁸ Ɓe mbi'i: “Barka laatano laamiiɗo garanɗo bee innde Jawmiraawo! Salaaman haa asama, tedduŋgal haa Allah Ɓaŋiiɗo!”

³⁹ Farisa'en woɗɓe diga caka yimɓe mbolwani Yeesu: “Moodibbo, telɓan pukara'en maaɗa njeeɗo!”

⁴⁰ Yeesu jaabi: “Mi ɗon wi'a on, to kamɓe ɓe njeeɗake, kaa'e ngookan!”

Yeesu woyi Urusaliima

⁴¹ Nde Yeesu ɓaditi berniwol, o yi'i ngol, o woyi daliila maagol,

⁴² o wi'i: “Mi yiɗi a anndano an boo ko woni salaaman maaɗa hanndeere nde'e! Ammaa jonta ɗum suuɗaama haa gite maaɗa.

⁴³ Nyalɗe ngarante, haa konne'en ma taaro ma bee balmi, ɓe kippete, ɓe ɓiɗɗete bakeeje fuu.

⁴⁴ Ɓe ndo'ete, an bee ɓikkoy maaɗa. Ɓe accataa hayre dow hayre haa maaɗa, ngam a annditaay saa'iire nde Allah wari wallugo ma!”

Yeesu nder haykaliiru

⁴⁵ Nden Yeesu nasti haykaliiru, o fuɗɗi faartugo sorrooɓe,

⁴⁶ o wi'i ɓe: “Ndaa ko winnda haa Deftere: Suudu am laatoto suudu waɗugo do'a, ammaa onon on laatini ndu lowol fasooɓe.”

⁴⁷ O ɗon ekkitina nder haykaliiru nyalaade fuu. Mawɓe liman'en e moodiɓɓe tawreeta e ardiiɓe yimɓe ɗonno tefa mbarugo mo.

⁴⁸ Ammaa ɓe anndaa ɗume ɓe mbaɗata, ngam yimɓe fuu ɗon cuklani nanugo mo.