Limle 25 - Fulfulde DC Bible

Isra'iila'en haa Pe'or

¹ Isra'iila'en caŋngini haa Sittim. Nden worɓe maɓɓe puɗɗi waɗugo daakaareeku bee rewɓe Mo'abi'en.

² Rewɓe ɓe'e ewni Isra'iila'en haa kirseteeɗi ɗi Mo'abi'en lii'ani ɗowanteeɓe muuɗum'en. Isra'iila'en nyaamdi bee maɓɓe, cujidani ɗowanteeɓe maɓɓe.

³ Bana non Isra'iila'en ɗakkotiri bee Ba'al-Pe'or. Ɗum ummini tikkere Jawmiraawo dow maɓɓe.

⁴ Nden Jawmiraawo wi'i Muusa: “Hoo'u hoore'en ummaatoore fuu, ɓil ɓe yeeso am dow leɗɗe bee baŋguɗum, haa mi acca tikkango Isra'iila!”

⁵ Muusa umri hiitooɓe ummaatoore Isra'iila: “Koo moy mooɗon mbara yimɓe mum ɗakkotirɓe bee Ba'al-Pe'or.”

⁶ Woodi Isra'iilaajo feere wardi bee Mediyaniijo debbo caka deerɗiraaɓe muuɗum. Muusa e jama'aare fuu ngi'i ɗum yaake ɓe ɗonno mboya haa dammugal laymaaru fottirde.

⁷ Pinehas ɓii Eli'azaaru ɓii Haruna limanjo yi'i ɗum, ummi, wurti jama'aare, hoo'i labbo mum,

⁸ tokki gorko e debbo nder suudu, sumpiti ɓe deeɗi, ɓe ɗiɗo fuu. Bana non o haɗiri masiibo puɗɗinooɗo mbarugo Isra'iila'en.

⁹ Ammaa masiibo man mbarno yimɓe ujine noogas e nayo (24.000).

¹⁰ Jawmiraawo wi'i Muusa:

¹¹ “Pinehas ɓii Eli'azaaru ɓii Haruna limanjo feewtini tikkere am dow Isra'iila'en, o waŋgini kaajal am dow maɓɓe. Asee boo tikkere am haajunde halkidaay ɓe fuu.

¹² Ngam maajum yeccu mo mi haɓɓan alkawal salaaman bee maako.

¹³ Alkawal man tabitinan limanku maako e limanku danygol maako haa foroy ngam o waŋginani yam yiide maako, o waŋginiri nde bee tikkere maako haajunde dow Isra'iila'en, o heɓni ɓe yaafuye boo.”

¹⁴ Innde Isra'iilaajo mbaraaɗo hawtaade bee Mediyaniijo debbo go, Zimiri. O ɓii Salu, baaba-saare nder lenyol Sime'on.

¹⁵ Innde debbo boo, Kojobi ɓii Cuuru. Baaba maako o hooreejo asli Mediyan'en goɗɗi.

¹⁶ Jawmiraawo umri Muusa:

¹⁷ “Ukkane Mediyan'en, piye ɓe!

¹⁸ Ngam ɓe laati konne'en mooɗon, ɓe nastini on estooji, ɓe zammbi on bee haala Pe'or, non boo bee haala Kojobi, ɓii hooreejo Mediyan, banndiraawo maɓɓe debbo mbaraaɗo nyalaade masiibo ngam daliila Pe'or.”

Limtuki Isra'iila'en

¹⁹ Ɓaawo masiibo oo,