Jabuura 79 - Fulfulde DC Bible

Yimre boyki ngam gibbinki Urusaliima

¹ Yimre Asaf. Yaa Allah, heefeerɓe nasti lesdi maral ma, coɓni haykaliiru ma seniindu, ngartiri Urusaliima winnde.

² Ɓe nyaamni colli e kuuje ladde ɓalli jagganiiɓe ma hoolaaɓe.

³ Ɓe ndufi ƴiiƴam yimɓe ma bana ndiyam, ɗam ili nder taarde Urusaliima fuu, walaa mo uwi ɓe.

⁴ Yimɓe ummaatooje taariiɓe min ɗon kuɗa min, ɗon njanca min, ɗon njawo min.

⁵ Yaa Jawmiraawo, ndey accata ɓernango min? Ndey ɓernuki kaajal ma accata wulugo bana yiite?

⁶ Ruf ɓernuki ma dow heefeerɓe ɓe anndaa ma, dow laamuuji ɗi ewnataako innde ma.

⁷ Kamɓe ɓe mbari yimɓe Yaakubu, ɓe mbili nokkuuje haa ɓe njooɗi.

⁸ Taa liman min aybeeji kaakiraaɓe amin! Ammaa hinna min jonta, ngam min toskaaɓe masin!

⁹ Wallu min, yaa Allah, Kisnoowo min, ngam daliila innde ma teddunde. Hisnu min, yaafa hakkeeji amin, ngam daliila innde ma.

¹⁰ Ngam taa heefeerɓe ƴama min: “Toy Allah mon kadi?” Accu min ngi'a no a waatorto ƴiiƴam jagganiiɓe ma caka heefeerɓe.

¹¹ Uumaali haɓɓaaɓe njotto ma, bee baawɗe juŋngo ma hisnu mbareteeɓe.

¹² Ummaatooje taariiɗe min kuɗi ma, yaa Jawmiraawo, warja ɓe ɗum cowi joweeɗiɗi.

¹³ Ammaa minin min yimɓe ma, tokkere ma, min ngettete haa foroy, min ngeynan maŋgtooje ma diga yidere haa yidere.