Jabuura 28 - Fulfulde DC Bible

Tornde ngam ballal, yettoore ngam jaawaabu

¹ Yimre Daawuda. Yaa Jawmiraawo, mi ɗon toro ma. An tapaare hisrude am, taa sukku noppi ma! To a jeeɗake, mi laatoto bana gooto caka nastanɓe ngaska lugguka.

² Nan torɗe am to mi wookani ma ngam tefugo ballal, to mi ɓaŋgti juuɗe am gal nokkuure ma ɓurnde senaago!

³ Taa halkam hawtaade bee halluɓe e waɗooɓe zunuuba! Ɓe ɗon mbolwana heeddiɗɗiraaɓe maɓɓe bolle belɗe, ammaa halleende heewi ɓerɗe maɓɓe.

⁴ Hiitu ɓe fodde kuuɗe maɓɓe kalluɗe fuu! Hiitu ɓe fodde kuuɗe ɗe juuɗe maɓɓe kuuwi! Hokku ɓe ngeenaari kuuɗe maɓɓe!

⁵ Ngam kamɓe ɓe paalataa kuuɗe Jawmiraawo e ko juuɗe maako mbaɗi. Ngam maajum o do'an ɓe, o ummintaa ɓe sam.

⁶ Yettoore laatano Jawmiraawo, ngam o nani torɗe am!

⁷ Jawmiraawo woni semmbe am e wawarde am, ɓernde am ɗon hoolo mo. O walli yam, ɓernde am ɗon seyo, mi yettan mo bee yimre am.

⁸ Jawmiraawo woni semmbe ummaatoore mum, kaŋko woni hisrude hisnannde laamiiɗo mo o suɓi ɗum.

⁹ Hisnu ummaatoore ma, barkiɗin yimɓe ɓe marɗa! Laata gaynaako maɓɓe e balloowo maɓɓe haa foroy!