Jabuura 135 - Fulfulde DC Bible

Maŋngu Jawmiraawo

¹ Halleluya! Maŋgte innde Jawmiraawo! Maŋgte mo, onon jagganooɓe Jawmiraawo,

² darotooɓe nder suudu maako, haa dalde haykaliiru Allah meeɗen.

³ Halleluya! Jawmiraawo o booɗɗo! Ngimane innde maako, ngam nde welnde!

⁴ Jawmiraawo suɓani hoore mum Yaakubu, yimɓe Isra'iila ɓe yiɗaaɓe maako.

⁵ Mi anndi Jawmiraawo men o mawɗo, o ɓuri ɗowanteeɓe fuu mawnugo.

⁶ O waɗan ko o yiɗi fuu, haa asama e dow lesdi, nder beeli e nder ndiyamji lugguɗi fuu.

⁷ O waddan duule diga keerol duniyaaru, o sakkinan ma'e, ngam toɓnugo iyeele, o wurtinan henndu diga cigorɗi maako.

⁸ Haa Misra o mbari afɓe yimɓe e afi dabbaaji fuu.

⁹ O waɗi alaamaaji e kaayeefiiji ton ngam hiitaago Firawna e saraaki'en mum.

¹⁰ O halki ummaatooje ɗuuɗɗe, o mbari laamiiɓe semmbiɗɓe:

¹¹ Sihon, laamiiɗo Amoori'en e Ook, laamiiɗo Baasan, non boo laamiiɓe Kanaana fuu.

¹² O hokki lesɗe maɓɓe haa juuɗe yimɓe maako, ɗe laati maral Isra'iila ummaatoore maako.

¹³ Yaa Jawmiraawo, innde ma duumoto, yimɓe ciftorte diga yidere haa yidere!

¹⁴ Ngam a gooŋɗinan ummaatoore ma, a de'itinan maccuɓe ma.

¹⁵ Labbi ummaatooje ɗi kuuwraama cardi e kaŋŋeeri, juuɗe yimɓe mbaɗi ɗi.

¹⁶ Ɗi ngoodi kunnduɗe, ammaa ɗi mbolwataa, ɗi ngoodi gite, ammaa ɗi ngi'ataa,

¹⁷ ɗi ngoodi noppi, ammaa ɗi nanataa, walaa poofɗe nder kunnduɗe maaji.

¹⁸ Waɗɓe ɗi nanndi bee maaji, non boo hooliiɓe ɗi fuu.

¹⁹ Onon yimɓe Isra'iila, ngette Jawmiraawo! Ngette mo, onon yimɓe danygol Haruna!

²⁰ Onon yimɓe lenyol Lewi, ngette Jawmiraawo! Ngette mo, onon hulɓe mo!

²¹ Yettoore laatano Jawmiraawo jooɗiiɗo haa Urusaliima diga Siyona! Halleluya!