Jabuura 10 - Fulfulde DC Bible

Tornde toonyaaɗo

¹ Yaa Jawmiraawo, ngam ɗume ndaayiiɗa? Ngam ɗume cuuɗotooɗa nder wakkatiiji ɓillaare?

² Kalluɗo mawniti, ɗon toonyo laafuɗo. Accu dabareeji maako ndo'a mo.

³ Kalluɗo ɗon mantoro suunooji mum. Cuunaaɗo riba ɗon hallina Jawmiraawo, ɗon yawo mo.

⁴ Kalluɗo mawniti, ɗon wi'a: “Walaa mo hiitoto yam, Allah walaa!” Bana nii numooji kalluɗo mba'i.

⁵ Ko o waɗata fuu, timman jam. Kiitaaji ma njottataa mo, o ɗon jala konne'en maako fuu.

⁶ O ɗon numa nder ɓernde maako: “Walaa ko dimmbintammi, sarru heɓataa yam sam.”

⁷ Hunnduko maako heewi naalooje e pewe e toonyaare, ɗemŋgal maako ɗon wolwa haala halleende e sarru.

⁸ O nyukkoto kommbi gure, o waaltano yimɓe ɓe ngalaa aybe, haa o mbara ɓe. Gite maako ɗon njurno tampuɓe,

⁹ o ɗon waaltano laafuɓe nder nyukkorde bana mbarooga nder lowol maaga. O ɗon waaltano laafuɓe, haa o naŋnga ɓe bee tuuforgol maako.

¹⁰ O ɗon roŋŋino, leesna hoore maako, tampuɓe ɗon ndo'o les baawɗe maako.

¹¹ Kalluɗo ɗon numa nder ɓernde mum: “Allah yejjiti! O ɗon wiirna yeeso maako, o yi'ataa yam sam.”

¹² Umma, yaa Jawmiraawo, ɓaŋgtu juŋngo ma! Allah am, taa yejjitit toskaaɓe.

¹³ Koni kalluɗo yawoto ma? Koni o numata a hiitataako mo?

¹⁴ A yi'i ɗum, ngam a ɗon laara torra e bone yimɓe, a taaskake wallugo ɓe. Tampuɗo halfinan hoore mum haa juŋngo ma, ngam an woni balloowo atiime'en fuu.

¹⁵ Yew juŋngo kalluɗo, baɗoowo zunuuba, hiita halleende maako, taa ɗum meeta waŋgugo.

¹⁶ Jawmiraawo woni laamiiɗo haa abada abadin, heefeerɓe timmi diga lesdi maako.

¹⁷ A ɗon nana tornde toskaaɓe, yaa Jawmiraawo, a ɗon tiɗɗina ɓerɗe maɓɓe, a ɗon heɗito ɓe,

¹⁸ ngam gooŋɗingo atiimeejo e toonyaaɗo, ngam taa neɗɗo mbulwuldiijo meeta hulnugo goɗɗo!