Ibraniŋke'en 11 - Fulfulde DC Bible

Nuɗɗinki

¹ Nuɗɗinki ɗum hoolɗingo kuuje ɗe goɗɗo tammoto, ɗum gooŋɗingo kuuje ɗe ngi'aaka tawon.

² Bee nuɗɗinki ki'i yimɓe zamanuuji ɓooymaaji keɓi yerduye Allah.

³ Bee nuɗɗinki en ɗon paama no koo ɗume fuu tagraama bee wolde Allah. Ko en ngi'ata fuu, ɗum iwi haa ko yi'ataake.

⁴ Bee nuɗɗinki, Habila hokki Allah dokkal ɓurŋgal ngal Kayinu saman piw. Bee maagal Allah adilini mo, Allah bee hoore muuɗum seedi o jaɓi dokkal maako. Koo nde o maayi, o ɗon tokko wolwugo bee nuɗɗinki maako.

⁵ Bee nuɗɗinki, Anuhu eeŋginaama, o maayaay. Walaa mo tawi mo, ngam Allah eeŋgini mo. Deftere wi'i, diga o eeŋginaaka, o heɓi yerduye Allah ngam o fottani mo.

⁶ Ngam bilaa nuɗɗinki, goɗɗo waawataa fottango Allah. Mo ɓadititto Allah, sey nuɗɗina Allah ɗon, o ɗon warjo yiɗɓe ɗakkotirgo bee maako boo.

⁷ Bee nuɗɗinki, Nuuhu nani deentinki Allah dow ko tammi wargo koo nde o yi'aay ɗum tawon. O huli Allah, o waɗi koommbowal ngam hisnugo yimɓe saare maako. Daliila nuɗɗinki man, yimɓe duniyaaru kiitaama, o laati donoowo adilaaku, o heɓi ɗum bee nuɗɗinki maako.

⁸ Bee nuɗɗinki, Ibrahiima ɗowtani Allah nde Allah ewni mo o yaha haa lesdi ndi Allah wi'no hokkanno mo, o rona. O dilli bilaa anndugo haa o yahata.

⁹ Bee nuɗɗinki, o jooɗi bana jananno nder lesdi ndi Allah iinani mo. O jooɗi nder laymaaji, kaŋko e Isiyaaku e Yaakubu, rondooɓe iinawol Allah bana maako.

¹⁰ Ngam Ibrahiima ɗonno reena berniwol marŋgol caɓɓaaje cemmbiɗɗe ngol Allah diidi, mahi.

¹¹ Bee nuɗɗinki, Saraatu boo waawi danyugo ɓiŋngel koo nde o dimaro, o naywuɗo boo. Ngam o hooli Allah waɗan ko o iini.

¹² Ngam maajum bee goɗɗo gooto, gonɗo daande maayde, waato Ibrahiima, yimɓe ɗuuɗɓe bana koode asama malla bana njaareendi maayo ndi limataako, ndanyaama.

¹³ Yimɓe ɓe'e fuu maayi, ɓe ɗon njogi nuɗɗinki maɓɓe, bilaa heɓugo kuuje iinaaɗe ɗe'e, ammaa diga daayiiɗum ɓe eewi ɗe, ɓe ceyori ɗe. Ɓe mbi'i ɓe jananɓe e hoɗɓe haa duniyaaru.

¹⁴ Wi'ɓe bana nii ɗon mbaŋgina bee laaɓɗum ɓe ɗon tefa lesdi halal maɓɓe.

¹⁵ To ɓe numno dow lesdi ndi ɓe acci, ɓe keɓanno loraago ton.

¹⁶ Ammaa fakat ɓe ngenwi lesdi ɓurdundi wooɗugo, waato asama. Ngam maajum Allah semtiraay ewneego Allah maɓɓe, ngam o taaskani ɓe berniwol.

¹⁷ Bee nuɗɗinki, Ibrahiima lii'i ɓiɗɗo muuɗum Isiyaaku nde Allah foondi mo. Ɗum ɓiɗɗo maako bajjo o lii'i. Koo nde Allah iinanino mo danygol.

¹⁸ Allah wi'no mo: “Bee Isiyaaku keɓrata danygol ma.”

¹⁹ Ibrahiima numi Allah baawɗo ummitinan maayɗo caka maayɓe. Ngam maajum o heɓti ɓiɗɗo maako, bana Allah ummitini mo diga maayde.

²⁰ Bee nuɗɗinki, Isiyaaku barkiɗini Yaakubu e Isuwa ngam balɗe garanɗe.

²¹ Bee nuɗɗinki, Yaakubu barkiɗini ɓiɓɓe Yusufu saa'i o ɓadi maayugo. O tuugi sawru maako, o sujidani Allah.

²² Bee nuɗɗinki, Yusufu nde ɓadake maayugo, o wolwi haala gurtaaki Isra'iila'en diga Misra, o tinndini ɓe ko ɓe mbaɗata bee i'e maako.

²³ Bee nuɗɗinki, saaro'en Muusa kulaay luutugo umroore laamiiɗo, ɓe nyukkini mo lebbi tati ɓaawo danyeeki maako ngam ɓe ngi'i o ɓiŋngel booɗŋgel.

²⁴ Bee nuɗɗinki, Muusa, nde mawni, o sali ewneego ɓii ɓiɗɗo Firawna debbo.

²⁵ O ɓuri yiɗugo o yarda bone bee ummaatoore Allah dow mettaago seyo nder hakkeeji wakkati seɗɗa.

²⁶ Yaweego bana Almasiihu ɓuri ndesaaji Misra fuu saman ngam maako, ngam numooji maako ɗon tiiti mbarjaari nder garanɗum.

²⁷ Bee nuɗɗinki, Muusa hulaay tikkere laamiiɗo, ammaa o wurti Misra. O dimmbaaki sam, bana o laari Allah mo yi'ataake.

²⁸ Bee nuɗɗinki, o waɗi juulde Paska, o umri Isra'iila'en ɓe mbicca ƴiiƴam dow dammuɗe, ngam taa malaa'ikaajo maayde mbara ɓiɓɓe maɓɓe afɓe.

²⁹ Bee nuɗɗinki, Isra'iila'en eeri maayo Maaliya bana dow lesdi njoorndi. Maayo moɗi Misra'en nde ɓe poondi eeraago ngo.

³⁰ Bee nuɗɗinki, Isra'iila'en ngibbini mahol wuro Yeriko ɓaawo taaraago ngo balɗe joweeɗiɗi.

³¹ Bee nuɗɗinki, Rahab, debbo daakaareejo, jaɓɓi Isra'iila'en horooɓe bee seyo. Ngam man o mbardaaka bee woɗɓe ɓe ɗowtanaaki Allah.

³² Ɗume ɓesdanmi limtugo? Ngam wakkati he'ataa yam to mi wolwan haala Gedeyon, Barak, Samson, Yefta, Daawuda, Samuyila e annabi'en.

³³ Ɓe fuu bee nuɗɗinki ɓe njaali laamuuji, ɓe mbaɗi adilaaku, ɓe keɓi iinaaji kuuje ɗe Allah wi'no hokkan ɓe, ɓe cukki kunnduɗe barooɗe,

³⁴ ɓe nyifi yiite wulŋge jaw, ɓe kisi mbareego bee kaafahi. Ɓe tampi, ammaa ɓaawoɗon ɓe keɓi semmbe. Ɓe laati waawɓe nder konu, ɓe parti jananɓe honooɓe.

³⁵ Bee nuɗɗinki, rewɓe keɓti maayɓe muuɗum'en, waato ɓe ummitinaama, ɓe ngeeɗiti fahin. Woɗɓe maayi nder torra, ɓe cali rimɗineego, ngam haa ɓe keɓa ummitineego haa ngeendam ɓurɗam wooɗugo.

³⁶ Woɗɓe njancaama, ɓoccaama, woɗɓe boo kaɓɓaama, cakkinaama nder fursina,

³⁷ ɓe piɗaama bee kaa'e haa ɓe maayi, ɓalli maɓɓe ta'aama geɓe ɗiɗi, ɓe mbaraama bee kaafahi. Ɓe ngiili ɓe ɗon ɓorni lare be'i e baali, ɓe talkiɗi, ɓe torraama, ɓe toonyaama.

³⁸ Duniyaaru haananaay ɓe. Ɓe ngiili nder laɗɗe hamaadaaje e kooseeje bana riiwaaɓe, ɓe njooɗi nder lowi e nder gasɗe.

³⁹ Yimɓe ɓe'e fuu ɓe nuɗɗini Allah, ɓe keɓi yerduye maako. Ammaa ɓe keɓaay ko Allah iinani ɓe,

⁴⁰ ngam o waɗi anniya hokkugo en ko ɓuri wooɗugo. Allah yiɗaa ɓe laato timmididɓe, sonaa hawtaade bee meeɗen.