Hose'a 8 - Fulfulde DC Bible

Feloore ngam njaggu labbi nder Isra'iila

¹ Jawmiraawo wi'i: “Fuufu luwal konu! Konne'en ɗon ukkano lesdi am bana jigaawal, ngam ɓe ɗowtanaaki alkawal am, ɓe tuurtani tawreeta am.

² Ɓe ɗon mboyanammi: Yaa Allah, minin Isra'iila'en min anndi ma!

³ Ammaa Isra'iila'en ngudini mbooɗeeŋga. Sey konne'en ukkano ɓe!

⁴ Ɓe laamini laamiiɓe, ammaa naa dow umroore am. Ɓe ndarni ardiiɓe bilaa anndaaŋgal am. Ɓe mbaɗi labbi bee cardi e kaŋŋeeri maɓɓe. Bana nii Isra'iila ɗaɓɓiri halkere maɓɓe.

⁵ An Samariya, mi wudini gaggel ma! Tikkere am ɗon saati dow yimɓe ma. Haa ndey ɓe tokkoto soɓugo bana non?

⁶ Gaggel man iwi haa Isra'iila, baɗoowo sanaa'a waɗi ɗum. Ngel laataaki Allah. Ngam man, gaggel Samariya sampititto.

⁷ Nde nii ɓe aawi henndu, ɓe tammi sodugo duluuru. Koo ƴommbe alkamaari maɓɓe mbaɗataa cammeeje. To ɗe mbaɗi boo, ɗe mbaɗataa kuroori. To kuroori waɗi boo, jananɓe nyaaman ndi.

⁸ Konne'en moɗi Isra'iila. Ummaatooje ɗon ndaara Isra'iila jonta bana huunde nde koo moy yiɗaa.

⁹ Ɓe njehi haa Assuura, bana wamnde ladde feere maare. Efrayim soodi waaye'en.

¹⁰ Koo nde ɓe ndokki ummaatooje caahuuji ɗuuɗɗi, jonta mi hawtan ɓe. Yeeso seɗɗa ɓe njaran bone daliila doŋngal laamiiɗo laamlaamɓe.

¹¹ Efrayim ɗuɗɗini kirsirɗe ngam ittuki hakke. Ammaa ɗe laatanake mo daliila waɗugo hakke!

¹² Koo to mi winndani ɓe umrooje am ujineeje, kamɓe ɓe ndaaran ɗe bana huunde janannde.

¹³ Ɓe lii'ani yam dokke kirseteeɗi ngam haa ɓe nyaama kusel man, ammaa min Jawmiraawo mi yerdataako ɓe. Jonta ciftoranmi aybeeji maɓɓe, mi hiitoto hakkeeji maɓɓe. Ɓe loroto haa Misra!

¹⁴ Isra'iila yejjiti tagɗo ɗum, nyiɓi cuuɗi laamorɗe. Yahuuda boo ɗuɗɗini berniiji cemmbiɗɗi. Mi nelan yiite nder berniiji maɓɓe, nge nyaaman laamorɗe maɓɓe.”