Haggay 1 - Fulfulde DC Bible

Umroore nyiɓtaago haykaliiru

¹ Nder nduuɓu laamiiɗo Dariyus ɗiɗaɓu, lewru joweegooru, nyannde go'oore maaru, Jawmiraawo wolwani Zorobaabila ɓii Salatiyel, ngomna dow Yahuuda e Yosuwa ɓii Yocadak, hooreejo liman'en, bee hunnduko annabi Haggay. O wi'i:

² “Ndaa nii Jawmiraawo honooɓe asama wi'i: Ummaatoore nde'e ɗon wi'a, wakkati nyiɓtaago haykaliiru Jawmiraawo waɗaay tawon.”

³ Nden Jawmiraawo wi'i bee hunnduko annabi Haggay:

⁴ “Ɗum saa'i ngam mooɗon haa njooɗooɗon nder cuuɗi ɓasaaɗi leɗɗe, asee boo haykaliiru am ɗon wili na?

⁵ Jonta ndaa nii Jawmiraawo honooɓe asama wi'i: Numte kuuɗe mon!

⁶ On aawi ɗuuɗɗum, ammaa on codi pamarum. On nyaami, ammaa on kaaraay. On njari, ammaa ɗam ittaay suuno mooɗon. On ɗon ɓorni, ammaa on ɗon maata jaaŋgol. Kuuwanɗo ngam ngeenaari ɗon jaɓa rufa ndi nder booro sumpitaaŋgo.

⁷ Ndaa nii Jawmiraawo honooɓe asama wi'i: Numte kuuɗe mon!

⁸ Mba'e dow hooseere, ngadde leɗɗe, nyiɓte haykaliiru. Kanjum seynatammi, ɗum teddintam boo.

⁹ On tammi on keɓan ɗuuɗɗum, ammaa ndaa, on keɓi pamarum. Nde on koori ɗum haa saare, mi wifti ɗum. Ngam ɗume kuuwmi ɗum? Ngam haykaliiru am laatiindu bille, saa'i on ɗon cukli bee cuuɗi mooɗon.

¹⁰ Ngam maajum asamanji njogitani on saawawre, lesdi boo jogitani on ƴaamle.

¹¹ Mi umri hokkere waɗa dow lesdi e kooseeje e dow demetirle e ko lesdi fuɗnata fuu. Ngam daliila hokkere man, inaboojam e nebbam pamɗiti, yimɓe e dabbaaji boo njari bone, kuuɗe ɗe kuuwɗon fuu mbonni.”

¹² Zorobaabila ɓii Salatiyel e Yosuwa ɓii Yocadak, hooreejo liman'en e yimɓe luttuɓe nder ummaatoore fuu nanani Jawmiraawo Allah muuɗum'en, waato bolle ɗe Jawmiraawo Allah maɓɓe neli annabi Haggay wolwango ɓe. Ummaatoore fuu ɗowtani Jawmiraawo.

¹³ Nden Haggay, nelaaɗo Jawmiraawo yecci yimɓe ummaatoore ni'i: “Jawmiraawo wi'i: Mi ɗon wondi bee mooɗon.”

¹⁴ Jawmiraawo suusɗini Zorobaabila ɓii Salatiyel, ngomna dow Yahuuda e Yosuwa ɓii Yocadak hooreejo liman'en e yimɓe luttuɓe nder ummaatoore fuu. Ɓe ngari, ɓe kuuwi haa haykaliiru Jawmiraawo honooɓe asama.

¹⁵ Ɗum waɗi nder nyannde noogas e nayaɓre haa lewru joweego'ooru, nder nduuɓu laamiiɗo Dariyus ɗiɗaɓu.