Habakuk 3 - Fulfulde DC Bible

Do'aare Habakuk

¹ Ndaa do'aare annabi Habakuk bee daande gimi boyki:

² Yaa Jawmiraawo, mi nani habaru maaɗa. Kuugal ma hulni yam, yaa Jawmiraawo. Huuw kuugal man fahin nder zamanu amin, waŋgin ngal nder nyalɗe ɓadiiɗe. Koo nder tikkere ma boo taa accu hinnuye ma.

³ Allah ɗon wara diga Teman, Ceniiɗo ɗon wara diga hooseere Paran. Maŋngu maako ɗon sudda asama, maŋgtoore maako ɗon hebbina lesdi.

⁴ Bana ɗelko annoora, laasi naaŋge ɗon ngurto juŋngo maako, ton baawɗe maako ɗon cuuɗi.

⁵ Nyawu kalluŋgu ndaaɓoowu ɗon ardo mo, yontere ɗon tokko palanɗe kosɗe maako.

⁶ O dari, o dimmbini lesdi. O laari ummaatooje, ɗe ndiwni, kooseeje ɓooymaaje campiti, towndiije ɓooymaaje ngibbi, kanje ngoni laabi maako diga ɓooyma.

⁷ Mi yi'i sarru ukkani laymaaji Kusan, laymaaji Mediyan ɗon ndiwna.

⁸ Yaa Jawmiraawo, tikkere ma ɗon saata dow maaje ndiyam e ɓernuki ma dow mbeela na? Ngam a wa'i pucci maaɗa, a wa'i moota pucci nga jaalorgal ma.

⁹ A taaskitini lagaawal ma, kuri ngoni kunayeeje ɗe mbolwuɗa. A seeki lesdi bee maaje ndiyam.

¹⁰ Kooseeje ngi'i ma, ɗe ndiwni. Ilamji mawɗi ɗon ila. Luggeeŋga mbeela ɗon hoola, ɗon ummina ƴuuge towɗe.

¹¹ Naaŋge e lewru ndari haa nokkuuje muuɗum'en, daliila annoora kuri ma piɗaaɗi e jayŋgol labbo ma ɗelkanŋgo.

¹² Bee tikkere caalortooɗa lesdi, bee ɓernuki ndirɓirta ummaatooje.

¹³ A wurti ngam hisnugo ummaatoore ma e ngam hisnugo moytaaɗo ma. A yibbini suudu kalluɗo diga tiitol haa les, a wirgi caɓɓaaje maaru fuu.

¹⁴ Bee kuri maɓɓe a sumpiti ko'e ardiiɓe honooɓe maako, warɓe bee gookaali seyo ngam ɓe caŋkita min, ɓe tammo ɓe nyaaman toonyaaɗo bee sirri.

¹⁵ Bee pucci ma njaaɓuɗa mbeela, haa ilamji mawɗi mbaɗi nguufo.

¹⁶ Mi nani ɗum. Ɓanndu am fuu ɗon diwna, hoolo maajum dimmbini hunnduko am, i'e am tampi, kosɗe am ɗon ndiwna les am. Mi ɗon reena nyalaade ɓillaare bee de'ere, haa nde wara dow ummaatoore hippotoonde min.

¹⁷ Koo to ibbi finnataa, inabooje ndimataa, jaytunhi rimataa ɓiɓɓe, gese mbaɗataa nyaamle, dammooji caŋkititto diga waalde, na'i njinni diga waalde,

¹⁸ ammaa min mi seyorto Jawmiraawo, mi welweltan ngam daliila Allah kisnoowo yam.

¹⁹ Jawmiraawo Baawɗo woni semmbe am, o laatini kosɗe am bana ɗe lelji, o ɗon waancinammi dow nokkuuje towɗe. Ngam kaliifaajo gimi, bee moolooji.