Gurtaaki 9 - Fulfulde DC Bible

Masiiboowol jowaɓol: Masiibo pettu

¹ Jawmiraawo wi'i Muusa: “Yah haa Firawna, wi' mo: Ndaa nii Jawmiraawo, Allah Ibraniŋke'en wi'i: Accu yimɓe ummaatoore am njaha njaggano yam.

² To a salake yooftugo ɓe, to a jogitake ɓe,

³ juŋngo am waran dow dabbaaji ma nder ladde, dow pucci e bamɗe e geelooɗi e na'i e dammooji, mi ukkana ɗi pettu caatuŋgu masin!

⁴ Ammaa Jawmiraawo senndan hakkunde dabbaaji Isra'iila'en e dabbaaji Misra'en. Nder ko yimɓe Isra'iila mari fuu, walaa ko waatata.

⁵ Jawmiraawo ta'i wakkati man, wi'i: Jaŋngo mbaɗanmi ɗum nder lesdi Misra.”

⁶ Jaŋngo man Jawmiraawo waɗi ko o wi'no. Dabbaaji Misra'en fuu mbaati, ammaa haa dabbaaji Isra'iila'en walaa koo ngoota waati.

⁷ Firawna neli ɓe ndaara dabbaaji Isra'iila'en, ɓe tawi walaa koo ngoota waati. Ammaa fahin hoore Firawna saati, o accaay Isra'iila'en ndilla.

Masiiboowol joweegowol: Masiibo ɓuule

⁸ Jawmiraawo wi'i Muusa e Haruna: “Kebbine juuɗe mooɗon bee doɗɗe ɓolinirɗe. Muusa ukka ɗe haa dow yeeso Firawna.

⁹ Ɗe laatoto bana sollaare dow lesdi Misra fuu, ɗe mbaɗan ɓuule laatotooɗe kuuduuje haa yimɓe e dabbaaji.”

¹⁰ Muusa e Haruna koo'i doɗɗe ɓolinirɗe, ɓe njehi ɓe ndari yeeso Firawna, Muusa ukki ɗe haa dow, ɗe mbaɗi ɓuule laatotooɗe kuuduuje haa yimɓe e dabbaaji.

¹¹ Hiila'en lesdi Misra mbaawaay ɓaditaago Muusa daliila ɓuule, ngam ɓalli maɓɓe fuu mbaɗi ɓuule kal-kal bee Misra'en woɗɓe fuu.

¹² Ammaa Jawmiraawo saatini hoore Firawna, o nananaay ɓe, bana Jawmiraawo wi'no Muusa.

Masiiboowol joweeɗiɗaɓol: Masiibo mallimallooje

¹³ Jawmiraawo wi'i Muusa: “Jaŋngo, dawu fajiri cub, dara yeeso Firawna, wi' mo: Ndaa nii Jawmiraawo, Allah Ibraniŋke'en wi'i: Accu ummaatoore am yaha jaggano yam.

¹⁴ Ngam jonta kam mi ukkante masiibooji am fuu, an e saraaki'en ma e ummaatoore ma. Nden kam a anndan walaa nannduɗo bee am nder duniyaaru fuu.

¹⁵ Harono on kalki to mi fortino juŋngo am haa mi halke, an e ummaatoore ma fuu bee nyawu kalluŋgu ndaaɓoowu!

¹⁶ Ammaa mi acci ma a yeeɗa ngam mi waŋginane baawɗe am, ngam wooynugo innde am nder duniyaaru fuu.

¹⁷ Bee man fuu a ɗon tokko mawnitaago dow ummaatoore am, a yooftaay nde.

¹⁸ Ngam maajum, jaŋngo bana saa'iire nde'e, mi toɓnan mallimallooje mawɗe masin. Bana maaje meeɗaay laataago diga lesdi Misra jooɗi haa wargo hannde.

¹⁹ Jonta kam, waɗ umroore ngam hisnugo dabbaaji ma e ɗum ko marɗa haa yaasi. Yimɓe e dabbaaji, waato ko woni yaasi fuu, ko nastaay cuuɗi, mallimallooje toɓan dow maajum, ɗum halkan.”

²⁰ Mo huli wolde Jawmiraawo caka saraaki'en Firawna, doggini maccuɓe mum e dabbaaji mum haa cuuɗi.

²¹ Ammaa woɗɓe boo paalaay wolde Jawmiraawo nde'e, ɓe acci maccuɓe maɓɓe e dabbaaji maɓɓe haa ladde.

²² Jawmiraawo wi'i Muusa: “Ɓaŋgtu juŋngo ma gal asama, haa mallimallooje toɓa nder lesdi Misra fuu dow yimɓe e dabbaaji e fuɗŋgooji gese nder lesdi Misra fuu.”

²³ Muusa ɓaŋgti sawru muuɗum gal asama. Jawmiraawo neli diggaali e mallimallooje, pelmaali paɗɗi lesdi. Jawmiraawo toɓni mallimallooje dow lesdi Misra.

²⁴ Mallimallooje toɓi, ma'e njillindiri bee mallimallooje loorɗe masin, irin maaje meeɗaay laataago nder lesdi Misra diga lesdi Misra jooɗi haa wargo hannde.

²⁵ Mallimallooje piyi nder lesdi Misra ko woni yaasi fuu, waato yimɓe e dabbaaji. Mallimallooje piyi fuɗŋgooji gese fuu, ɗe ngewi leɗɗe ladde fuu.

²⁶ Sey nder lesdi Goosan ndi Isra'iila'en ngoni, mallimallooje ngalaa.

²⁷ Firawna neli, ewni Muusa e Haruna, wi'i ɓe: “Jonta mi waɗi hakke, Jawmiraawo o adiliijo, ammaa min e ummaatoore am min aybuɓe.

²⁸ Tore Jawmiraawo haa o naŋgta diggaali e mallimallooje maako. Mi accan on on njaha, on neeɓataa fahin.”

²⁹ Muusa wi'i: “To mi wurtake berniwol, mi weeɗan juuɗe am heedi Jawmiraawo. Nden diggaali timman, mallimallooje boo njinnan, haa a annda Jawmiraawo mari duniyaaru.

³⁰ Ammaa mi anndi an e saraaki'en ma, on kulataa Jawmiraawo Allah tawon.”

³¹ Saa'i man leŋ e sa'iiruuri nattinaama, ngam sa'iiruuri saawti, leŋ boo finni.

³² Ammaa alkamaari e irin alkamaari ngoɗndi nattaay, ngam ɗi ɓenndaay tawon.

³³ Muusa wurti saare Firawna, o yehi yaasi berniwol. O weeɗi juuɗe maako heedi Jawmiraawo. Diggaali e mallimallooje njinni, iyeende acci toɓugo.

³⁴ Nde Firawna yi'i iyeende e mallimallooje e diggaali njinni, o tokki waɗugo hakke, o saatini hoore maako fahin, kaŋko e saraaki'en maako fuu.

³⁵ Hoore Firawna saati, o sali yooftugo Isra'iila'en, bana Jawmiraawo wi'no bee hunnduko Muusa.