Gurtaaki 7 - Fulfulde DC Bible

¹ Jawmiraawo wi'i Muusa: “Ndaa, mi laatini ma yeeso Firawna bana Allah. Deerɗiraawo ma Haruna boo laatoto bana annabiijo ma.

² A wolwana deerɗiraawo ma Haruna ko mi umrete fuu. Kaŋko boo o wolwana Firawna, haa o yoofta Isra'iila'en ngurto lesdi maako.

³ Min, mi saatinan hoore Firawna. Mi ɗuɗɗinan alaamaaji e kaayeefiiji am nder lesdi Misra.

⁴ Firawna nanantaa on. Nden mi waŋginan baawɗe am haa Misra bee kiitaaji naawɗi, mi wurtinan mooɓe honooɓe am, waato ummaatoore am Isra'iila'en diga lesdi Misra.

⁵ Nden Misra'en anndan min woni Jawmiraawo, wakkati portanmi juŋngo am dow Misra, haa mi wurtina Isra'iila'en diga lesdi maɓɓe.”

⁶ Muusa e Haruna mbaɗi bana Jawmiraawo umri ɓe.

⁷ Muusa ɗonno mari duuɓi cappanɗe joweetati, Haruna boo duuɓi cappanɗe joweetati e tati, saa'i ɓe mbolwani Firawna.

Firawna sali nanango Muusa e Haruna

⁸ Jawmiraawo wolwani Muusa e Haruna, wi'i:

⁹ “To Firawna wi'i on: Mbaɗe kaayeefi, an Muusa a wi'a Haruna hoo'a sawru mum, o sakkina ndu yeeso Firawna. Ndu laatoto mboodi.”

¹⁰ Muusa e Haruna njehi haa Firawna, ɓe mbaɗi bana Jawmiraawo umri ɓe. Haruna sakkini sawru muuɗum yeeso Firawna e saraaki'en mum. Ndu laati mboodi.

¹¹ Firawna ewni hikma'en e waɗooɓe hiila lesdi Misra, hiila'en ɓe'e mbaɗi bana non bee hiilaaji muuɗum'en.

¹² Koo moy maɓɓe sakkini sawru muuɗum haa lesdi e cabbi ɗi'i laati boɗɗe. Ammaa sawru Haruna moɗi cabbi maɓɓe.

¹³ Bana Jawmiraawo wi'no, Firawna saatini hoore, o nananaay Muusa e Haruna.

Masiiboowol aranol: Ndiyam laati ƴiiƴam

¹⁴ Jawmiraawo wi'i Muusa: “Firawna saatini hoore, o sali accugo Isra'iila'en ndilla.

¹⁵ Yah haa Firawna fajiri yaake o wurtoto yahugo maayo Niil. A daro yeeso maako haa fomoonde maayo Niil ngam fottugo bee maako. A jogo sawru laatinoondu mboodi go.

¹⁶ A wi'a laamiiɗo: Jawmiraawo, Allah Ibraniŋke'en, neli yam haa maaɗa. O wi'i ma: Accu ummaatoore am dilla, jaggano yam nder ladde. Ammaa a sali haa jonta.

¹⁷ Ngam maajum Jawmiraawo wi'i: Dow ɗu'um, a anndan min woni Jawmiraawo. Ndaa, mi fiyan ndiyam nder maayo Niil bee sawru wonndu haa juŋngo am ndu'u, ɗam laatoto ƴiiƴam.

¹⁸ Liɗɗi nder maayo Niil mbaatan, maayo Niil boo haccan. Misra'en nganyan ndiyam maayo Niil, njarataa ɗam fahin.”

¹⁹ Nden Jawmiraawo wi'i Muusa: “Umru Haruna hoo'a sawru muuɗum, o forta juŋngo maako dow ilduɗe ndiyamji Misra, dow maaje e ilduɗe e beeli e haa ndiyam woni fuu, ɗum laato ƴiiƴam. Ƴiiƴam laatoto koo toy nder lesdi Misra, nder jarnirɗe ɗe leɗɗe e kaa'e fuu.”

²⁰ Muusa e Haruna mbaɗi bana Jawmiraawo umri ɓe. Haruna ɓaŋgti sawru muuɗum, fiyi ndiyam maayo Niil yeeso Firawna e saraaki'en mum. Ndiyam maayo Niil fuu laati ƴiiƴam.

²¹ Liɗɗi nder maayo mbaati, maayo Niil hacci. Misra'en mbaawaay yarugo ndiyam maayo Niil fahin. Ƴiiƴam ɗon koo toy nder lesdi Misra fuu.

²² Hiila'en lesdi Misra boo mbaɗi bana non bee hiilaaji muuɗum'en. Ammaa bana Jawmiraawo wi'no, Firawna saatini hoore, o nananaay Muusa e Haruna.

²³ Firawna wayliti, hooti saare, o faalaay kaayeefi man.

²⁴ Misra'en fuu ngasi gaawi kommbi maayo Niil haa ɓe keɓa ndiyam njareteeɗam, ngam ɓe mbaawaay yarugo ndiyam maayo Niil.

²⁵ Nyalɗe joweeɗiɗi timmi ɓaawo Jawmiraawo fiyi maayo Niil bee masiiboowol ngo'ol.

Masiiboowol ɗiɗaɓol: Masiibo paaɓi

²⁶ Nden Jawmiraawo wi'i Muusa: “Yah haa Firawna, wi' mo: Ndaa nii Jawmiraawo wi'i: Accu yimɓe ummaatoore am njaha njaggano yam.

²⁷ To a salake yooftugo ɓe, mi ukkan paaɓi haa lesdi ma fuu.

²⁸ Maayo Niil heewan paaɓi, ɗi mba'oto, ɗi nasta saare ma e suudu ma waaleteendu. Ɗi ngaran dow be'itte ma e nder cuuɗi saraaki'en ma e caka yimɓe ma e nder kaataneeji ma e nder jiiɓruɗe kuroori ma.

²⁹ Paaɓi ndiwan dow maaɗa e dow yimɓe ma e dow saraaki'en ma fuu.”