Gurtaaki 32 - Fulfulde DC Bible

Gaggel kaŋŋeeri

¹ Nde Isra'iila'en ndaari Muusa neeɓi, jippaaki diga hooseere, ɓe kawti haa Haruna, ɓe mbi'i mo: “Umma, waɗan min ɗowanteeɓe ardotooɓe min! Ngam Muusa, goɗɗo gurtinɗo min lesdi Misra oo, min anndaa ko waɗi mo.”

² Haruna wi'i ɓe: “Itte yerihon kaŋŋeeri rewɓe mon e ɓikkoy mon, ngaddaneeɗam kon!”

³ Ɓe itti yerihon kaŋŋeeri man, ɓe ngaddani kon Haruna.

⁴ O jaɓi kon haa juuɗe maɓɓe, o diidi misaalu bee binndirgol, o ɓolini kaŋŋeeri go, o waɗi gaggel fodde misaalu oo. Yimɓe mbi'i: “Yimɓe ummaatoore Isra'iila, kanjum woni ɗowanteeɗo mon, gurtinɗo on lesdi Misra.”

⁵ Nde Haruna yi'i ɗum, o mahi hirsirde yeeso maagel. Nden o wooyni: “Jaŋngo woni juulde ngam Jawmiraawo!”

⁶ Jaŋngo maajum ɓe ndawi cub, ɓe lii'i guleteeɗi, ɓe mbaɗi kirseteeɗi ngam kawtal. Yimɓe fuu njooɗi, ɗon nyaama, ɗon njara. Nden ɓe ummi haa ɓe pija.

⁷ Jawmiraawo wi'i Muusa: “Umma, jippa hooseere! Ngam yimɓe ma ɓe ngurtinɗa lesdi Misra, ɓe mbonniti.

⁸ Law ɓe celi laawol ngol umrumi ɓe. Ɓe mbaɗani ko'e maɓɓe gaggel ɓolinaaŋgel. Ɓe cujidani ngel, ɓe lii'ani ngel kirseteeɗi, ɓe mbi'i: Ummaatoore Isra'iila'en, kanjum woni ɗowanteeɗo mon, gurtinɗo on lesdi Misra.”

⁹ Jawmiraawo wi'i Muusa: “Mi yi'i yimɓe ɓe'e, ɓe saata-ko'e'en.

¹⁰ Kadi accam jonta, haa tikkere am saata dow maɓɓe, mi halka ɓe! Ammaa an, mi laatinte ummaatoore mawnde.”

¹¹ Muusa tori Jawmiraawo Allah mum: “Yaa Jawmiraawo, ngam ɗume tikkere ma saatata dow yimɓe ma ɓe ngurtinɗa lesdi Misra bee baawɗe mawɗe e juŋngo semmbiɗŋgo?

¹² To a waɗi bana nii, Misra'en mbi'an: O wurtini ɓe ngam sarru, Jawmiraawo wurtini ɓe ngam mbarugo ɓe dow kooseeje e nattingo ɓe diga lesdi. Waylita e caatal tikkere ma, faasitit ukkango yimɓe ma sarru.

¹³ Siftor Ibrahiima e Isiyaaku e Isra'iila, jaggiiɓe ma. Kamɓe, a hunorani ɓe hoore ma, a wi'i ɓe: Mi ɗuɗɗinan danygol mooɗon bana koode asama. Lesdi ndi'i fuu ndi kuniimi hokkugo on, mi hokkan ndi danygol mooɗon maral haa foroy.”

¹⁴ Jawmiraawo faasiti ukkugo sarru ngu o wi'no o ukkan dow yimɓe maako.

¹⁵ Muusa wayliti, jippi diga hooseere. Alluhaaje seedamku ɗiɗi ɗon haa juŋngo maako. Ɗe binndaaɗe dow bakeeje maaje ɗiɗi fuu, yeeso e ɓaawo.

¹⁶ Alluhaaje ɗe'e, Allah waɗi ɗe. Binndol ngo'ol boo, Allah winndi ngol dow maaje.

¹⁷ Yosuwa nani hoolo ummaatoore. O wi'i: “Haraka konu ɗon nder saŋngeere.”

¹⁸ Muusa wi'i: “Naa ɗum hoolo jaalorgal, naa ɗum gookaali jaaleeki boo. Mi ɗon nana hoolo gimi.”

¹⁹ Nde o ɓaditi saŋngeere, o yi'i gaggel go e gamarle. Tikkere Muusa saati, o sakkini alluhaaje haa juuɗe maako go, o fusi ɗe les hooseere.

²⁰ O hoo'i gaggel ngel ɓe mbaɗi, o wuli ngel bee yiite, o nami ngel haa ngel laati bana kuroori. O ukki ɗum nder ndiyam, o yarni ɗum Isra'iila'en.

²¹ Muusa ƴami Haruna: “Ɗume ummaatoore nde'e waɗi ma haa ngadduɗa hakkewol maŋngol ngo'ol dow maɓɓe?”

²² Haruna jaabi: “Jaagorɗo am, taa tikkere ma saata! A anndi no yimɓe ɓe'e mbonnori.

²³ Ɓe mbi'i yam: Waɗan min ɗowanteeɓe ardotooɓe min. Ngam Muusa, goɗɗo gurtinɗo min lesdi Misra oo, min anndaa ko waɗi mo.

²⁴ Mbi'mi ɓe: Koo moy marɗo kaŋŋeeri, itta ndi. Ɓe ndokki yam ndi. Mi ɓolini ndi nder yiite, gaggel nge'el wurti.”

²⁵ Muusa laari ummaatoore nde'e ɗon nder jiiɓre, o laari boo no Haruna acciri nde nder jiiɓre. Joonde nde'e waddani ummaatoore jancoore caka konne'en maare.

²⁶ Muusa dari haa dammugal saŋngeere, wi'i: “Tokkiiɗo Jawmiraawo fuu wara haa am!” Lewi'en fuu mooɓi haa maako.

²⁷ O wi'i ɓe: “Ndaa nii Jawmiraawo Allah Isra'iila wi'i: Koo moy fuu wakko kaafahi muuɗum. Caale caka saŋngeere diga dammugal haa dammugal, lore. Koo moy mbara deerɗiraawo mum e soobaajo muuɗum e keeddiɗɗiraawo mum!”

²⁸ Lewi'en mbaɗi fodde umroore Muusa. Nyalaade man, worɓe ko dillani ujine tato maayi.

²⁹ Muusa wi'i Lewi'en: “Hannde on nasti kuugal ngam Jawmiraawo, koo moy mooɗon mbari ɓiŋngel mum e deerɗiraawo mum. Ngam maajum Jawmiraawo barkiɗina on.”

³⁰ Jaŋngo maajum Muusa wi'i yimɓe ummaatoore: “On mbaɗi hakkewol maŋngol! Mi loroto dow hooseere jonta haa Jawmiraawo, teema mi heɓana on yaafuye hakke mooɗon.”

³¹ Muusa lorti haa Jawmiraawo, wi'i mo: “Kayto, yimɓe ɓe'e mbaɗi hakkewol maŋngol! Ɓe mbaɗani ko'e maɓɓe ɗowanteeɗo bee kaŋŋeeri.

³² Ammaa jonta, yaafa hakke maɓɓe! To naa non, ittu innde am diga deftere nde mbinnduɗa!”

³³ Jawmiraawo wi'i Muusa: “Baɗɗo hakke dow am fuu, innde maako ittanmi nder deftere am.

³⁴ Yah jonta, yahru ummaatoore haa nokkuure nde mbi'maami. Anndu, malaa'ikaajo am ardoto yeeso ma. Ammaa nyalaade kiita am mi hiitoto ɓe ngam hakke maɓɓe.”

³⁵ Jawmiraawo hiiti Isra'iila'en ngam ɓe mbi'i Haruna waɗana ɓe gaggel, kaŋko boo o waɗani ɓe ngel.