Gurtaaki 31 - Fulfulde DC Bible

Ewneeki Becaleel e Oholiyabu

¹ Fahin Jawmiraawo wi'i Muusa:

² “Heɗita mi suɓi Becaleel ɓii Uuri taaniraawo Huuru, mo lenyol Yahuuda.

³ Mi hebbini mo Ruuhu am, bee hikma e faamu e anndal kuugal koo ngale fuu,

⁴ haa o suurɗina kuuje, o huuwa kuuɗe kaŋŋeeri e cardi e njamndi mboɗeeri,

⁵ o winnda dow kaa'e ngam takkugo, o seha leɗɗe, o timmina kuuɗe koo ɗeye fuu.

⁶ Ndaa, mi hawtani mo Oholiyabu ɓii Ahisamak, mo lenyol Dan. Mi waɗi anndal nder ɓerɗe hakkilɓe woɗɓe boo, ngam haa ɓe mbaɗa ko mi umri ma fuu:

⁷ Laymaaru fottirde e sundukru seedamku e jooɗorde ngam kefergal wonnde dow maaru e kuuje laymaaru fuu

⁸ e taabal bee kuuje maagal fuu e jo'inirɗum pittirlaaji kaŋŋeeri laaɓndi bee kuuje maajum fuu e gulduɗum uurle

⁹ e hirsirde bee kuuje maare fuu e daaro bee jo'inirɗum maago

¹⁰ e limce dewal, waato limce ceniiɗe ngam Haruna, limanjo e limce ɓikkoy maako ngam kuugal limanku

¹¹ e nebbam cenirɗam e uureteeɗum belɗum ngam suudu seniindu. Ɓe mbaɗa koo ɗume fuu bana mi umri ma.”

Nyalaade siwtorde

¹² Jawmiraawo wi'i Muusa:

¹³ “Anndin Isra'iila'en umrooje ɗe'e: Sey on kakkilana nyalɗe ciwtorɗe am, ngam ɗe laati alaama hakkunde am bee mooɗon haa gide mooɗon fuu, ngam haa anndon min woni Jawmiraawo, cenoowo on.

¹⁴ Kakkilane nyalaade siwtorde, ngam nde seniinde haa mooɗon. Koo moy soɓni nde, o mbareteeɗo. Koo moy huuwi kuugal nder maare, o gurtinteeɗo diga jama'aare maako, ɓe mbara mo.

¹⁵ On kuuwa kuuɗe mooɗon nyalɗe joweego, ammaa nyalaade joweeɗiɗawre ɗum nyalaade siwtorde senaande ngam Jawmiraawo. Koo moy huuwi kuugal nder maare, o mbareteeɗo.

¹⁶ Sey Isra'iila'en kakkilana nyalaade siwtorde, ɓe mbaɗa siwtorde haa gide maɓɓe fuu. Ngam ɗum alkawal duumiiŋgal.

¹⁷ Nyalaade siwtorde laati alaama hakkunde am e Isra'iila'en haa foroy. Ngam nder nyalɗe joweego min Jawmiraawo mi tagi asamanji e lesdi, ammaa nyannde joweeɗiɗawre mi siwti, mi foofti.”

¹⁸ Nde Jawmiraawo timmini wolwango Muusa dow hooseere Sina, o hokki mo alluhaaje seedamku ɗiɗi, ɗe alluhaaje kaa'e binndaaɗe bee hoondu Allah.