Gurtaaki 20 - Fulfulde DC Bible

Umrooje Allah sappo

¹ Ndaa bolle ɗe Allah wolwani Isra'iila:

² “Min woni Jawmiraawo Allah maaɗa, gurtinɗo ma njeyaaŋgu haa lesdi Misra.

³ Taa ɗowanteeɓe woɗɓe tawe haa maaɗa, sey min feere am.

⁴ Taa waɗan hoore ma lawru koo nduye, koo suura tagdi koo ndiye haa asama malla dow lesdi malla nder ndiyam les lesdi.

⁵ Taa sujidan suuraaji ɗi'i, taa rewu ɗi! Ngam min Jawmiraawo Allah ma, mi yiɗaa a tokko ɗowanteeɗo feere sam. Mi hiitoto aybe wanyɓe yam haa ɓiɓɓe maɓɓe, koo haa taaniraaɓe maɓɓe e jaatiraaɓe maɓɓe boo.

⁶ Ammaa mi waɗanan yiɗɓe yam, ɗowtaniiɓe umrooje am mbooɗeeŋga haa gide ujineeje.

⁷ Taa ewnu innde Jawmiraawo Allah maaɗa meere. Ngam fakat Jawmiraawo hiitoto koo moy ewniiɗo innde mum meere.

⁸ Siftor nyalaade siwtorde, a sena nde.

⁹ Nder nyalɗe joweego kuuwata kuugal ma fuu.

¹⁰ Ammaa nyalaade joweeɗiɗawre woni siwtorde ngam Jawmiraawo Allah maaɗa. Nder maare taa huuw kuugal koo ngale, koo an, koo ɓiya gorko, koo ɓiya debbo, koo maccuɗo ma, koo korɗo ma, koo dabbaaji ma, koo koɗo gonɗo nder gure ma.

¹¹ Ngam nder nyalɗe joweego Jawmiraawo tagi asama e lesdi e mbeela e ko woni nder maajum fuu. O siwti nyalaade joweeɗiɗawre. Ngam maajum Jawmiraawo barkiɗini nyalaade siwtorde, o seni nde.

¹² Teddin baaba ma e daada ma, ngam haa balɗe ma njuuta nder lesdi ndi Jawmiraawo Allah maaɗa hokki ma.

¹³ Taa mbar-hoore.

¹⁴ Taa waɗ njeenu.

¹⁵ Taa wujju.

¹⁶ Taa seeda fewre dow keeddiɗɗiraawo ma.

¹⁷ Taa suunu saare keeddiɗɗa. Taa suunu debbo keeddiɗɗa, koo maccuɗo maako, koo korɗo maako, koo nagge maako, koo wamnde maako, koo ɗume ko keeddiɗɗa mari fuu.”

Kulol ummaatoore Isra'iila

¹⁸ Yimɓe fuu nani felmaaŋgo e sawtu luwal, ɓe ngi'i ma'e e hooseere suurannde cuurɗe. Nde ɓe ngi'i ɗum, ɓe ndiwni, ɓe ndari daayiiɗum.

¹⁹ Ɓe mbi'i Muusa: “An, wolwan min, min nanante. Ammaa taa Allah wolwana min, ngam taa min maaya.”

²⁰ Muusa wi'i ɓe: “Taa kule! Allah wari ngam foondugo on, ngam haa on kula mo e taa on mbaɗa hakke.”

²¹ Ummaatoore tokki daraago daayiiɗum, Muusa feere mum ɓaditi nyiɓre ɓaleere haa Allah woni.

Umrooje dow kirsirɗe

²² Jawmiraawo wi'i Muusa: “Ndaa nii mbi'ata Isra'iila'en: Onon on ngi'i mi wolwani on diga asama.

²³ Taa mbaɗane ko'e mon labbi ɗi cardi malla kaŋŋeeri, taa kawte ɗi bee am.

²⁴ Mahaneeɗam hirsirde nde lesdi. Lii'e dow maare kirseteeɗi baali e be'i e na'i mooɗon ngam guleteeɗi malla kawtal mon bee am. Haa nokkuure koo ndeye nde anndinanmi on ngam ewnaago innde am, mi waran haa mooɗon, mi barkiɗinan on.

²⁵ To on ɗon nyiɓana yam hirsirde nde kaa'e, taa nyiɓe nde bee kaa'e cehaaɗe. Ngam to on cehi ɗe, on coɓnan ɗe.

²⁶ Taa mba'e heedi hirsirde am dow ba'orɗe ngam taa on cuddito les mooɗon dow maare.”