Gurtaaki 1 - Fulfulde DC Bible

Bone Isra'iila'en haa Misra

¹ Ndaa inɗe ɓiɓɓe Yaakubu, waato Isra'iila'en yahduɓe haa Misra bee baaba muuɗum'en, koo moy fuu bee saare muuɗum:

² Ruben, Simeyon, Lewi e Yahuuda,

³ Issakar, Zabulon e Benyamin,

⁴ Dan e Neftali, Gada e Aser.

⁵ Limgal danygol Yaakubu fuu, waɗi yimɓe cappanɗe njoweeɗiɗo (70). Yusufu kam ɗonno haa Misra ton.

⁶ Yusufu e deerɗiraaɓe muuɗum fuu maayi, non boo mooɓgal yidere maɓɓe fuu.

⁷ Isra'iila'en ndanyndanytiri, ɓe ɗon ɓesdo, ɓe ɗon ɗuuɗa, baawɗe maɓɓe boo ɓesdi masin. Ɓe kebbini lesdi Misra.

⁸ Nden laamiiɗo keso laami dow lesdi Misra. Kaŋko o anndaa Yusufu.

⁹ O wi'i ummaatoore maako: “Ndaare, ummaatoore Isra'iila ɓurdi en ɗuuɗugo e semmbe.

¹⁰ Sey en keɓa dabare ngam haɗugo nde ɗuuɗugo. Ngam to nde ɗuuɗi, to konu waɗi, nde hawtan bee konne'en meeɗen, nde haɓan bee meeɗen, nde wurtoto lesdi.”

¹¹ Misra'en laatini Isra'iila'en maccuɓe, ndarni kaliifa'en dow maɓɓe ngam torrugo ɓe bee kuugal caatuŋgal. Isra'iila'en nyiɓani Firawna berniiji cigorɗi ɗi'i: Pitom e Ra'meses.

¹² Bana nii koo nde Misra'en ɗuɗɗini toonyaaŋge dow maɓɓe, kamɓe ɓe ɓurti ɓesdaago, ɓe ɗuuɗi haa Misra'en kuli ɓe.

¹³ Misra'en kuuwni Isra'iila'en bee caatal.

¹⁴ Ɓe laskini joonde maɓɓe bee kuuɗe caatuɗe ɗe'e: Jiiɓugo loope, tappugo birikje e huuwugo kuuɗe gese. Ɓe ndooli ɓe huuwugo kuuɗe caatuɗe koo ɗeye fuu.

¹⁵ Laamiiɗo Misra hokki umroore nde'e haa Sifira e Pu'a, rewɓe ɓesninooɓe haa Ibraniŋke'en,

¹⁶ o wi'i ɓe: “To on ɗon ɓesnina rewɓe Ibraniŋke'en, ndaare booɗɗum, to ɗum ɓiŋngel gorgel, mbare ngel, to ɗum deyel boo, acce ngel yeeɗa.”

¹⁷ Ammaa ɓesninooɓe go kuli Allah, ɓe ɗowtanaaki umroore laamiiɗo Misra. Ɓe acci ɓikkoy ngorkoy ngeeɗa.

¹⁸ Nden laamiiɗo Misra ewni ɓe, ƴami: “Koni kuuwɗon bana nii? Koni on acci ɓikkoy ngorkoy ngeeɗa?”

¹⁹ Ɓe njaabi Firawna: “Rewɓe Ibraniŋke'en laataaki bana rewɓe Misra'en, ɓe semmbiɗɓe. Hiddeko ɓesninoowo wara haa maɓɓe, ɓe ndanyi.”

²⁰ Bana nii Allah woonani rewɓe ɓesninooɓe ɓe'e, Isra'iila'en ɓesdi ɗuuɗugo, baawɗe maɓɓe boo ɓesdi masin.

²¹ Allah hokki rewɓe go danygol, ngam ɓe kuli Allah.

²² Nden Firawna umri ummaatoore muuɗum fuu, o wi'i: “Gorgel danyaaŋgel nder saare Yahuuduujo fuu, cakkine ngel nder maayo Niil. Ndehoy kam, acce koy ngeeɗa.”