Galaatiya'en 3 - Fulfulde DC Bible

Tawreeta malla nuɗɗinki

¹ Kayto! Galaatiya'en faataaɓe, moy hiili on? Naa min anndini on habaru Yeesu Almasiihu gaafaaɗo?

² Njaabeeɗam ƴamol gootol tan: On keɓi Ruuhu Allah ngam on ɗowtani tawreeta naa malla ngam on nani Linjiila, on nuɗɗini ka?

³ On faataaɓe bana nii naa? Ko Ruuhu fuɗɗi nder mooɗon, on ngiɗi timminirgo ɗum jonta bee semmbe mooɗon na?

⁴ Torraaji ɗi njarɗon, ɗum fuu ɗum meere na? Fakat, ɗum laatataako meere!

⁵ Allah hokki on Ruuhu mum, ɗon waɗa kaayeefiiji caka mooɗon boo. O ɗon waɗa ɗum ngam on ɗowtani tawreeta na? Malla ngam on nani Linjiila, on nuɗɗini ka?

⁶ Numte ko winnda: “Ibrahiima nuɗɗini Allah, Allah boo limani mo ɗum adilaaku.”

⁷ Paame ɗu'um: Nuɗɗinɓe Allah, kamɓe ngoni ɓiɓɓe Ibrahiima bee gooŋga.

⁸ Deftere wi'i diga ɓooyma no Allah adilinirta yimɓe ummaatooje bee nuɗɗinki. Bana nii Deftere aarti anndini Ibrahiima kubaruwol belŋgol ngo'ol, nde wi'i: “Bee maaɗa ummaatooje fuu keɓrata barka.”

⁹ Ngam maajum nuɗɗinɓe Allah keɓi barka hawtaade bee Ibrahiima nuɗɗinɗo Allah.

¹⁰ Ammaa darotooɓe dow ɗowtaare muuɗum'en heedi tawreeta, naaloore ɗon dow maɓɓe, ngam Deftere wi'i: “Naaloore Allah dow koo moy ɗowtanaaki umrooje binndaaɗe nder deftere tawreeta nde'e fuu bee tiinaare.”

¹¹ Ɗum laaɓi, walaa mo adilinirte yeeso Allah bee tawreeta, ngam Deftere boo wi'i: “Adiliijo yeeɗiran bee nuɗɗinki.”

¹² Tawreeta kam darataako dow nuɗɗinki, ammaa ɗowtaniiɗo umrooje ɗe'e, yeeɗiran ɗe.

¹³ Almasiihu rimɗini en diga naaloore tawreeta, ngam o laati naalaaɗo mbattudi meeɗen ngam Deftere wi'i: “Koo moy ɓilaaɗo haa leggal, o naalaaɗo.”

¹⁴ O waɗi ɗum ngam haa ummaatooje fuu keɓa barka Ibrahiima nder Yeesu Almasiihu, ngam haa min keɓa Ruuhu mo Allah iini bee nuɗɗinki.

Tawreeta e iinawol

¹⁵ Deerɗam'en, haa mi wolwa fodde ko yimɓe mboowi waɗugo: To goɗɗo haɓɓi alkawal bana no haani, walaa potanɗo faasitingo ngal malla ɓesdugo goɗɗum haa maagal.

¹⁶ Allah waɗani Ibrahiima e danygol muuɗum iinaaji. Deftere wi'aay “haa danygolji”, bana ɗi ɗuuɗɗi, ammaa “haa danygol ma”, bana ngol gootol, waato Almasiihu.

¹⁷ Ndaa ko ngiɗmi wi'go: Alkawal ngal Allah waɗani Ibrahiima ɗon tabiti diga ɓooyma. Tawreeta waŋgi duuɓi teemeɗɗe nayi e cappanɗe tati (430) ɓaawo maajum. Ka waawataa wilugo iinawol ngo'ol.

¹⁸ Ngam to ndonŋgu iwi haa tawreeta, nden kam ngu iwataa haa iinawol fahin. Ammaa Allah mo'ani ngu Ibrahiima nder iinawol mum.

¹⁹ To non kam, ɗume tawreeta nafata? Ka ɓesdaama ngam waŋgingo kuuɗe luutanɗe muuyo Allah, haa to danygol keɓŋgol iinawol Allah go waŋgi. Malaa'ika'en anndini ka, goɗɗo hakkunndeejo boo waddi ka.

²⁰ Goɗɗo gooto walaa haaje hakkunndeejo, Allah kaŋko boo o gooto!

Tiitorde tawreeta

²¹ To non kam, tawreeta ɗon hona iinaaji Allah na? Naa non sam! Ngam to tawreeta hokkaamano haa ka waddana yimɓe ngeendam, nden kam adilaaku iwanno haa maaka fakat.

²² Ammaa tawreeta maɓɓi yimɓe fuu les baawɗe hakke, ngam haa dokkal fodde iinawol Allah laatano ɓe bee nuɗɗinki. Koo moy nuɗɗini Yeesu Almasiihu, heɓan ngal.

²³ Ammaa diga zamanu nuɗɗinki siwaa, en ɗonno les aynol tawreeta haa Allah waŋgina nuɗɗinki ki'i.

²⁴ Bana nii tawreeta laatino aynoowo en haa Almasiihu wari, ngam haa en keɓra adilaaku bee nuɗɗinki.

²⁵ Nde nii zamanu nuɗɗinki waɗi, en ndimɗi e juŋngo aynoowo oo.

²⁶ Ngam daliila nuɗɗinki, on fuu on laati ɓiɓɓe Allah nder Yeesu Almasiihu.

²⁷ Ngam saa'i on njaɓi baptisma bee innde Almasiihu, on ɓornake Almasiihu.

²⁸ Ngam maajum walaa ko feerotirta Yahuuduujo bee mo laataaki Yahuuduujo malla maccuɗo bee dimo malla gorko bee debbo. Ngam on fuu on laati gootum nder kawtal bee Yeesu Almasiihu.

²⁹ Nde nii on laatake yimɓe Almasiihu, on danygol Ibrahiima boo, on ronooɓe fodde iinawol Allah.