Gaazoowo 5 - Fulfulde DC Bible

¹ Taa yaawu maɓɓititgo hunnduko ma, taa ɓernde ma yaawa wolwugo koo ɗume yeeso Allah. Ngam haa asama Allah woni, an boo dow lesdi. Nden kam taa ɗuɗɗin bolle:

² Ngam cukle ɗuuɗɗe ngaddan koyɗi, ɗuɗɗingo bolle umminan faataare.

³ To a toganake Allah togayeere, taa sabbita hebbingo nde. Ngam o yerdataako faataaɓe. Hebbin ko togiiɗa!

⁴ To a hebbintaa ko a togi, ndikka taa a waɗa togayeere sam.

⁵ Taa accu hunnduko ma nastine hakke, taa wi' limanjo Allah ɗum boofol. A yiɗi tikkingo Allah bee bolle ma, haa o halka kuugal juuɗe ma na?

⁶ Ngam to koyɗi ɗuuɗi, ɗum meere, non boo to bolle ɗuuɗi boo, nden kam hul Allah!

Meereejum ngeendam

⁷ To a yi'i nder lesdi ma marɓe laamu ɗon toonyo talakaajo, ɗon cottina kiita ngooŋɗuka e adilaaku, taa hayɗin. Ngam mawɗo maɓɓe ɗon faddo ɓe, ɓurdanɓe mawnugo boo ɗon dow maako.

⁸ Nafuuda lesdi ɗon ngam yimɓe fuu. Koo laamiiɗo boo ɗon naftoro ngesa.

⁹ Cuunaaɗo ceede saftataa ɗe, giɗɗo jeynitaare, o walaa keɓal. Kanjum boo ɗum meere.

¹⁰ To jawdi ɓesdake, nyaamooɓe ndi boo ɗuuɗan. Nafuuda kaye marɗo ndi heɓi? Laarugo ndi tan.

¹¹ Ɗoyŋgol kuuwoowo welan, koo o nyaami ɗuuɗɗum koo seɗɗa. Ammaa haarannde diskuɗo accataa mo o ɗaano.

¹² Mi yi'i sarru naawŋgu feere haa duniyaaru: Ɗum jawdi ndi goɗɗo sigi ngam sarru mum.

¹³ Jawdi ndi majji nder suklere nde walaa nafuuda. Nden, to o danyi ɓiɗɗo gorko, o walaa koo ɗume haa juŋngo.

¹⁴ O wurti reedu daada o temmbo, bana non o dillirta boo. Haa torra kuugal maako fuu, walaa ko o hoosata saa'i man.

¹⁵ Fakat ɗum sarru naawŋgu: O dillan bana o wardi. Nafuuda kaye o heɓi to o torrake ngam henndu?

¹⁶ Balɗe maako fuu o ɗon nyaama nder nyiɓre, nder saklere e nyawu e mettamɓeram ɗuuɗɗam.

¹⁷ Ndaa ko tawmi booɗɗum masin: Goɗɗo nyaama, yara, yi'a hayru nder torra mum fuu haa duniyaaru fodde limgal balɗe ɗe Allah hokki mo, ngam kanjum woni geɗal maako.

¹⁸ To Allah hokki goɗɗo risku e jawdi, to o hokki mo baawɗe nyaamugo ɗum, o jaɓa geɗal maako, o seyoro nafuuda torra maako, kanjum ɗum dokkal Allah.

¹⁹ Irin maako numataa no ngeendam mum rammiri, ngam Allah sukli mo bee seyo ɓernde maako.