Gaazoowo 1 - Fulfulde DC Bible

Meereejum meere

¹ Ndaa bolle Gaazoowo ɓii Daawuda, laamiiɗo haa Urusaliima:

² Gaazoowo wi'i: Meereejum meere! Meere koros! Koo ɗume fuu woni meere.

³ Nafuuda kaye neɗɗo heɓata haa torra kuugal ngal o huuwata haa duniyaaru fuu?

⁴ Yidere saalo, yidere woɗnde wara, ammaa duniyaaru ɗon tabiti haa foroy.

⁵ Naaŋge fuɗa, muta, yaawɗa loraago haa nokkuure nde nge fuɗata.

⁶ Henndu yaha fombina, taaro haa woyla, ndu taaro taaro, ndu fuɗɗita taaraago.

⁷ Maaje fuu ɗon ila haa mbeela, ammaa mbeela heewataa. Gal nokkuure maaje ilata, ton ɗe ilata fahin.

⁸ Kuuje fuu comnan haa ɓura tinndinoore. Yiitere somataa yi'ugo, nofru saftataa nanugo.

⁹ Ko laati naane, kanjum laatoto. Ko waɗi naane, kanjum waɗoto fahin. Walaa kesum haa duniyaaru sam!

¹⁰ To woodi huunde nde ɓe mbi'ata: “Ndaa ɗum kesum”, asee boo ɗum aarti en laataago nder zamanuuji ɓooymaaji.

¹¹ Ammaa walaa mo siftorta ɓooymaajum. Non boo ko saaloto nder balɗe garanɗe, waranɓe ɓaawo boo ciftortaa ɗum.

Ko Gaazoowo heɓti

¹² Min Gaazoowo, mi laatino laamiiɗo Isra'iila haa Urusaliima.

¹³ Mi waɗi anniya ɗaɓɓititgo e linyugo bee hikma ko ɗon saalo les asama fuu. Tawmi: Allah sukli ɓiɓɓe Aadama bee suklere naawnde.

¹⁴ Mi yi'i kuuɗe kuuwaaɗe haa duniyaaru fuu. Ndaa, ɗum fuu ɗum meere, ɗum naŋngugo henndu.

¹⁵ Leliiɗum leltataake, majjuɗum limataake.

¹⁶ Mi numi: Ndaa, mi ɓesdi hikma, mi ɗuɗɗini ka ko ɓuri laamaniiɓe Urusaliima aartunooɓe yam fuu. Fakat mi anndi ko woni hikma ɗuuɗka e anndal lugguŋgal.

¹⁷ Mi waɗi anniya anndugo hikma non boo nginnaaku e faataare. Tawmi: Kanjum boo ɗum naŋngugo henndu.

¹⁸ Ngam hikma ɗuuɗka ɗon bee metteeŋga ɗuuɗŋga, ɗuɗɗingo anndal boo ɗuɗɗinan bone.