Filippi'en 4 - Fulfulde DC Bible

Ceyore kawtal mon bee Jawmiraawo

¹ Onon deerɗam'en yiɗaaɓe, ngam man tabite bana non nder kawtal mon bee Jawmiraawo. Mi ɗon yenwa on masin, onon yiɗaaɓe am, on laati daliila seyo am e tedduŋgal am.

² Mi ɗon toro Ewodiya e Sintike haa ɓe narra daliila Jawmiraawo.

³ An boo, kuuwdiɗɗiraawo am koolaaɗo, mi ɗon toro ma a walla rewɓe ɓe'e, ngam ɓe kawti bee am nder haɓre ngam Linjiila, kamɓe e Keleman e luttuɓe huuwdiɗɗiraaɓe am. Inɗe maɓɓe fuu mbinndaama nder deftere ngeendam.

⁴ Ceye foroy ngam daliila Jawmiraawo. Mi wi'an ɗum fahin: Ceye!

⁵ Sey munyal mon waŋgana yimɓe fuu. Jawmiraawo ɓadake wargo.

⁶ Taa caklane koo ɗume, ammaa anndine Allah haaje mon fuu nder do'a e tornde, bee yettoore boo.

⁷ Nden kam salaaman Allah ɓurka faamu neɗɗo fuu, aynan ɓerɗe mon e numooji mon nder kawtal bee Yeesu Almasiihu.

⁸ Deerɗam'en, ndaa ko lutti wi'eego: Ko gooŋɗi fuu, ko haandi samɗineego fuu, ko laati adiliijum fuu, ko laaɓi fuu, ko he'i yiɗeego fuu, ko he'i teddineego fuu, ko fotti fuu e ko he'i maŋgteego fuu, kakkilane ɗum.

⁹ Mbaɗe ko on ekkiti, ko on keɓi, ko on nani e ko on ngi'i haa am. Nden kam, Allah dokkoowo salaaman wondan bee mooɗon.

Yettoore ngam ballal

¹⁰ Mi heɓi seyo ɗuuɗŋgo daliila Jawmiraawo, ngam on ngiɗi wallugo yam fahin. Koo naane maa, on ngelino ɗum, ammaa on keɓaayno laawol waɗugo ɗum.

¹¹ Mi wi'aay ɗum ngam daliila sooynde ngam mi ekkiti heƴnitaago bee ko keɓmi fuu.

¹² Mi anndi jooɗaago nder leestinaare bana no mi anndiri jooɗaago nder ɗuuɗeeŋga. Mi ekkiti heƴnitaago koo toy e koo noy, koo mi ɗon nder haarannde malla weelo, koo nder ɗuuɗeeŋga malla sooynde.

¹³ Mi waawi waɗugo ɗu'um fuu, ngam Almasiihu ɗon semmbiɗinammi.

¹⁴ Bee non fuu on mbaɗi booɗɗum bee hawtango yam nder ɓillaare am.

¹⁵ Onon Filippi'en on anndi boo, saa'i min puɗɗi waazingo Linjiila, nde ngurtiimi Makedoniya, walaa jama'aare nuɗɗinɓe walli yam bee hokkugo huunde malla ngeenaari, sey onon tan.

¹⁶ Ngam diga mi ɗonno haa Tessaloniiki maa, on neldi yam walliinde, naa nde woore tan.

¹⁷ Taa nume dokke mi ɗaɓɓata. Ammaa mi yiɗi jawdi mooɗon heɓana on riba.

¹⁸ Mi heɓi dokkal ngal nelduɗon bee juŋngo Epafrodit. Mi heɓi ko mi mari haaje fuu, haa ɗum ɓuri haaje am, mi ɗon nder jeynitaare. Ɗum laati bana dokkal uurdi mbelndi, kirsaaɗum ko Allah seyorto, yerdoto.

¹⁹ Allah am humtanan on haajeeji mon fuu fodde risku muuɗum, nder tedduŋgal, bee Yeesu Almasiihu.

²⁰ Tedduŋgal laatano Allah, Baabiraawo men haa abada abadin. Aamiina!

Koofli

²¹ Koofne senaaɓe fuu bee innde Yeesu Almasiihu. Deerɗiraaɓe wonduɓe bee am koofni on.

²² Senaaɓe wonɓe haa ɗo fuu koofni on, sakkomaa yimɓe wonɓe nder saare Kaysara.

²³ Mo'ere Jawmiraawo men Yeesu Almasiihu wondu bee mooɗon fuu!