Farillaaji Lewi'en 16 - Fulfulde DC Bible

Nyalaade ittuki hakkeeji

¹ Jawmiraawo wolwani Muusa ɓaawo maayde ɓiɓɓe Haruna ɗiɗo, mbaraaɓe nde ɓe lii'ani Jawmiraawo yiite nge senaaka.

² O wi'i: “Yeccu deerɗa Haruna taa o nasta nokkuure ɓurnde senaago ɓaawo wiirndallo, sey bee saa'iire fottannde tan. Ton mbaŋganmi nder ruulde haa dow jooɗorde ngam kefergal. To o ɗowtaaki, o maayan.

³ Ndaa nii o nastirta nokkuure seniinde: Sey o lii'o ngaari kalhaldi kirseteendi ngam ittuki hakkeeji maako tawon, non boo njawdiri mbaalu nguleteendi.

⁴ Hiddeko Haruna nasta ton, sey o yiiwo tawon. Nden o ɓorno limce ceniiɗe, waato toggoore e gajeere e taadorgol e meetaleewol, ɗum fuu ɗum kuuwraaɗum gaaraaji leŋ.

⁵ Jama'aare Isra'iila hokka Haruna jawɗi be'i ɗiɗi kirseteeɗi ngam ittuki hakkeeji, non boo njawdiri mbaalu nguleteendi.

⁶ Sey o lii'o ngaari kalhaldi kirseteendi ngam ittuki hakke maako e hakkeeji saare maako.

⁷ Nden o darna jawɗi be'i ɗiɗi go yeeso Jawmiraawo haa dammugal laymaaru fottirde.

⁸ O waɗa kur'u dow maaji bee kaa'e ɗiɗi, woore ngam Jawmiraawo, woore ngam Azazeel.

⁹ Nden o lii'o njawdiri cuɓaandi bee kur'u ngam Jawmiraawo, ndi kirseteendi ngam ittuki hakkeeji.

¹⁰ Ammaa njawdiri cuɓaandi bee kur'u ngam Azazeel, sey o darna ndi yeeso Jawmiraawo, nden o riiwa ndi nder ladde haa Azazeel, ngam ndi itta hakkeeji yimɓe.

¹¹ Saa'i Haruna ɗon lii'o ngaari kalhaldi kirseteendi ngam ittuki hakkeeji maako e hakkeeji saare maako,

¹² sey o hebbina feho bee ƴulɓe yiite diga hirsirde dariinde yeeso Jawmiraawo. O hoo'a boo uureteeɗum bana ko hebbinta juuɗe ɗiɗi, o nastina ɗum nder nokkuure ɓurnde senaago gaɗa wiirndallo.

¹³ O sammina uurle man dow yiite yeeso Jawmiraawo, ngam haa cuurɗe maaje cudda jooɗorde ngam kefergal dow seedamku alkawal. To o waɗi bana non, o maayataa.

¹⁴ Nden o hoo'a ƴiiƴam ngaari seɗɗa, o wicca ɗam bee hoondu maako haa yeeso jooɗorde ngam kefergal, ɓaawo maajum o wicca ɗam nde joweeɗiɗi yeeso sundukru alkawal.

¹⁵ Nden o hirsa njawdiri mbeewa ngam ittuki hakkeeji ummaatoore, o nastina ƴiiƴam maari nder nokkuure ɓurnde senaago gaɗa wiirndallo. O wicca ɗam dow jooɗorde ngam kefergal, non boo yeeso sundukru alkawal, bana o waaruno bee ƴiiƴam ngaari go.

¹⁶ Bana nii o laɓɓinirta nokkuure ɓurnde senaago e coɓki Isra'iila'en e hakkeeji maɓɓe fuu. O waɗa bana non haa laymaaru fottirde fuu, ngam ndu ɗon dari caka coɓki maɓɓe.

¹⁷ Taa goɗɗo nasta laymaaru fottirde to Haruna nasti nder maaru ngam ittuki hakkeeji haa to o wurti. Ɓaawo o laɓɓini hoore maako e saare maako e jama'aare Isra'iila fuu,

¹⁸ sey o wurto, o laɓɓina hirsirde dariinde yeeso Jawmiraawo. O hoo'a ƴiiƴam ngaari e ƴiiƴam njawdiri, o waɗa ɗam haa luwe hirsirde.

¹⁹ Bee hoondu maako o wicca ƴiiƴam seɗɗa nde joweeɗiɗi dow hirsirde. Bana nii o laɓɓinirta nde e coɓki Isra'iila'en, o senrata nde.”

Njawdiri ndiiweteendi

²⁰ “To Haruna timmini laɓɓingo e senugo nokkuure ɓurnde senaago e luttuɗum laymaaru fottirde, sey o ɓadina njawdiri ɗiɗawri.

²¹ O yowa juuɗe maako ɗiɗi dow hoore maari, o waŋgina dow maari hakkeeji Isra'iila'en e aybeeji maɓɓe e tuurtol maɓɓe, o yowa ɗum fuu dow hoore njawdiri. Nden o umra goɗɗo riiwa ndi nder ladde.

²² Njawdiri man roondoto aybeeji maɓɓe fuu haa nokkuure ferewnde. Bana non o riiwrata ndi nder ladde.

²³ Nden Haruna nasta laymaaru fottirde. Limce leŋ ɗe o ɓornino hiddeko o nasta nokkuure ɓurnde senaago, o ɓorto ɗe, o acca ɗe ton.

²⁴ Sey o yiiwo haa nokkuure seniinde, o ɓorno limce maako. Nden o wurto, o lii'o nguleteeŋga maako e nga yimɓe, ngam o itta hakkeeji maako e hakkeeji ummaatoore fuu.

²⁵ Ɓellere kirsaaŋga ngam ittuki hakkeeji, o wula nde dow hirsirde.

²⁶ Diiwɗo njawdiri go haa Azazeel, loota limce mum, yiiwo. Nden o heɓan wartugo nder saŋngeere.

²⁷ Ngaari kalhaldi e njawdiri mbeewa go, kirsaaɗi ɗi Haruna yahri ƴiiƴam muuɗum'en nder nokkuure ɓurnde senaago ngam ittuki hakkeeji, sey goɗɗo wurtina ɗi yaasi saŋngeere. O wula laral e kusel e coowoowe maaji fuu.

²⁸ Nden o loota limce maako, o yiiwo. Ɓaawo man o heɓan wartugo nder saŋngeere.”

Umroore hakkilango nyalaade ittuki hakkeeji

²⁹ “Ndaa ko laatanto on farilla nduumiika: Nder lewru joweeɗiɗaɓru, nyannde sappoore, onon Isra'iila'en e jananɓe jooɗiiɓe caka mooɗon fuu on cuumo, taa on kuuwa kuugal koo ngale.

³⁰ Nyalaade maajum limanjo ittan hakkeeji mon, laɓɓinan on e aybeeji ɗi on mbaɗi dow Jawmiraawo fuu.

³¹ Ɗum nyannde siwtorde, sey on cuumo nder maare. Kanjum woni farilla nduumiika.

³² Limanjo moytaaɗo hoore bee nebbam, kalfitinaaɗo kuugal limanku mbattudi baaba mum, kaŋko o laɓɓinan on, o ittan hakkeeji mon. Sey o ɓorno limce leŋ ceniiɗe ngam kuugal man.

³³ Nden o laɓɓina nokkuure ɓurnde senaago e laymaaru fottirde e hirsirde, o itta hakkeeji liman'en e yimɓe fuu.

³⁴ Kanjum ɗum laatano on farilla nduumiika: Hitaande fuu nde woore, limanjo laɓɓina Isra'iila'en e hakkeeji maɓɓe fuu.” Haruna waɗi bana Jawmiraawo umruno Muusa.