Farillaaji Lewi'en 1 - Fulfulde DC Bible

Umrooje dow kirseteeɗi e guleteeɗi

¹ Jawmiraawo ewni Muusa, wolwani mo nder laymaaru fottirde, wi'i mo:

² “Umru Isra'iila'en umrooje dow kirseteeɗi maɓɓe, wi'ɓe: To goɗɗo yiɗi lii'anaago Jawmiraawo dokkal, sey o hoo'a ngal haa na'i maako malla dammooji maako.

³ To o yiɗi lii'aago nguleteeŋga nder na'i maako, sey o hoo'a ngaari kalhaldi ndi walaa aybe. Sey o lii'o ndi haa dammugal laymaaru fottirde, ngam haa Jawmiraawo yerdo ndi.

⁴ O yowa juuɗe maako dow hoore maari, Jawmiraawo boo jaɓan ndi ngam o yaafo hakkeeji goɗɗo oo.

⁵ O hirsa ngaari man ton yeeso Jawmiraawo. Liman'en danygol Haruna koo'a ƴiiƴam maari, mbicca ɗam haa hirsirde dariinde yeeso laymaaru fottirde, haa bakeeje maare nayi fuu.

⁶ Nden o ɓola ndi, o sennda ndi geɓe geɓe.

⁷ Liman'en danygol Haruna kuɓɓa yiite dow hirsirde, njowndindira leɗɗe dow maage.

⁸ Nden ɓe koo'a geɓe ngaari hawtaade bee hoore maari e ɓellere maari, ɓe mballina ɗe dow yiite hirsirde.

⁹ Sey goɗɗo go loota teteki maari e kolce maari cakitiiɗe bee ndiyam. Nden limanjo wula ɗum fuu dow hirsirde. Kanjum woni nguleteeŋga. Uureeŋgol maaga belŋgol fottanan Jawmiraawo.

¹⁰ To goɗɗo yiɗi lii'aago nguleteeŋga nder baali mum malla be'i mum, sey o hoo'a njawdiri ndi walaa aybe.

¹¹ O hirsa ndi haa wakeere hirsirde woylaare yeeso Jawmiraawo. Liman'en danygol Haruna mbicca ƴiiƴam maari haa bakeeje maare nayi fuu.

¹² O sennda ndi geɓe geɓe, limanjo boo wallina geɓe maari fuu hawtaade bee hoore maari e ɓellere maari dow yiite hirsirde.

¹³ Sey goɗɗo go loota teteki maari e kolce maari cakitiiɗe bee ndiyam. Nden limanjo lii'ano Jawmiraawo ɗum fuu, wula ɗum dow hirsirde. Kanjum woni nguleteeŋga. Uureeŋgol maaga belŋgol fottanan Jawmiraawo.

¹⁴ To goɗɗo yiɗi lii'aago sonndu wuleteendu, sey o hoo'a poola masar malla poola feere.

¹⁵ Limanjo wadda nga haa hirsirde, itta hoore maaga, wula nde dow hirsirde. Nden o ɓiɗɗa nga haa wuttudu hirsirde ngam wurtingo ƴiiƴam maaga.

¹⁶ Sey o itta waywoode maaga bee ko woni nder maare, o sakkina ɗum haa nokkuure ndoondi kirsaaɗi, haa fuunaaŋge hirsirde.

¹⁷ O naŋnga bileeji poola, o fooɗa ɗi haa o seeka ɓanndu maaga, ammaa taa o sennda ndu geɓe ɗiɗi. Nden o wula nga dow hirsirde. Kanjum woni guleteeɗum. Uureeŋgol man belŋgol fottanan Jawmiraawo.”