Ezekiyel 37 - Fulfulde DC Bible

Waadiwol keewŋgol i'e joorɗe

¹ Juŋngo Jawmiraawo wari dow am, Ruuhu maako hoo'i yam, jo'ini yam caka waadiwol keewŋgol i'e.

² O taarni yam baŋnge i'e ɗe'e. Mi yi'i ɗe ɗuuɗi masin dow lesdi, ɗe joorɗe keleŋ boo.

³ O ƴami yam: “Ɓii-Aadama, i'e ɗe'e ngeeɗitan na?” Mi jaabi: “Yaa Allah Jawmiraawo, sey an anndi.”

⁴ O wi'i yam: “Waɗ annabaaku dow i'e ɗe'e. Umru i'e joorɗe ɗe'e ɗe nana wolde am.

⁵ Yeccu ɗe: Ndaa nii Allah Jawmiraawo wi'i on: Mi nastinan poofɗe nder mooɗon haa on ngeeɗita.

⁶ Mi wallinan ɗaɗi dow mooɗon, mi mawninan kusel dow mooɗon, mi suddan on bee laral. Mi nastinan poofɗe nder mooɗon haa on ngeeɗita. Nden kam on paaman min woni Jawmiraawo.”

⁷ Mi waɗi annabaaku bana o umri yam. Diga mi ɗon wolwa tawon, mi nani hoolo, waato sonyo i'e puɗɗuɗe jokkindirgo.

⁸ Mi ɗon laara, ɗaɗi puɗi dow maaje, kusel waŋgi, nden laral suddi ɗum. Ammaa yoŋki walaa nder ɓalli man.

⁹ Allah wi'i yam: “Ɓii-Aadama, waɗ annabaaku, wolwan poofɗe. Waɗ annabaaku, yeccu poofɗe: Ndaa nii Allah Jawmiraawo wi'i: An poofɗe, war diga alkibilaaji nayi fuu, nastu ɓalli maayɗi ɗi'i, haa ɗi ngeeɗita!”

¹⁰ Mi waɗi annabaaku bana o umri yam. Poofɗe nasti ɓalli man, ɗi ngeeɗiti, ɗi ndari dow kosɗe maaji, ɗum laati jama'aare konu ɗuuɗnde masin.

¹¹ Allah wi'i yam: “Ɓii-Aadama, i'e ɗe'e ɗum yimɓe Isra'iila fuu. Ɓe ɗon mbi'a: I'e amin njoori, tammunde amin majji, min nattinaaɓe!

¹² Ngam maajum waɗan yimɓe am Isra'iila'en annabaaku, yeccu ɓe: Ndaa nii Allah Jawmiraawo wi'i: Mi maɓɓitan genaale mon, mi ummitina on, mi wurtina on ton, mi hoora on haa lesdi mon.

¹³ Onon yimɓe am, to mi maɓɓiti genaale mon ngam ummitingo on e wurtingo on ton, saa'i man on paaman min woni Jawmiraawo.

¹⁴ Mi nastinan Ruuhu am nder mooɗon ngam yeeɗitingo on, mi jo'inan on nder lesdi mon. Nden kam on paaman min Jawmiraawo wi'i ɗum, mi waɗan ɗum.” Nii Jawmiraawo wi'i.

No Yahuuda e Isra'iila laatorto laamu ngootu fahin

¹⁵ Ndaa Jawmiraawo wolwani yam, wi'i:

¹⁶ “Ɓii-Aadama, hoo'u sawru, winndu dow maaru: Yahuuda e Isra'iila'en hawtanɓe ɗum. Hoo'u boo sawru feere, winndu dow maaru: Yusufu, waato Efrayim e Isra'iila'en hawtanɓe ɗum.

¹⁷ Nden hawtu cabbi ɗiɗi fuu, ɗi laato sawru wooru nder juŋngo ma.

¹⁸ Yimɓe ummaatoore ma ƴamete: A yeccataa min ko saawi nder ton na?

¹⁹ Yeccu ɓe: Ndaa nii Allah Jawmiraawo wi'i: Mi hoo'an sawru Yusufu wonndu haa lenyol Efrayim e le'i Isra'iila kawtuɗi bee maagol, mi hawrita ndu bee sawru Yahuuda, ɗi laato sawru wooru haa juŋngo am.

²⁰ Cabbi ɗi mbinnduɗa dow muuɗum'en, joga ɗi haa juŋngo ma ngam yimɓe ngi'a ɗi.

²¹ Yeccu ɓe: Ndaa nii Allah Jawmiraawo wi'i: Mi wurtinan yimɓe Isra'iila nder ummaatooje haa ɓe njehi, mi mooɓtan ɓe diga koo toy fuu ngam hoorugo ɓe haa lesdi maɓɓe.

²² Mi wartiran ɓe ummaatoore woore nder lesdi, dow kooseeje Isra'iila. Laamiiɗo gooto laamanto ɓe fuu, ɓe meetataa laataago ummaatooje ɗiɗi malla laamuuji ɗiɗi.

²³ Ɓe meetataa soɓnugo ko'e maɓɓe bee labbi maɓɓe malla kuuɗe maɓɓe nyidduɗe malla aybeeji maɓɓe. Mi hisnan ɓe diga gudinki nuɗɗinki maɓɓe fuu. Mi laɓɓinan ɓe ngam ɓe laato ummaatoore am, min boo mi laato Allah maɓɓe.

²⁴ Jaggiiɗo am Daawuda laatoto laamiiɗo maɓɓe. Ɓe fuu ɓe kawtan haa juŋngo gaynaako gooto, ɓe tokkoto kiitaaji am, ɓe ɗowtanto farillaaji am.

²⁵ Ɓe njooɗoto haa lesdi ndi ndokkumi jaggiiɗo am Yaakubu, ndi kaakiraaɓe maɓɓe njooɗino nder muuɗum. Ɓe njooɗoto ton, kamɓe e ɓiɓɓe maɓɓe e taaniraaɓe maɓɓe haa foroy. Jaggiiɗo am Daawuda laamanto ɓe haa foroy.

²⁶ Mi haɓɓan alkawal salaaman bee maɓɓe, ɗum alkawal duumiiŋgal. Mi jo'inan ɓe haa lesdi, mi ɗuɗɗinan ɓe, mi darnan haykaliiru am caka maɓɓe boo, ndu daroto ton haa foroy.

²⁷ Jooɗorde am wondan bee maɓɓe, mi laatoto Allah maɓɓe, kamɓe boo ɓe laatoto ummaatoore am.

²⁸ To mi darni haykaliiru am caka maɓɓe haa foroy, saa'i man ummaatooje paaman min Jawmiraawo seni Isra'iila.”