Esira 1 - Fulfulde DC Bible

Taaskara nyiɓtugo haykaliiru

¹ Nder nduuɓu Koores, laamiiɗo Persiya, aranu, Jawmiraawo anniyi hebbitingo wolde muuɗum nde o wi'no bee hunnduko annabi Yeremiya, o ummini ɓernde Koores haa o neldi wooynaandu nder laamu maako, bee hunnduko e binndol fuu, wi'ugo:

² “Ndaa nii Koores, laamiiɗo Persiya wi'i: Jawmiraawo Allah mo asama, hokki yam laamuuji duniyaaru fuu. Kaŋko o umri yam mi nyiɓana mo haykaliiru haa Urusaliima nder lesdi Yahuuda.

³ Moy caka mooɗon ɗon nder ummaatoore Allah? Allah wonda bee maako. Sey o yaha Urusaliima nder lesdi Yahuuda, o nyiɓana Allah Jawmiraawo mo Isra'iila teddinta haykaliiru. Kaŋko woni Allah haa Urusaliima.

⁴ Haa Yahuuduujo luttuɗo woni fuu, sey heeddiɗɗiraaɓe mum mballita mo bee cardi e kaŋŋeeri e jawdi e dabbaaji e caahuuji goɗɗi ngam haykaliiru Allah haa Urusaliima.”

⁵ Baaba-ci'e'en nder le'i Yahuuda e Benyamin e liman'en e Lewi'en, ɓe Allah ummini ɓerɗe maɓɓe fuu, puɗɗi yahugo, nyiɓtugo haykaliiru Jawmiraawo haa Urusaliima.

⁶ Heeddiɗɗiraaɓe maɓɓe mballiti ɓe bee kuuje cardi e kaŋŋeeri e jawdi e dabbaaji e kuuje ɗuuɗa-samanje e caahuuji goɗɗi boo.

⁷ Laamiiɗo Koores wurtini kuuwruɗe haykaliiru Jawmiraawo ɗe Nabukodonosor hoocuno haa Urusaliima, sigino nder suudu ɗowanteeɗo muuɗum.

⁸ Koores, laamiiɗo Persiya umri Mitiridat, kaliifaajo ndesaari, o wurtini ɗe, o limti ɗe, o hokkiti ɗe Sesbaccar, ardiiɗo Yahuuda.

⁹ Ndaa limgal maaje: Taasaaje kaŋŋeeri cappanɗe tati (30) e taasaaje cardi ujineere (1.000) e laɓe noogas e joweenayi (29)

¹⁰ e bulki kaŋŋeeri cappanɗe tati e bulki cardi teemeɗɗe nayi e sappo (410) e kuuwruɗe feere ujineere (1.000).

¹¹ Limgal kuuwruɗe cardi e kaŋŋeeri fuu, ujine jowi e teemeɗɗe nayi (5.400). Kuuwruɗe ɗe'e fuu, Sesbaccar hoori ɗe hawtaade bee dahaaɓeno diga Baabila haa Urusaliima.