Esaaya 6 - Fulfulde DC Bible

Allah ewni Esaaya

¹ Hitaande nde laamiiɗo Uzziya maayi, ngi'mi Jawmiraawo. O ɗon jooɗi dow leeso laamu towŋgo ɓaŋgiiŋgo, gawarle limce maako kebbini haykaliiru.

² Serafi'en ɗon dow maako. Koo moy maɓɓe woodi bileeji joweego: Ɗiɗi ngam wiirnugo yeeso, ɗiɗi ngam wiirnugo kosɗe, ɗiɗi boo ngam fiirugo.

³ Ɓe ɗon mbi'a: “Jawmiraawo honooɓe asama o ceniiɗo, ceniiɗo, ceniiɗo! Tedduŋgal maako hebbini duniyaaru fuu!”

⁴ Caɓɓaaje haa dammuɗe haykaliiru ndiwni ngam sawtu ewnooɓe, cuurka hebbini suudu.

⁵ Nden mbi'mi: “Bone tawi yam! Mi halki, ngam mi goɗɗo soɓa-hunndukoojo, mi ɗon jooɗi boo caka yimɓe soɓa-kunnduɗe'en. Gite am ngi'i Laamiiɗo, Jawmiraawo honooɓe asama.”

⁶ Gooto serafi'en fiiri wari haa am, o ɗon jogi ƴulɓere yiite haa juŋngo, nde o hoo'uno bee naŋngirgel haa gulduɗum uurle.

⁷ O meemi hunnduko am, o wi'i: “Ndaa, ɗum meemi hunnduko ma, jonta aybe ma ittake, hakke ma yaafaama.”

⁸ Mi nani sawtu Jawmiraawo, o wi'i: “Moy nelanmi? Moy yahata ngam amin?” Mi jaabi: “Ndaa yam ɗo, nelam.”

⁹ O wi'i: “Yah, yeccu yimɓe ummaatoore nde'e: Foroy on nanan, ammaa on paamataa. Foroy on ngi'an, ammaa on annditittaa koo ɗume.

¹⁰ Saatin ɓerɗe yimɓe ummaatoore nde'e! Sukku ɓe noppi! Maɓɓu ɓe gite ngam taa ɓe ngi'a, taa ɓe nana, taa ɓerɗe maɓɓe paama, ɓe lorto, ɓe nyawnde.”

¹¹ Mi ƴami: “Haa ndeye ɗum timmata, yaa Jawmiraawo?” O jaabi: “Haa to berniiji laatake bille, walaa jooɗiiɓe ton, cuuɗi cooya yimɓe, lesdi laato ladde meere,

¹² haa to Jawmiraawo riiwi yimɓe daayiiɗum, babe ɗuuɗɗe nder lesdi boo accaama.

¹³ To yeɓre jooɗiiɓe ton woore nder sappo lutti nder lesdi, ɓe nattan kadiboo bee yiite. Bana lekki makki to ki fe'aama, tuggere luttan.” Tuggere man woni aawdi ceniindi.