Esaaya 57 - Fulfulde DC Bible

Kiita dow dewki labbi

¹ Adili'en ɗon kalka, ammaa kakkilanɗo ɗum woodaa. Yimɓe hoolaaɓe ittaama, ammaa paamɗo ɗum woodaa. Ngam daliila halleende, adili'en mbaraama.

² Ɓe njahan haa nokkuure salaaman. Tokkiiɓe laawol darnuŋgol ciwtoto dow baalorɗe muuɗum'en.

³ Ɓadite, onon ɓiɓɓe debbo hiilaajo, onon danygol jeenoowo, daakaareejo!

⁴ Dow moy njaloton? Dow moy maɓɓititton kunnduɗe, njuutinton ɗemɗe? Naa on ɓikkoy tuurtukoy, on danygol fewre na?

⁵ On ɗon mbaalda bee labbi mon les leɗɗe mawɗe, les leɗɗe bilititɗe fuu. On ɗon kirsa ɓikkoy nder waadiiji e gaaruuji tapaaje.

⁶ Kaa'e ɓorwuɗe nder waadiwol ngoni geɗal mooɗon. On ɗon ngaɗana ɗe dokke dufeteeɗe, on ɗon lii'ano ɗe dokke nyaamdu. Kadi mi de'itinan hoore am dow maajum na?

⁷ On ɗon mbe'iti be'itte mon dow hooseere townde, on ɗon lii'o kirseteeɗi mon ton boo.

⁸ On ɗon njo'ina ciftinorɗe labbi mon haa ɓaawo dammuɗe cuuɗi mon. On ngayliti, on acci yam. On ɗon ɓorto, on ɗon mba'o dow be'itte, on ndokki ɓe pellel, on alkotiri bee yiɗɓe on. On ngiɗi waaldugo bee maɓɓe, on ɗon ndaara temmbuki maɓɓe.

⁹ On ɗon nguja ɓalli mon bee nebbam e uurle ngam yahugo sujidango lawru wi'eteendu Laamiiɗo. On ɗon nela nelaaɓe mon daayiiɗum, on njippi haa joonde maayɓe.

¹⁰ On njanci haa on comi, ammaa on mbi'aay: Ɗum nafataa. On tammi semmbe mon hesɗitan, ngam maajum on tampaay.

¹¹ “Kadi, moy kulɗon? On zammbi yam, on ngejjiti yam, on cali numugo. On acci hulugo yam ngam duuri mi ɗon jeeɗi.

¹² Ammaa mi waŋginan adilaaku mon e kuuɗe mon. On naftortaako ɗum sam.

¹³ To on mboyi, sey mooɓgal labbi mon kisna on! Henndu wiftan ɗi fuu, foofaaŋgo sottinan ɗi. Ammaa hoolotooɓe yam maran lesdi, ɓe ndonan hooseere am seniinde.”

Allah nyawni yimɓe muuɗum

¹⁴ Jawmiraawo wi'an: “Ceeke laawol, ceeke ngol, mbaɗe laawol, itte perge fuu dow laawol ummaatoore am!

¹⁵ Allah Ɓaŋiiɗo, mawɗo, tabitɗo haa foroy, mo innde muuɗum Ceniiɗo ɗon wi'a: Mi ɗon jooɗi haa nokkuure seniinde townde, ammaa mi ɗon jooɗi kommbi ta'a-ɓerndeejo e jaŋkiniiɗo boo ngam semmbiɗingo ta'a-ɓerndeejo e yeeɗitingo jaŋkiniiɗo.

¹⁶ Ngam mi jokkirtaa bee maɓɓe haa foroy, mi tikkantaa ɓe haa abada. To naa non, ruuhuuji maɓɓe tampan yeeso am, non boo yoŋkiiji maɓɓe ɗi tagmi.

¹⁷ Mi tikkani ɓe, mi fiyi ɓe ngam aybe maɓɓe, ngam ɓe cuunaama riba kalluka. Mi suuɗi nder ɓernuki am. Kamɓe ɓe tuurti, ɓe tokki laawol ngol ɓerɗe maɓɓe ngiɗi.

¹⁸ Mi yi'i kuuɗe maɓɓe. Ammaa mi yamɗitinan ɓe, mi ɗowan ɓe, mi de'itinan ɓe kamɓe e woyanɓe ɓe,

¹⁹ mi waɗan maŋgtoore haa kunnduɗe maɓɓe. Salaaman! Salaaman laatano daayiiɓe e ɓadiiɓe fuu! Non Jawmiraawo wi'i: Mi yamɗitinan ɓe.

²⁰ Ammaa halluɓe nanndi bee mbeela ndimmbotooŋga, nga waawataa de'ugo. Ndiyamji maaga ɗon ummina loope e tuundi.

²¹ Woodaa salaaman ngam halluɓe.” Non Allah am wi'i.