Esaaya 50 - Fulfulde DC Bible

¹ Ndaa nii Jawmiraawo wi'i: “Toy ɗereewol ceergal ngol mi seeri daada mooɗon bee maajum? Malla tokkiiɗo yam nyamaande moy coorrumi on haa muuɗum? Ndaa on coorraama ngam daliila zunuubaaji mon. Ngam daliila aybeeji mon daada mooɗon seeraama.

² Nde ngarmi, koni walaa koo goɗɗo haa ɗo? Nde ewniimi, koni walaa jaabiiɗo? Kadi juŋngo am rammi, he'ataa rimɗingo na? Semmbe am he'aay hisnugo na? Ndaa, bee umroore am telɓananmi mbeela, njoornanmi nga, ngartiranmi maaje ladde meere. Liɗɗi gonɗi ton mbaatan daliila ɗomka, ɗi nyolan ngam ndiyam woodaa.

³ Mi ɓornan asamanji nyiɓre, mi suddan ɗi bee leppol buhuure.”

Ɗowtaare suka Jawmiraawo

⁴ Allah Jawmiraawo hokki yam ɗemŋgal pukara'en haa mi waawa semmbiɗingo comɗo bee wolde. O findinammi nde weeti fuu, o fiɗɗi noppi am haa mi nana bana pukara'en nanirta.

⁵ Allah Jawmiraawo maɓɓitani yam nofru, min boo mi tuurtaay, mi loraaki ɓaawo.

⁶ Mi hokki ɓoccuɓe yam ɓaawo am, mi suuɗaay galaŋge am nde ɓe ɗoofi wakkude am, nde ɓe kuɗi yam, ɓe tuuti yam tuuɗe.

⁷ Ammaa Allah Jawmiraawo walli yam. Ngam maajum mi toskaaki. Ngam maajum mi suusɗini hoore am, mi anndi mi semtintaake.

⁸ Adilinanɗo yam o ɓadiiɗo. Moy yiɗi wullaago yam? Sey ndaroden haa kiita. Moy dartinta gooŋga am? O ɓadito yam!

⁹ Ndaa, Jawmiraawo Allah yiidatam. Moy aybintammi? Ndaa, ɓe fuu ɓe kiiɗan bana limce, gilɗi nyaaman ɓe.

¹⁰ Moy caka mooɗon ɗon hula Jawmiraawo bee nanugo sawtu suka maako? Koo moy jahanɗo nder nyiɓre, mo annoora yaynantaa ɗum, sey o hoolo innde Jawmiraawo, o tuugo dow Allah maako.

¹¹ Ammaa onon huɓɓuɓe yiite, taaskiiɓe bee kuri giiteleeji fuu, naste nder yiite mon e kuri giiteleeji mon ɗi kuɓɓuɗon. Juŋngo Jawmiraawo waɗani on ɗum, on mbaaloto haa nokkuure bone.