Esaaya 44 - Fulfulde DC Bible

Jawmiraawo feere muuɗum woni Allah

¹ Jawmiraawo wi'i: “Jonta nan kadi, an suka am Isra'iila, danygol Yaakubu, ummaatoore am suɓaande!

² Min Jawmiraawo mi waɗi ma, mi tagi ma nder reedu daada ma, mi balloowo ma. Taa hul, an suka am Yaakubu, an mo cuɓmi.

³ Ngam mi rufan ndiyam dow lesdi marndi haaje ndiyam e maaje dow lesdi njoorndi. Mi waanjan Ruuhu am dow ɓiɓɓe mon e barka am boo dow danygol mon.

⁴ Ɓe puɗan caka huɗo, bana leɗɗe kommbi maaje ilanɗe.

⁵ Oo wi'an: Min mo Jawmiraawo. Oya ewnoto hoore mum bee innde Yaakubu. Goɗɗo winndan dow juŋngo mum: Min mo Jawmiraawo. Goɗɗo feere boo inndan hoore mum Isra'iila.”

⁶ Jawmiraawo Laamiiɗo e coottoowo Isra'iila, Jawmiraawo honooɓe asama, wi'i: “Min woni arano, min woni ragareejo. Walaa Allah, sonaa min!

⁷ Moy nanndi bee am? Sey o wara, o wolwa ɗum, o anndina ko waɗi diga mi jo'ini yimɓe ɓooyma e ko tammi laataago waato kuuje garanɗe.

⁸ Taa kultore, taa ndiwne! Naa min mi anndini on ɗum diga naane na? Onon on seedanooɓe yam. Woodi Allah na, sonaa min? Min woni tapaare mon semmbiɗnde, walaa feere.”

Diina labbi ɗum faataare

⁹ Waɗooɓe labbi fuu ɓe huunde meere. Kuuɗe maɓɓe ɓurɗe wooɗugo nafataa sam. Ɗe laati seedooɓe maaji, ɗe ngi'ataa, ɗe ngalaa anndal. Ngam maajum yimɓe ɓe'e cemtan.

¹⁰ Ɗum faataare ngam mo waɗanta hoore mum ɗowanteeɗo malla ɓolinta suura lawru ka nafataa sam?

¹¹ Ndaa, hawtiɗiraaɓe maako fuu toskoto. Ngam waawɓe sanaa'a ɓe'e, kamɓe boo ɓe ɓiɓɓe Aadama. Sey ɓe mooɓotira, ɓe fuu ɓe ndaro. Ɓe kultoran, ɓe cemtan ɓe fuu.

¹² Kilaajo ɗon waɗa fe'irde, ɗon huuwa bee yiite ƴulɓe. Juŋngo maako semmbiɗŋgo ɗon tappa bee tappirɗum murlum! Dolo naawan mo, semmbe maako jinnan. O yaraay ndiyam, ngam maajum o soman.

¹³ Cehoowo foondan leggal, diida ko tammi sehugo dow maagal, wartira ngal suura cehaaŋga. O foondan nga bee poondirɗum, hokka nga jaati goɗɗo, nanndina nga bee ɓii-Aadamaajo haa jo'ina nga nder suudu.

¹⁴ O fe'a leɗɗe cemmbiɗɗe malla o hoo'a lekki makki e irin maaki, o acca ɗum mawnida bee leɗɗe laynde. Malla o juba leɗɗe cemmbiɗɗe, iyeende mawnina ɗe.

¹⁵ Ɗum laatanto goɗɗo kuɓɓirɗum. O hoo'an goɗɗum maaje, o huɓɓan ɗe ngam o aytino e o sa'ira tamseeje boo. Bee leggal luttuŋgal o sehan ɗowanteeɗo, o rewa ɗum. O waɗan lawru, o sujidanan ndu.

¹⁶ Reeta maaje o wulan ɗe. Bee reeta man o nyaanciran kusel, o nyaama haa o haara. O aytinto boo, o wi'an: “Yowwa! Mi ɗon maata gulɗum, yiite nge'e wooɗi.”

¹⁷ Ammaa bee luttuɗum o waɗan ɗowanteeɗo, lawru maako. O sujidana ndu, o rewa ndu. O toroto ndu, o wi'a: “Hisnam, ngam an woni ɗowanteeɗo am!”

¹⁸ Ɓe ngalaa anndal e faamu. Gite maɓɓe takkaama, ngam taa ɓe ngi'a, ɓerɗe maɓɓe boo maɓɓaaɗe, ngam taa ɓe paama.

¹⁹ Walaa numanɗo koo gooto. Walaa anndal, walaa faamu sakko goɗɗo wi'a: “Reeta maaje ngulmi ɗe, dow ƴulɓe maaje ca'umi tamseeje e nyaancumi kusel, nyaammi. Bee luttuɗe ngaarumi huunde nyiddunde! Mi ɗon sujidana wuddere leggal!”

²⁰ Ɗum faataare bana nyaamugo ndoondi. Faataare ɓernde maako majjini mo, o hisnataa yoŋki maako. O faamataa ko woni haa juŋngo maako, ɗum lawru meere.

Jawmiraawo woni kisnoowo Isra'iila

²¹ Jawmiraawo wi'i: “Siftor ɗum, danygol Yaakubu, ummaatoore Isra'iila, ngam a suka am. Mi tagi ma haa laatoɗa suka am, mi yejjitittaa ma sam, Isra'iila.

²² Mi riiwan zunuubaaji ma bana cuurɗe, hakkeeji ma boo bana ruuldere. Lorta haa am, ngam min sootti ma.”

²³ Onon asamanji, ceye ngam Jawmiraawo waɗi ɗum! Mbaɗe gookaali seyo, onon luggeeŋgaaji lesdi! Mbelmbelte, onon kooseeje, an laynde e leɗɗe nder maare fuu! Ngam Jawmiraawo sootti danygol Yaakubu, o waŋgini tedduŋgal maako haa Isra'iila.

²⁴ Ndaa nii Jawmiraawo, coottoowo ma, tagɗo ma nder reedu daada ma wi'i: “Min woni Jawmiraawo, baɗoowo koo ɗume fuu. Min feere am mi we'iti asamanji. Saa'i mi we'iti lesdi, moy wonduno bee am?

²⁵ Mi ɗon wirga alaamaaji fewooɓe. Mi ɗon wartira waɗooɓe hatti faataaɓe. Mi ɗon lortina hikma'en ɓaawo, mi ɗon wartira anndal maɓɓe faataare.

²⁶ Ammaa mi ɗon tabitina wolde suka am, mi ɗon hiɓɓina nufayeeje nelaaɓe am. Mi wi'an dow Urusaliima: Yimɓe njooɗoto ton, dow gure Yahuuda boo: Ɓe nyiɓtoto ɗe. Mi mahitan bille maaje.

²⁷ Mi wi'an ndiyam lugguɗam: Yoor! Mi ɓeeɓnan maaje maaɗa!

²⁸ Mi wi'an Koores: A gaynaako am! A hiɓɓinan muuyo am fuu. A umran nyiɓtaago Urusaliima. A umran wallingo caɓɓaaje haykaliiru boo.”