Esaaya 30 - Fulfulde DC Bible

Alkawal bee Misra nafataa

¹ Jawmiraawo wi'i: “Bone laatanto Yahuudu'en tuurtuɓe dow am! Ɓe kooci anniyaaji ɗi iwaay haa am, ɓe kaɓɓi alkawal luutŋgal Ruuhu am, haa ɓe mbaaga hakke dow hakke.

² Ɓe ɗon njippo haa Misra bilaa ƴamugo muuyo am. Ɓe ɗon ndogga haa aynol Firawna, ɓe ɗon ɗaɓɓita hisrude les ɗowdi Misra.

³ Ammaa aynol Firawna laatanto ɓe mbustu, hisrude les ɗowdi Misra boo laatanto ɓe palasa.

⁴ Ardiiɓe maɓɓe njehi haa Co'an, nelaaɓe maɓɓe njottake Hanes.

⁵ Ammaa ɓe fuu ɓe cemtan dow ummaatoore nde nafataa ɓe, nde waddantaa ɓe ballal koo nafuuda, sey mbustu e palasa.”

⁶ Ndaa koŋngol dow dabbaaji haa lesdi fombina: “Nder lesdi ɓillaare e mettamɓeram, ndi mbarooga ngorga e ndewa, foosokre e boɗɗe piirooje giiteeleeje ngoni haa muuɗum, nelaaɓe ɗon njahra jawdi Yahuuda dow ɓaawe bamɗe e ndesaaje maɓɓe dow ƴuuke geelooɗi haa ummaatoore nde nafataa ɓe.

⁷ Ngam ballal Misra nafataa, ngal walaa saman. Ngam maajum mi ɗon sooma Misra: Rahab, kuuŋga mbaaliiŋga.”

Yimɓe haa'iniiɓe

⁸ “War jonta, diidu ɗum yeeso maɓɓe dow alluha, winndu ɗum nder deftere, haa ɗum laato seedamku haa foroy ngam garanɗum.

⁹ Ngam ɓe yimɓe tuurtooɓe, ɓe ɓiɓɓe fewooɓe, saliiɓe nanugo ekkitinol Jawmiraawo.

¹⁰ Ɓe ɗon mbi'a yi'ooɓe: Taa ngi'e! Annabi'en boo: Taa anndine wahayuuji gooŋgaaji! Ammaa mbi'e min bolle belɗe, ngi'ane min kaayeefiiji estooji.

¹¹ Ngaylite, cele laawol gooŋgawol, taa mbolwane min haala Ceniiɗo Isra'iila!”

¹² Ngam maajum, ndaa nii Ceniiɗo Isra'iila wi'i: “Nde nii on ɗon calo wolde am, on ɗon koolo toonyotooɓe on, on ɗon tuugo dow leliiɗum,

¹³ aybewol ngo'ol laatanto on bana ceekgol nder mahol towŋgol, nden ngol ɓaarto e ɗon nii ngol yibba.

¹⁴ Ɓe campitan ngol bana ɓe campititta fayannde loope. To nde fusi boo, keeɗe maare ke'ataa ngam hoo'ugo yiite haa kaatane malla ngam nyeɗugo ndiyam haa waawru.”

¹⁵ Ndaa nii Allah Jawmiraawo, Ceniiɗo Isra'iila wi'i: “On keɓan kisndam to on tuubi, on ciwtake. On keɓan semmbe to on nde'i, on kooli yam, ammaa on ngiɗaa.

¹⁶ On mbi'i: Naa non! Ammaa min ndoggan bee pucci. Nonnon nii, on ndoggan! On mbi'i: Min mba'oto pucci jaawɗotooɗi. Nonnon nii, taasnooɓe on njaawɗoto ko ɓuri on!

¹⁷ Ujineere ndoggan to gooto furkiti ɓe. To konne'en njowo purkitake on, on ndoggan. Luttanɓe mon nanndan bee leggal tuutawal dariiŋgal feere mum dow yeereere hooseere malla dow towndiire.”

¹⁸ Ammaa Jawmiraawo ɗon reena wakkatiire nde o mo'anta on. O ummoto haa o hinno on. Ngam Jawmiraawo woni Allah baɗanɗo kiita ngooŋɗuka, barka laatanto hoolotooɓe mo fuu.

Jawmiraawo hinnoto yimɓe muuɗum

¹⁹ Onon yimɓe Siyona, jooɗiiɓe haa Urusaliima, on accan woyugo. Fakat o hinnoto on ngam hoolo bojji mooɗon. To o nani ngo, o jaaboto on.

²⁰ Jawmiraawo hokki on tamseere nder ɓillaare mon e ndiyam nder torra mon. Ekkitinoowo mon wiccitittaako fahin, gite mon ngi'an mo.

²¹ To on ɗon njaha gal nyaamo malla gal nano, noppi mon nanan koŋngol ɓaawo mooɗon: “Ndaa laawol, tokke ngol.”

²² Labbi mon cuddaaɗi bee cardi, on karminan ɗi, non boo labbi mon ɓolinaaɗi, kuuwraaɗi bee kaŋŋeeri. A sakkinan ɗi bana limce tunwuɗe, a wi'an: “Haa yaasi!”

²³ Nden kam Jawmiraawo toɓnan iyeende dow aawdi mon ndi aawɗon nder lesdi. Lesdi fuɗnan nyaamdu welndu, semmbiɗndu. Nyalaade man tokke mon nduran nder durdude yaasnde.

²⁴ Ga'i e bamɗe ɗum ndemrirton ngesa, nyaaman huɗo jillindiraako mannda, ko on camminta bee tufirgel e ɓoftirgel.

²⁵ Nyannde nde konne'en mon maaydi, to cuuɗi maɓɓe towɗi ngibbi, maahoy e maaje njarnan kooseeje e towndiije mon fuu.

²⁶ Jayŋgol lewru laatoto bana ngol naaŋge, jayŋgol naaŋge boo yaynan cowi joweeɗiɗi, bana jayŋgol nyalɗe joweeɗiɗi nde woore, nyannde nde Jawmiraawo haɓɓanta ummaatoore muuɗum kuuduuje mum, o yamɗitinan ɓattajje piyɗe maare.

Kiita Jawmiraawo dow Assuura

²⁷ Ndaa, Jawmiraawo ɗon wara diga daayiiɗum. Tikkere maako ɗon saati, barriya maako nyaaɗi, o ɗon heewi ɓernuki, ɗemŋgal maako bana yiite wulanŋge.

²⁸ Poofɗe maako nanndi bee maayo teelanŋgo yottotooŋgo daande goɗɗo, haa o dimmbina ummaatooje o halka ɗe, o waɗana ɗe labaŋgal, o majjina ɗe.

²⁹ Ammaa onon on ngiman bana nder jemmaare juulde seniinde. Ɓerɗe mooɗon ceyoto bana yahanɓe bee gime ciide haa hooseere Jawmiraawo mo tapaare hisnoore Isra'iila.

³⁰ Jawmiraawo nannan sawtu mum cemmbiɗɗo, waŋginan juŋngo mum taaskiiŋgo fiyugo nder caatal tikkere mum e ɗemŋgal yiite wulanŋge, waabiliije e naargeeji e mallimallooje.

³¹ Assuura'en kultoran ngam sawtu Jawmiraawo, Jawmiraawo fiyan ɓe bee sawru muuɗum.

³² Koo ndeye sawru kiita fiyata ɓe fuu, ndu Jawmiraawo jippinta dow maɓɓe, yimɓe piyan bawɗi e moolooji. Jawmiraawo haɓan bee maɓɓe, bee juŋngo mum ɓaŋgtiiŋgo ngam haɓre.

³³ Duuri, ngaska yiite ɗon taaski ngam laamiiɗo Assuura. Ka luggi, ka yaaji boo, ka heewi yiite e leɗɗe ɗuuɗɗe. Poofɗe Jawmiraawo kuɓɓan ɗe bana maayo baruudu.