Esaaya 13 - Fulfulde DC Bible

Koŋngol dow Baabila

¹ Ndaa wahayu dow Baabila mo Esaaya ɓii Amoosa heɓi:

² Ndarne tuutawal dow hooseere sookre. Ngookane honooɓe. Ɓaase ɓe ɓe nastira dammuɗe tedda-asli'en.

³ Mi umri senaaɓe am, honooɓe semmbiɗɓe, jurotooɓe bee seyo, ngam ɓe mbaŋgina tikkere am.

⁴ Nane hoolo dow kooseeje bana ngo yimɓe ɗuuɗɓe! Nane hoolo laamuuji e ummaatooje mooɓtiiɗe, Jawmiraawo honooɓe asama ɗon taaskitina jama'aare konu muuɗum.

⁵ Honooɓe ɓe'e ɗon ngara diga lesdi daayiindi, diga keeri duniyaaru. Jawmiraawo e waŋginanɓe tikkere mum nattinan duniyaaru fuu.

⁶ Mboye! Ngam nyalaade Jawmiraawo ɓaditake, nde ɗon wara bee nattinki diga Allah Baawɗo.

⁷ Ngam man juuɗe fuu tampan, ɓerɗe yimɓe fuu ɓolwan.

⁸ Ɓe caklake, naawɗum ukkani ɓe, ɓe ɗon njaŋngito bana ɓesnanɗo, ɓe ɗon cutindira, ɓe kayɗini, geese maɓɓe ɗon nguli jaw.

⁹ Ndaa, nyalaade Jawmiraawo hulniinde ɗon wara, ɗum nyalaade ɓernuki e tikkere saatunde, nde walaa enɗam. Duniyaaru laatoto bille, hakke'en fuu nattan.

¹⁰ Koode asama e dulooje muuɗum'en accan yaynugo. Naaŋge nyiɓɓan saa'i nge fuɗata, lewru boo accan yaynugo.

¹¹ Jawmiraawo wi'i: “Mi hiitoto halleende duniyaaru e zunuuba halluɓe. Mi ittan daliila mawnitaare mawnitiiɓe, mi sottinan elewre toonyooɓe.

¹² Yimɓe ɗuuɗataa, kaŋŋeeri laaɓndi, iwndi lesdi Ofir ɓuran ɓe ɗuuɗugo.

¹³ Ngam man ndimmbanmi asama, lesdi dimmboto dow caɓɓaaje maari daliila tikkere Jawmiraawo honooɓe asama, daliila nyalaade nde tikkere maako saatata.

¹⁴ Bana lelwa ndiiwaaŋga, bana tokkere dammooji nde walaa gaynaako, koo moy lortoto haa ummaatoore mum, koo moy doggan haa lesdi muuɗum.

¹⁵ To konne'en tawi goɗɗo, ɓe njuwan mo. To ɓe naŋngi goɗɗo, ɓe mbaran mo bee kaafahi.

¹⁶ Ɓikkoy maɓɓe, konne'en ndirɓan koy yeeso maɓɓe, ɓe ɓoftan ko woni nder cuuɗi maɓɓe, ɓe toskinan rewɓe maɓɓe boo.”

¹⁷ Allah wi'i: “Mi umminan Medi'en dow maɓɓe. Kamɓe ɓe kakkilantaa cardi, ɓe ceyortaako kaŋŋeeri.

¹⁸ Lagaaje e kuri maɓɓe ndo'an suka'en, ɓe njurmintaa ɓikkoy keccoy, gite maɓɓe enɗataa koy.

¹⁹ Baabila, laamu ɓurŋgu laamuuji fuu wooɗugo, daliila juro e mawnitaare Kaldiya'en, laatoto bana Sodoma e Gomorra, saa'i Allah wayliti ɗi.

²⁰ Walaa mo jooɗoto ton, haa foroy, diga yidere haa yidere. Walaa Arabjo darnanɗo laymaaru muuɗum ton, waynaaɓe boo mballintaa dabbaaji ton.

²¹ Ammaa dabbaaji ladde mbaalan ton, duujiije kebbinan cuuɗi Baabila, dabbi njooɗoto ton, jawɗi piccan ton.

²² Pobbi mboyan nder cuuɗi maagol cemmbiɗɗi, cuuli boo nder cuuɗi maagol neeminiiɗi. Wakkati maagol ɓadake wargo, balɗe maagol njuutintaake.”